Американските резерви на минимум, нафтата скокна на над 95 долари

Цената на референтната американска сурова нафта достигна 95 долари за барел за прв пат по повеќе од една година, откако залихите во главниот складишен капацитет на земјата паднаа до критично ниво што го потенцираше зголемениот глобален дефицит.

Цената на WTI  (West Texas Intermediate) накратко отскокна над прагот откако се зголеми за 3,6 отсто во средата, што е најголема добивка од почетокот на мај. Залихите во Кушинг, Оклахома  паднаа нешто под 22 милиони барели, што е најниско од јули 2022 година и блиску до оперативниот минимум.

„Мојот страв на овој пазар е дека многу ги испразнивме залихите “, изјави за Блумберг ТВ Амрита Сен, ко-основач и шеф на истражување во консултантската компанија Енерџи Аспектс (Energy Aspects). „Во моментов, што се случува во САД?  Кушинг е сув“.

Bloomberg

 

Вкупните залихи на сурова нафта во САД паднаа повеќе од очекуваното, според официјалните податоци објавени во средата, што дава доказ за тоа колку брзо се стега пазарот поради намалувањето на понудата од Саудиска Арабија и Русија. WTI скокна за околу една третина од крајот на јуни и е на пат за најголема квартална добивка од почетокот на 2022 година, поттикнувајќи ја инфлацијата и предизвикувајќи нови главоболки за централните банки.

На почетокот на овој месец, ОПЕК прогнозираше дефицит од дури три милиони барели сурова нафта дневно во четвртиот квартал. Со оглед на тоа што побарувачката во САД и Кина се покажа како отпорна, многумина на пазарот сега ја гледаат цената на нафтата од 100 долари како неизбежна, дури и кога доларот расте и загриженоста за високите глобални каматни стапки опстојува.

Цени:

WTI за испорака во ноември се зголеми за еден отсто на 94,61 долари за барел во 10:54 часот во Сингапур. Достигна 95,03 долари, највисоко од август 2022 година.

Брент нафтата за ноемвриска испорака поскапе за 0,9 отсто до 97,45 долари за барел.

Поактивните декемвриски фјучерси се зголемија за 0,7 отсто до 95,04 долари.

Bloomberg

„Прашање на време е кога нафтата Брент ќе надмине 100 долари за барел“, рече Ворен Патерсон, шеф на стратегијата за стоки во ИНГ (ING Groep NV). „Сепак, ние веруваме дека секој пробив ќе биде релативно краткотраен, со оглед на зголемениот притисок кој најверојатно ќе биде ставен врз ОПЕК + за да се олеснат намалувањата на снабдувањето“.

Сепак, побарувачката се чини дека се задржува и покрај повисоките цени. Глобалната потрошувачка на гориво за транспорт се зголеми минатата недела, поттикната од кинеската транспортна активност и зголемувањето на меѓународните патувања во земјата пред празникот Златна недела, соопшти ЏМ Морган (JPMorgan Chase & Co).