Како ‚Северeн тек‘ стана толку важен за гасната војна во Европа

Европа е во исчекување на четврток за да открие дали Русија ќе го рестартира протокот на природен гас преку својот најголем гасовод, по завршувањето на работите за одржување.

Претседателот, Владимир Путин, сигнализираше дека снабдувањето ќе продолжи, но на пониски нивоа и со услови. Со оглед на тоа што Москва веќе го ограничува протокот преку други рути, „Северен тек“ е поклучен од кога било. Одржувањето треба да заврши до 6 часот по берлинско време, а првите податоци за тековите ќе бидат внимателно следени од трговците и креаторите на политики.

Еве еден поглед на клучните рути и како сите тие се компромитирани на различни начини со ескацијата на тензиите меѓу Русија и Европа.

„Северен тек“

Подводниот гасовод до Германија е главната рута. Минатата година испорача повеќе од една третина од вкупниот извоз на руски гас во Европа, со максимален капацитет од околу 167 милиони кубни метри дневно.

Минатиот месец Русија ги намали испораките преку врската на само 40 отсто од тоа ниво, како причина наведувајќи го доцнењето на одржувањето на гасната турбина во Канада поради санкции. Опремата е од клучно значење за компресорската станица Портоваја, која е влезна точка за „Северен тек“ на руската страна на Балтичкото Море.

Според Русија, само две гасни турбини на станицата се способни да се справат со протокот, иако вообичаено се користат шест. Згора на тоа, една компонента од тие две ќе треба да оди на одржување веднаш следната недела, рече Путин. Тој кажа дека тоа би значело дека „Северен тек“ може да работи само со 20 отсто од капацитетот, освен ако Русија дотогаш од Канада не ја добие турбината заглавена поради санкции.

Делот сега е на пат преку Германија. Путин, исто така, побара да се достават сите релевантни документи.

Bloomberg

 

Транзит преку Украина

Русија може да извезува околу 110 милиони кубни метри дневно преку Украина според петгодишниот договор за транзит на гас постигнат во декември 2019 година, со поделени количини меѓу две клучни влезни точки на границата.

Во мај, една од нив - Сокрановка, беше ставена надвор од употреба од страна на украинската мрежа која соопшти дека ја изгубила контролата врз објектот поради окупаторските сили. Киев во многу наврати го повика „Гаспром“  да го пренасочи или барем да го врати обемот на договореното ниво преку преостанатата точка, но Русија го отфрли тоа. Вели дека пренасочувањето, што било спроведувано во минатото, сега не е можно.

Bloomberg

 

Јамал-Европа

Гасоводот, кој минува низ Белорусија и Полска до Германија со капацитет да испорача околу 90 милиони кубици на ден, не е во функција од мај, кога руската влада му забрани на „Гаспром“ каква било соработка со „Еуропол Гас“, сопственик на полскиот дел на врската.

Не долго пред тоа, „Гаспром“ го прекина снабдувањето за Полска бидејќи земјата беше меѓу првите што одби да го исполни барањето на Кремљ за гасот да се плаќа во рубли. Врската во моментот работи обратно, носејќи гас од Германија до Полска.

Турски тек

Протокот преку гасоводот кој испорачува руски гас под Црното Море до Турција и снабдува неколку земји во југозападна Европа, засега се одвива нормално.

Европската унија добива околу 40 милиони кубни метри дневно од оваа врска.

„Северен тек 2“

Гасоводот, кој треба да одговара на капацитетот на „Северен тек 1“ и да носи гас преку Балтичкото Море до Германија, беше подготвен да започне со испораки во декември и покрај низата пречки, вклучително и американските санкции. Само ги чекаше финалните регулаторни одобренија.

Тогаш непосредно пред целосната инвазија на Русија на Украина и под меѓународен притисок, Германија се откажа од проектот што долго време го бранеше. Москва инсистира дека врската е сè уште достапна за употреба.

Во моментов нема коментари за веста. Биди прв да коментира...

Остави коментар