Лидерите од Европската Унија (ЕУ) се подготвени да поттикнат посилна координација меѓу земјите-членки за да се подготват за следната зима додека блокот се бори да се справи со прекините на испораката на природен гас од Русија, што предизвика скок на цената на енергијата.
На својот следен самит, на 15 декември, челниците на владите би требало да се заложат за напредок во најавеното заедничко купување гас и обединување на побарувачката, полнење на складиштата и порани подготовки за непредвидени ситуации за наредната зима.
Иако резервите на ЕУ за гориво се полни на почетокот од оваа грејна сезона, постои загриженост дека земјите-членки ќе потрошат поголем дел од резервите на гас во складиштата до април, а повторното полнење ќе биде потешко во услови на континуирана криза на испораките.
Надлежните исто така планираат да ја нагласат важноста на поттикнувањето инвестиции во иновации, инфраструктура и енергетска ефикасност за постепено да се оттргне зависноста на блокот од рускиот увоз, да се забрза преминот на чиста економија и да се обезбеди сигурност на испораките.
Русија претходно беше најголем доставувач на природен гас во ЕУ. За да се ограничи влијанието на енергетската криза на домаќинствата и компаниите, блокот веќе се согласи дека ќе воведе мерки што вклучуваат данок на непланираната добивка и цели за доброволно намалување на побарувачката за електрична енергија.
За поголемиот дел земји-членки тоа не е доволно за заштита на економијата, но брз договор за тоа како да му се стави максимална цена на гасот досега се покажа како недостижен. На самитот може да се отвори и прашањето за ограничување на цените на гасот, во зависност од исходот на итниот состанок на министрите за енергетика на ЕУ, кој треба да се одржи на 13 декември.
На помалку од една недела пред министерскиот состанок, земјите-членки се поделени околу предлогот на Европската комисија, како извршно тело на ЕУ, да се воведе т.н. механизам за корекција на пазарот, со што би се поставила горна граница на цената на гасот на 275 евра.
.webp){kind=icon}
