Емиратите и Кувајт почнаа да го намалуваат производството на нафта

Обединетите Арапски Емирати и Кувајт почнаа да го намалуваат производството на нафта, откако речиси целосната блокада на клучниот Ормуски теснец почна да се прелева врз енергетските пазари и да влијае врз светската понуда.

„Абу Даби Оил Компани“ (Abu Dhabi National Oil Company) управува со нивото на офшор производство „за да одговори на потребите за складирање“, соопшти компанијата без да изнесе дополнителни детали. КПК (Kuwait Petroleum Corporation) пак соопшти дека го намалува производството и на нафтените полиња и во рафинериите поради „иранските закани за безбедниот премин на бродови низ Ормускиот теснец“.

Војната на Блискиот Исток речиси го затвори Ормускиот теснец, тесен морски премин што го поврзува Персискиот Залив со отворените мориња, за поморски сообраќај по иранските закани кон бродскиот транспорт. Со тоа се блокирани извозните текови од регионот што произведува најмногу нафта во светот, што придонесе цената во Лондон да достигне највисоко ниво на затворање во повеќе од две години, на речиси 93 долари за барел. Потрошувачите поради тоа бараат алтернативи, додека постои и ризик светската инфлација дополнително да се зголеми.

Прекини во енергетскиот сектор на Блискиот Исток - конфликтите во регионот го нарушија производството и сообраќајот на танкери. Bloomberg

Намалувањето на производството во Кувајт започна со околу 100.000 барели дневно рано во саботата, а се очекуваат понатамошни постепени намалувања во зависност од нивото на складирање и состојбата во Ормускиот теснец, изјави извор директно запознаен со планот, кој побара да остане анонимен бидејќи деталите не се јавни.

Обединетите Арапски Емирати, кои во јануари произведуваа повеќе од 3,5 милиони барели дневно како трет најголем производител во ОПЕК, користат извозни капацитети што го заобиколуваат Ормускиот теснец, како и меѓународни складишта за да го обезбедат снабдувањето на светските пазари. „Абу Даби Оил Компани“ управува со нафтовод со капацитет од 1,5 милиони барели дневно до Фуџеира на источниот брег на Емиратите за да го избегне преминот низ теснецот. Компанијата соопшти дека копнените операции се одвиваат нормално.

Намалувањето на производството кај овие две членки на ОПЕК следува по низа слични потези во регионот. Ирак претходно оваа недела почна да задржува дел од производството откако резервоарите за складирање почнаа да се полнат, додека Саудиска Арабија ја затвори својата најголема рафинерија, а Катар ја затвори најголемата извозна постројка во светот за извоз на течен природен гас по напад со дронови.

Виша сила

КП (Kuwait Petroleum) прогласи и виша сила – правна клаузула што ѝ овозможува на компанијата да не ги исполни договорните обврски поради околности надвор од нејзина контрола - за продажба на нафта и рафинериски производи, според известување во кое увид имал „Блумберг'.

Кувајт во јануари произведувал околу 2,57 милиони барели нафта дневно, според податоците што ги собра „Блумберг“. Единствениот излез за овој извоз води преку Ормускиот теснец. Саудиска Арабија, најголемиот производител во регионот, пренасочи дел од својата сурова нафта од таа рута кон Јанбу на Црвеното Море.

 Bloomberg

Кувајт претходно почна да го намалува и обемот на преработка во рафинериите поради полните магацински резервоари. Постројките во земјата - Ал-Зур, Мина ал-Ахмади и Мина Абдула - имаат вкупен капацитет од околу 1,4 милиони барели дневно. Ал-Зур е една од најголемите постројки за преработка на нафта на Блискиот Исток.

Претседателот на САД, Доналд Трамп, изјави дека очекува пад на цените на суровата нафта по завршувањето на војната, која ја нарече „помала епизода“ за која верува дека ќе трае „уште некое време“.

„Проценивме дека цените на нафтата ќе пораснат, и тоа ќе се случи“, изјави Трамп пред новинарите во претседателскиот авион во саботата. „Но тие и ќе паднат. Ќе паднат многу брзо. И ќе отстраниме голем, голем рак од лицето на Земјата.“

Обединетите Арапски Емирати и Кувајт, како и други земји од Персискиот Залив, беа честа цел на ирански ракети и дронови во војната што се шири во регионот. Погодена беше и американската амбасада во Кувајт, а мета беше и американскиот конзулат во Дубаи, заедно со друга инфраструктура во овие две земји.