ПОЛИТИКА
Сирија во рацете на бунтовниците
Сирија останува најактивното жариште на криза на Блискиот Исток, по уривањето на режимот на Башар ал Асад. Сирија сега е во рацете на бунтовниците, кои го назначија Мохамед ал Башир за привремен премиер на преодната влада. Тоа го извести сириската телевизија. Ал Башир ќе формира преодна влада, со цел, како што е соопштено, да се избегне земјата да се лизне во хаос. Тој досега предводеше помали делови од територијата под контрола на бунтовниците, пред да го соборат досегашниот претседател Башар ал Асад од власт во молскавична офанзива. Со тоа заврши 13-годишната граѓанска војна и ѝ се стави крај на династијата Асад, која владееше со Сирија повеќе од половина век.
Кина го ограничува извозот на делови за дронови
Трговскиот конфликт меѓу Западот и Кина дополнително ескалира. Имено, кинеските производители неодамна почнаа да воведуваат построги ограничувања за Америка и Европа, кога станува збор за продажба на клучни компоненти за изработка на дронови. Овие ограничувања, како што наведува „Блумберг“, веќе влијаеле на американските и европските компании.
ДРУГО
Уапсен осомничениот за убиството на Брајан Томпсон
Полицијата во Пенсилванија го уапси 26-годишниот Луиџи Манџионе, во рамките на истрагата за убиството на директорот на осигурителната компанија „Јунајтедхелт груп“ (UnitedHealth Group), Брајан Томпсон, во Њујорк. По петдневна потрага, Манџионе е уапсен и задржан по пет точки од обвинението, вклучувајќи обвинение за поседување оружје. Кај Манџионе се пронајдени неколку лажни документи за идентификација, но и писмен манифест во кој ја осудува корпоративна Америка.
БЕРЗИ
Европа
Фјучерсите на европските акции се тргуваат мешано, во исчекување на одлуката на Европската централна банка (ЕЦБ) за каматните стапки. Економистите на „Блумберг“ очекуваат дека официјалните лица в четврток ќе ги намалат каматните стапки за четвртина процентен поен и дека до јуни, на секое заседание, ќе ги намалуваат каматите во истиот обем, за каматната стапка на депозитите на крајот да падне на два процента.
Depositphotos
САД
И фјучерсите на американските акции се колебаат меѓу добивки и загуби, пред објавувањето на податоците за инфлацијата за ноември. Економистите на „Блумберг“ очекуваат дека годишната инфлација минатиот месец забрзала на 2,7 проценти од 2,6 проценти во октомври. Потсетуваме дека американските акции вчерашното тргување го завршија со загуби, при што акциите на „Енвидија“ (Nvidia) паднаа дури 2,6 проценти. Причината е што највредната светска компанија се најде на удар на кинеските власти, поради сомнежи дека ги прекршила антимонополските прописи.
Азија
Кога станува збор за акциите во азиско-пацифичкиот регион, тие се тргуваат во зелено, откако кинеските официјални лица најавија силни поттици за заживување на економијата. Освен акциите во Кина, со раст се тргуваат и акциите во Јужна Кореја и во Јапонија. Потсетуваме, кинеското Политбиро вети „поактивни“ фискални мерки и „умерено“ полабава монетарна политика во наредната година, со цел да се поттикне потрошувачката во земјата.
НАФТА
Нафтата падна бидејќи постојаната загриженост поради можната презаситеност на понудата ги засени изгледите за поголеми кинески стимулации следната година. Брентот се тргуваше под 72 долара за барел откако во понеделникот порасна за 1,4 проценти, додека ВТИ (West Texas Intermediate) беше близу 68 долари.
Кинеското Политбиро најави дека ќе прифати „умерено полабава“ монетарна политика, и тоа е првпат по многу години да се зборува за мерките што ќе бидат преземени. Пазарот на нафта, сепак, е на пат да има значителен суфицит следната година, што доведе до тоа ОПЕК+ да го одложи враќањето на производството.
Bloomberg Mercury
.webp){kind=icon}
