Сомнителни обложувања пред нападот на Иран, „Полимаркет“ пријави 529 милиони долари промет

Додека американски и израелски бомби викендов паѓаа врз Иран, учесниците на „Полимаркет“ (Polymarket), каде што беа тргувани договори поврзани со времето на нападот во вкупна вредност од 529 милиони долари, ги наплатуваа своите облози. Речиси веднаш, блокчејн-аналитичари почнаа да бараат невообичаени шеми во неодамнешните влогови.

Шест налози на „Полимаркет“ оствариле околу еден милион долари добивка обложувајќи се дека САД ќе го нападнат Иран до 28 февруари, според аналитичката фирма „Баблмепс“ (Bubblemaps SA). Сите налози биле отворени во февруари и се обложувале исклучиво на времето на можниот американски напад.

Сомнителни шеми и прашања за инсајдерски информации

Дел од нивните удели биле купени во поединечни случаи по цена од околу десет центи, само неколку часа пред во Техеран да бидат пријавени првите експлозии. Таквите шеми аналитичарите ги поврзуваат со можно инсајдерско тргување на пазарите за предвидување, сектор со слаб надзор и без јасни критериуми за да се разграничи среќа од протекување доверливи информации, но самите по себе не претставуваат цврст доказ.

Слични шеми укажуваа дека некој со привилегирани информации остварил значителна добивка обложувајќи се на соборување на венецуелскиот претседател Николас Мадуро во јануари, а биле користени и за идентификување други наводни случаи на инсајдерско тргување.

До моментот кога договорот за 28 февруари истече во саботата, тој привлече околу 90 милиони долари обем на тргување од неговото отворање, убедливо најмногу меѓу сите можни датуми за напад на платформата. Следен по обем беше договорот за напад до 31 јануари, со околу 42 милиони долари промет.

„Полимаркет“, една од најголемите платформи за пазарно предвидување, прерасна во разгрането и во голема мера нерегулирано средиште за геополитички шпекулации, каде што тешко може да се повлече границата меѓу информирана проценка и привилегирано знаење. Компанијата во саботата не одговорила веднаш на барањето за коментар.

„Пазарите за предвидување се меѓу првите производи што овозможуваат директно обложување на геополитички настани“, изјави во имејл Николас Вајман, главен извршен директор на „Баблмепс“. „Во случаи на војна или конфликт, информациите можат да кружат во поширок круг пред да станат јавни. Во комбинација со фактот дека „Полимаркет“ за тргување најчесто бара само дигитален паричник, што овозможува висок степен на анонимност, тоа може да создаде поттик информираните учесници да дејствуваат порано“, додаде тој.

Додека нападите продолжуваа во текот на викендот, „Полимаркет“ веќе отвори нови договори за обложување, меѓу другото, дали некоја заливска држава ќе го нападне Иран во рок од една недела, како и дали САД до крајот на март ќе го нападнат соседен Ирак. Засега, сите тие договори бележат минимален промет.

Дел од обложувањата што ги идентификуваше „Баблмепс“ предизвикаа дополнително внимание на социјалните мрежи, каде што корисниците брзо ги означија како потенцијално инсајдерски. Сликата, сепак, е значително посложена. САД со недели сигнализираа можност за воена акција, привлекувајќи шпекуланти. Договорот што го следеше можниот напад до 27 февруари, само еден ден порано, привлече повеќе од 25 милиони долари промет.

Не сите налози биле успешни. Еден од шесте претходно се обложил со околу 800 долари дека САД порано ќе преземат воена акција, при што изгубил околу 300 долари. Но, облог од 26.513 долари дека САД ќе нападнат во саботата, убедливо најголемиот влог на тој налог, му донел повеќе од 174.000 долари добивка.

Во средина во која за можни американски напади се дебатираше јавно со месеци, кругот на луѓе подготвени на агресивна и добро информирана опклада беше широк. Дали некој притоа ја преминал границата меѓу уверување и привилегирано знаење е прашање на кое самиот блокчејн не може да даде одговор.

Хамнеи, регулатива и правни последици

Времето на американската воена акција не беше единствениот договор на „Полимаркет“ што поттикна сомнежи за можни инсајдерски активности. Во средината на јануари, друга аналитичка фирма, „Полисајтс“ (Polysights), забележа група еднострани активности околу пазарот што следеше дали Али Хамнеи до крајот на март ќе престане да биде врховен лидер на Иран.

Во тој момент трговците ја проценуваа веројатноста на 40 отсто, но речиси 90 отсто од потенцијално инсајдерските трансакции што ги следеше „Полисајтс“ го поддржуваа тој исход. И тие налози одговараа на профилот што блокчејн-аналитичарите го дефинирале како типичен показател за наводни инсајдери.

Условите на договорот поврзан со Хамнеи не ја исклучуваат неговата смрт како настан што би довел до исплата, пропуст што предизвика критики од оние кои тврдат дека со тоа се создава финансиски поттик за атентат.

„Калши“ (Kalshi Inc.), конкурент што е регулиран од американската Комисија за тргување со стоковни фјучерси - ЦФЦТ (CFTC), во саботата соопшти дека не нуди пазари чиј исход се одредува со нечија смрт. Во случај на смрт на Хамнеи, компанијата наведе дека договорот би го затворила според последната понудена цена.

Главната трговска платформа на „Полимаркет“ се наоѓа во странство и не прифаќа клиенти од САД, со што е надвор од надзорот на ЦФТЦ. Компанијата тврди дека нејзините договори обезбедуваат вредни податоци, бидејќи обединуваат информации од повеќе извори во нестабилни ситуации и ѝ помагаат на јавноста да го процени ризикот, особено кога конвенционалното известување доцни.

Облозите поврзани со Иран се најнови во низата навремени влогови на пазарите за предвидување поврзани со чувствителни настани. На почетокот на февруари, израелските власти подигнаа, како што се наведува, први кривични обвиненија во светот што ги поврзуваат облозите на пазарите за предвидување со доверливи воени информации.

Еден израелски воен резервист и еден цивил се обвинети дека користеле тајни оперативни информации за да се обложуваат на „Полимаркет“ за израелските безбедносни операции минатата година, остварувајќи околу 150.000 долари добивка.

„Калши“ неодамна објави и први јавни мерки против двајца клиенти за кои постоело сомнение дека користеле инсајдерски информации при обложување. Компанијата суспендирала и парично казнила уредник поврзан со ѕвездата на „Јутјуб“ (YouTube), Мистер Бист, за кого тврди дека ги искористил сознанијата за неемитувана содржина од емисија за да поставува облози.