Цената на железната руда на најниско ниво во последните шест недели

Цената на железната руда падна на најниско ниво во повеќе од шест недели поради загриженоста за изгледите за кинеската побарувачка, која е загрозена од долготрајната криза на пазарот на недвижности.

Падот на овој пазар во Кина сега е во својата трета година, што влијае на втората по големина економија во светот и ја влошува кризата со ликвидност. Креаторите на политиката се обидуваат да го оживеат расположението кај купувачите на станови кои се загрижени за падот на цените и недовршените станови.

Вредноста на продажбата на нови домови од 100-те најголеми компании за недвижности се намали за 34 отсто во однос на претходната година на 322,4 милијарди јуани (44,5 милијарди долари) во мај. Иако тоа беше помалку од падот од 45 отсто во април, секако е показател за големината на предизвикот со кој се соочува Владата на земјата.

„Изградбата на нови станови ќе остане слаба поради промената на политиката кон намалување на залихите“, рече Хуи Шан, главна кинеска економистка во „Голдман сакс“ (Goldman Sachs Group Inc.) „Нашиот тим задолжен за недвижности очекува станбената изградба да опаѓа за 15 отсто оваа година“, рече таа, додека цените на железната руда најверојатно ќе паднат до 100 долари за тон во четвртиот квартал.

Во услови на голема понуда, залихите на железна руда на кинеските пристаништа се највисоки во повеќе од две години. Во меѓувреме, нагорниот моментум на цените на челичната арматурна шипка - производ што се користи во градежништвото - забавува.

„Наше мислење е дека цените на железната руда ќе се спуштат надолу во јуни“, рече Јинг Веи, аналитичар во Чајна индастриал фјучрс“ (China Industrial Futures Ltd).

Фјучерсите на железната руда во Сингапур паднаа за цели 4,4 отсто до 110,40 долари за тон, што е најниско од 17 април, пред да се тргува по 110,50 долари до 15:57 часот. Цените во Далиан паднаа за 2,5 проценти.

Во моментов нема коментари за веста. Биди прв да коментира...

Остави коментар