Нафтата е на пат да оствари втор неделен пад пред состанокот на ОПЕК+

Нафтата е на пат кон втор неделен пад пред состанокот на ОПЕК+ (Организацијата на земји извознички на нафта и нивни сојузници) за политиката на производството, што се очекува да доведе до уште едно зголемување на понудата.

Нафтата брент падна под 64 долари за барел откако во четвртокот нејзината цена се намали за 1,2 отсто, додека нафтата ВТИ се тргуваше близу 61 долар. Групата предводена од Саудиска Арабија треба да се состане в сабота за да одлучи за нивоата на производство во јули, а прелиминарните разговори минатата недела укажаа на трето последователно зголемување на понудата.

„Инвеститорите со нетрпение го чекаат состанокот на ОПЕК в сабота за да се обелодени обемот на зголемувањето на производството“, рече Пријанка Сачдева, виша пазарна аналитичарка за брокерската куќа „Филип нова“ (Phillip Nova Pte) во Сингапур. „Пазарите на нафта треба да се подготват за поголема нестабилност со ризици насочени надолу“.

Оживувањето на запоставеното производство од страна на ОПЕК и неговите сојузници со темпо побрзо од очекуваното предизвика загриженост околу можна идна презаситеност на пазарот и помогна да се намали цената на нафтата. Стравот од глобално економско забавување поради царините и одмаздничките мерки на претседателот Доналд Трамп исто така изврши притисок врз цените.

Иако сеопфатните царини на Трамп ги потресоа глобалните пазари, тие сега се соочуваат со правни неизвесности. Американскиот трговски суд блокира дел од царините на претседателот неделава, сметајќи ги за нелегални, иако федералниот апелациски суд понуди привремено одложување на пресудата.

Во меѓувреме, американските резерви на сурова нафта минатата недела се намалија за 2,8 милиони барели, најмногу во последните речиси два месеца, според податоците од Администрацијата за енергетски информации, објавени вчера. Резервите од бензин исто така се намалија.