ЕКОНОМИЈА
ЕЦБ ги намали каматните стапки за да го поттикне економскиот раст
Европската централна банка (ЕЦБ) ги намали каматните стапки четврти пат по ред, навестувајќи дополнителни намалувања во наредната година како што инфлацијата ќе се приближува до целта од два процента. Така, каматната стапка на депозитите е намалена за четвртина процентен поен на три проценти, колку што предвидуваа економистите на „Блумберг“, но и аналитичарите на „Блумберг Адрија“.
Да потсетиме, ЕЦБ од јуни ги намали каматните стапки за вкупно 100 базични поени. Интересно е што во соопштението на ЕЦБ овој пат е изоставена формулацијата дека ќе ги држи каматните стапки рестриктивни колку што е потребно. Претседателката на ЕЦБ на прес-конференција изјави дека таа институција е блиску до целната инфлација, но дека работата сè уште не е завршена.
Официјалните лица на ЕЦБ изразија загриженост за економската ситуација во Европа, а оптимизам не им влева ниту политичката нестабилност во Германија и во Франција. Покрај сето тоа, тие се обидуваат да проценат како економската програма на новоизбраниот американски претседател Доналд Трамп ќе влијае не само на Европа туку и на Федералните резерви (Фед).
ПОЛИТИКА
Русија ќе задржи две воени бази во Сирија?
На геополитички план, Русија е блиску до договор со новото раководство во Сирија за задржување на своите две клучни воени бази во таа земја, тврдат извори запознаени со ситуацијата.
Официјална Москва воспостави контакт со сириската бунтовничка организација Хајат Тахрир ал Шам (Hay'at Tahrir al-Sham) и се надева дека таа група ќе ги испочитува ветувањата за заштита на странските дипломати, изјави заменикот на рускиот министер за надворешни работи.
БЕРЗА
Европа
Фјучерсите на европските акции претежно се во црвено, по одлуката на ЕЦБ да ги намали каматните стапки. Таквиот потег на централната банка наиде на придушена реакција на пазарот, при што еврото и обврзниците на еврозоната задржаа скромни загуби.
САД
И фјучерсите на американските акции тргуваат со загуби, откако најновите податоци донесоа мешана слика за состојбата на економијата. Имено, бројот на барања за надоместоци за невработеност се зголеми повеќе од очекуваното, додека инфлацијата на големо забрза во ноември.
Американските берзи вчерашното тргување го завршија претежно во црвено, бидејќи посилниот раст на производствените цени го засени претходниот раст на акциите на технолошките компании. Повеќе за тоа дали пазарот на акции моментално е безбеден за инвестиции објаснува аналитичарката на „ЏП Морган“ (JPMorgan).
Азија
Акциите во азиско-пацифичкиот регион претежно се во црвено, бидејќи отсуството на нови детали од кинеската економска конференција ги разочара трговците, додека апетитот за ризик ослабе пред состанокот на американскиот Фед следната недела.
Акциите во Кина и Хонгконг паднаа бидејќи изостанаа детали за нови фискални стимулации, иако кинеските власти ветија дека ќе ја зголемат потрошувачката. Сепак, нивното ветување дека ќе ги намалат каматните стапки, како и стапките на задолжителни резерви за банките, доведе до тоа приносите на 10-годишните кинески државни обврзници да паднат под 1,8 проценти, и тоа првпат во историјата.
Нафта
Нафтата е подготвена да оствари неделен раст, под влијание на зголемувањето на шансите за воведување построги американски санкции кон Иран и Русија. Новите околности имаат потенцијал да го поттикнат растот на цената на нафтата, спротивно на досегашната упорна загриженост за значителното светско презаситување со оваа суровина следната година, што би ја намалило нејзината вредност.
Брентот беше стабилен над 73 долари за барел, што е раст од околу три проценти досега неделава, а ВТИ (West Texas Intermediate) беше близу 70 долари. Избраникот на Трамп за советник за национална безбедност вети враќање, како што рече, на „максимален притисок“ врз Иран, додека администрацијата на Џо Бајден разгледува нови санкции за трговијата со руската нафта пред тој да ја напушти Белата куќа следниот месец.
.webp){kind=icon}
