Инвеститорите во кинеската технолошка индустрија, уморни од постојаната ценовна конкуренција, може да се свртат кон еден сектор што напредува со спротивна стратегија: онлајн музиката.
Акциите на „Тенсент мјузик“ (Tencent Music Entertainment Group) и нејзиниот помал ривал „Нетис“ (NetEase Cloud Music Inc.), котирани во Хонгконг, се повеќе од удвоени од крајот на 2023 година, надминувајќи ги повеќето кинески интернет-компании. Овој раст доаѓа како резултат на фокусот на монетизација на лојалната корисничка база и проширување на понудата со поткасти и настани во живо.
„Тенсент мјузик“ забележа четири последователни квартали со раст на приходот по платен корисник, благодарение на успешниот трансфер на претплатниците на поскапи пакети. Тоа е освежувачка промена во однос на честите вести за длабоки намалувања на цените кај електричните возила и е-трговијата, кои предизвикуваа нестабилност кај кинеските технолошки акции во последниве години.
„Музиката станува сè поважна за младите во Кина и никој нема да штеди еден или два јуана за да ги напушти сите свои плејлисти и да премине на друга платформа“, вели Иван Су, аналитичар во „Морнингстар“ (Morningstar Inc). „Месечната претплата - која чини колку една шолја кафе - е многу ниска“.
Кинеската онлајн музичка индустрија се консолидира во последниве години, додека „Спотифај“ (Spotify) е блокиран во Кина.
„Тенсент мјузик“ е лидер со околу 555 милиони месечни активни корисници до крајот на март, од кои околу 22 отсто се платени претплатници. За споредба, „Спотфај“ има стапка на платени претплати од околу 40 отсто.
Клучен дел од стратегијата за монетизација на „Тенсент мјузк“ е Суперпремиум ВИП-пакетот, каде што корисниците плаќаат околу 4 долари месечно за ексклузивна содржина и рана пристапност до производи и настани. Основната претплата чини околу два долара месечно.
Според аналитичарите на „Голдман Сакс“ (Goldman Sachs), процентот на премиум членови може да порасне на 19 отсто до 2027 година, од 12 отсто годинава. Банката очекува и раст од 10 отсто на просечниот приход по платен корисник годинава и раст со високи едноцифрени проценти од 2026 година натаму.
Како и „Спотифај“, „Тенсент мјузик“ се проширува и во други услуги. Месецов објави план за купување кинески поткаст стартап, а во мај откри дека купил удел во јужнокорејската K-поп агенција СМ (SM Entertainment Co).
„Постојат многу иновативни начини водечките компании да ги монетизираат своите корисници, а сите тие се многу достапни во оваа економска средина“, вели Агнес Нг, портфолио-специјалист. „Со само два големи играча на пазарот, конкуренцијата е блага, а пазарниот удел е стабилен“.
Су од „Морнингстар“ вели дека акциите на „Нетис“ имаат подобри перформанси бидејќи „брзо станаа профитабилни, побрзо од очекувањата“. Од друга страна, „Тенсент мјузик“ има „многу поширок избор на содржини“ и поширока корисничка база.
Вреднувањата на „Тенсент мјузик“ „сè уште изгледаат привлечно, особено во споредба со „Спотифај“, додека акциите поврзани со содржина уживаат премија поради помалата изложеност на царини, вели Кевин Нет, раководител на азиски акции во ФДЕ (Financiere de L’Echiquier). „Мислам дека инвеститорите го ценат нивниот над 70-отстотен пазарен удел во пазар што сè уште не е целосно искористен, со потенцијал за зголемување на цените“.
.webp){kind=icon}
