.webp){kind=icon}
Цените на гасот во Европа повторно се нестабилни оваа недела, бидејќи трговците го одмеруваат влијанието на сè пополните складишта од една страна и можните штрајкови во Австралија, кои би го нарушиле глобалното снабдување со течен природен гас (ЛНГ), од друга страна.
Откако претходниот трговски ден цените на референтните идни испораки пораснаа за 28 отсто, највисоко од март минатата година и првите денови од војната во Украина, во четвртокот повторно паднаа за 8,1 отсто.
Складиштата во Европа во моментов се речиси 90 проценти пополнети, многу над просекот за овој период од годината, а индустриската побарувачка останува млака по минатогодишната криза на цените на енергијата.
Сепак, секое големо нарушување во понудата може да ги зголеми цените, особено кога се приближуваат зимските месеци. Позиционирањето на трговците на мало исто така има влијание.
Моментална закана е можниот штрајк во постројките за ЛНГ во Австралија, што би можело да наруши околу 10 отсто од глобалниот извоз на овој енергент. Доколку се случат штрајкови, азиските купувачи ќе бараат алтернативни извори надвор од регионот и тоа потоа ќе ја интензивира пазарната конкуренција со европските купувачи.
Движење на цената на гасот на европскиот пазар во изминатите три дена
Bloomberg Mercury
„Таков штрајк ќе наруши околу половина од австралискиот извозот на ЛНГ и ќе ги поттикне азиските купувачи да се свртат кон други извори“, рече Зонгкјанг Луо, аналитичар во норвешката консултантска компанија „Рајстад енерџи“ (Rystad Energy).
Преговорите се во тек меѓу синдикатот и „Шеврон“ (Chevron), односно компанијата „Вудсајд енерџи груп“ (Woodside Energy Group). Според трудовото законодавство, штрајковите би можеле да започнат веќе следната недела.
Што се однесува до резервите во Азија, сликата е измешана. Во Јапонија резервите на ЛНГ паднаа во споредба со минатата година поради силната побарувачка за електрична енергија, според „Рајстад“. Во Кина резервите би можеле да достигнат 90 отсто следниот месец.
Увозот на ЛНГ во Европа е намален во последните месеци, но се очекува дека побарувачката и конкуренцијата ќе зајакнат со почетокот на грејната сезона. „ЛНГ е важен за Европа како замена за рускиот природен гас што пристигнува преку гасоводи, но малку е веројатно дека овој извор ќе биде целосно заменет пред 2025 година“, вели аналитичарот Патрисио Алварез од „Блумберг инталиџенс“.
Цените на гасот за еден месец однапред на холандскиот пазар, кој е референтен за Европа, во четвртокот наутро беа 38,34 евра за мегават-час. Пред два дена беа меѓу 30 и 31 евро.
