Цената на нафтата расте, фокусот е на царините и на преговорите меѓу САД и Иран

Цената на нафтата порасна по вчерашната млака сесија на тргување бидејќи трговците ги следат најновите американски потези во трговската војна и изгледите за полабави ограничувања за иранската сурова нафта.

Брентот се тргува на ценовно ниво од околу 65 долари за барел откако вчера додаде 0,2 отсто на својата вредност, додека ВТИ (WTI - West Texas Intermediate) се задржа близу 62 долара. Вчера се врати смиреноста на Волстрит, при што акциите и обврзниците се зголемија по бурната недела од царинската политика на претседателот Доналд Трамп.

Bloomberg

 

„Макрорасположението засега е стабилизирано, а суровата нафта е на бавен пат кон закрепнување“, рече Хуанг Ванже, аналитичар во „Дади фјучерс“ (Dadi Futures). „Откако пазарите во голема мера се опфатени со првиот бран на ‘тарифни цени’, тие сега се подготвуваат за следната фаза - каде што фокусот се префрла на вистинското влијание на побарувачката при ескалација на трговската војна“, вели Ванже.

Во апсолутна вредност цената на нафтата падна за околу 10 долари месецов бидејќи трговската војна ги поттикна стравувањата од глобална рецесија, што ќе ѝ наштети на побарувачката на енергија, особено во САД и во Кина - најголемите потрошувачи на сурова нафта. Овие грижи ги натераа агенциите да ги намалат прогнозите за побарувачката, а аналитичарите да ги намалат прогнозите за цените, со можноста за презаситеност, која е засилена со изненадувачката одлука на ОПЕК + (Организацијата на земји извознички на нафта и нивните сојузници) да го врати производството побрзо од очекуваното.

САД и Иран во текот на викендот одржаа дискусии на темата нуклеарна енергија, кои двете страни ги окарактеризираа како конструктивни во првиот контакт на високо ниво што е остварен по 2022 година. Двете страни треба да се сретнат повторно во Рим, зголемувајќи ја можноста за зголемено производство на нафта од членката на ОПЕК.

Разговорите меѓу САД и Иран минатиот викенд не понудија нешто многу, но има уште една рунда закажана за сабота. Пазарите внимателно ќе следат појасни сигнали, сметаат експертите.

На страната на побарувачката, ОПЕК (Организацијата на земјите извознички на нафта) ја намали својата прогноза за потрошувачка во следните две години за околу 100.000 барели дневно, по поголемото намалување на американската Администрација за енергетски информации. Повеќето банки исто така ги намалија своите прогнози за цените, при што „ЏП Морган Чејс“ (JPMorgan Chase & Co.) сега смета дека цената на брентот годинава ќе биде 66 долари.