По 15 месеци конфликт, Израел и Хамас конечно постигнаа договор за примирје, што доведе до привремено прекинување на војната во Газа. Освен тоа, постојат навестувања дека се ближи крајот на другата војна што се води во светот - онаа меѓу Русија и Украина.
ПОЛИТИКА
Израел и Хамас договорија примирје
Израел и Хамас постигнаа договор за прекин на огнот, кој подразбира ослободување повеќе десетици заложници и привремено запирање на војната во Појасот Газа, која во последните 15 месеци однесе десетици илјади животи и предизвика поширока нестабилност на Блискиот Исток. Прекинот на огнот ќе стапи во сила в недела и ќе трае шест недели, потврдија катарски и американски официјални лица. Триесет и три заложници, кои беа заробени во нападот на Хамас врз Израел на 7 октомври 2023 година, ќе бидат ослободени, додека Израел ќе се повлече од населените области на Газа и ќе ослободи стотици палестински затвореници.
Да потсетиме, САД и другите земји од Г7 повеќепати го повикуваа израелскиот премиер Бенјамин Нетанјаху да направи повеќе за да ги заштити цивилите во Газа, што е причината поради која израелскиот лидер е баран под обвиненија за воени злосторства во Хаг.
Бајден и Трамп за примирјето во Газа
Заслугите за договорот веднаш ги презедоа и претседателот во заминување и новоизбраниот претседател на САД. Така, Доналд Трамп истакна дека станува збор за историски подвиг што е „резултат на неговата победа на претседателските избори во Америка“. Истовремено, Џо Бајден изјави дека примирјето е резултат на упорната и макотрпна американска дипломатија.
Се ближи крајот на војната во Украина?
Растат шансите годинава да заврши и војната во Украина. Тоа го изјави украинскиот претседател Володимир Зеленски. Таквиот исход, тврди тој, е можен поради влијанието на новоизбраниот американски претседател врз Русија. „Трамп навистина сака да ја заврши војната - тоа се неговите зборови. Тој е во состојба да изврши притисок и да влијае врз Русија“, рече Зеленски.
Бајден предупредува на опасностите од олигархијата
Во последното официјално обраќање од Белата куќа, претседателот во заминување предупреди на опасностите од „олигархијата“ и „трупањето неограничена моќ во рацете на богатите“. Тој порача дека екстремното богатство и влијание можат да ги загрозат демократијата и правата на граѓаните.
КОМПАНИИ
Додека се чека исходот од напнатата ситуација околу Тикток, американските политичари од двете главни партии бараат начини социјалната мрежа да опстои во САД. Да потсетиме, деновиве се шпекулира за продажба на Тикток на Илон Маск, а новоизбраниот американски претседател Доналд Трамп, кој стапува на должност на 20 јануари, се обиде да ја одложи забраната за да ја „зачува“ апликацијата, која инаку ја забрани за време на неговиот претходен мандат, пишува „Блумберг“.
Тој разгледува извршна наредба што би му дала меѓу 60 и 90 дена да најде решение, објави „Вашингтон пост“, повикувајќи се на неидентификувани извори. Апликацијата, во сопственост на кинеската компанија „Бајтденс“ (ByteDance Ltd.), има рок до 19 јануари да најде американски купувач за да продолжи да работи во земјата. Иако Тикток ја оспори забраната со жалба до Врховниот суд на САД, судиите за време на изнесувањето на аргументите на 10 јануари навестија дека веројатно ќе го поддржат законот што го потпиша претседателот Џо Бајден минатата година.
Bloomberg
БЕРЗИ
Европа
Фјучерсите на европските акции утрово се тргуваат претежно со добивки, пред објавувањето на записникот од декемвриската седница на Европската централна банка (ЕЦБ). Потсетуваме дека европските берзи во средата ги регистрираа најдобрите резултати во последните четири месеци, бидејќи инвеститорите ги израдува ладењето на инфлацијата во Америка и во Велика Британија.
САД
Фјучерсите на американските индекси исто така се тргуваат во зелено, откако најновите податоци за инфлацијата ги зголемија шансите за натамошно олабавување на монетарната политика од страна на Фед. Имено, основниот индекс на потрошувачки цени - кој ги исклучува трошоците за храна и енергија - порасна за 0,2 отсто во декември, што е прво забавување во последните шест месеци. На годишно ниво, растот изнесуваше 3,2 отсто, што е сè уште над целта на Фед од два отсто.
Сепак, последниот голем економски показател објавен под заминувачката администрација на Бајден покажува дека инфлацијата во декември скокнала на 2,9 отсто од 2,7 отсто во ноември.
Азија
Кога станува збор за акциите во азиско-пацифичкиот регион, и тие се претежно во зелено. Со добивки тргуваат клучните индекси во Австралија, Хонгконг и Јужна Кореја. Истовремено, јапонскиот јен зајакна, откако официјалните лица на Централната банка на Јапонија навестија можност за зголемување на каматните стапки следната недела.
.webp){kind=icon}