Доналд Трамп официјално стана претседател на Соединетите Американски Држави и веднаш по преземањето на функцијата започна со драстични потези. Тој воведе енергетска вонредна состојба, се заканува со високи царини, најави дека ќе прогласи вонредна состојба на јужната граница. Во тек е Светскиот економски форум во Давос, а денеска ќе зборуваат Урсула фон дер Лајен, Олаф Шолц, Володимир Зеленски...
Брентот утрово се тргуваше над 80 долари за барел, по три дена загуби.
ПОЛИТИКА
Трамп: Започнува златната доба на Америка
Доналд Трамп положи заклетва на церемонија во Капитол и официјално стана 47. претседател на Соединетите Американски Држави. Во првото обраќање по полагањето на заклетвата, Трамп порача дека златната доба на Америка започнува сега и дека ќе направи сè за да ѝ го врати суверенитетот на Америка. Трамп најави дека ќе прогласи „вонредна состојба“ на јужната граница и ќе започне процес на „враќање милиони криминалци и нелегални имигранти назад на местата од каде што дошле“.
Трамп ја одложи забраната за Тикток
Трамп, значи, не губеше време, бидејќи веднаш најави спроведување на голем број предизборни ветувања - од извршни наредби за имиграција и енергетика до трговски мерки и даноци. Така, меѓу другото, привремено ја запре забраната за Тикток (TikTok) во Америка, давајќи ѝ на матичната компанија „Бајтденс“ (ByteDance) повеќе време да најде купувач за својот бизнис во Америка. Трамп исто така потпиша наредба за помилување речиси на сите лица со кривични пријави поврзани со упадот во Капитол на 6 јануари 2021 година. Тој укина и 78 наредби од ерата на Бајден - кои се однесуваат на миграцијата и климата, потпиша извршна наредба во која се наведува дека САД се повлекуваат од Парискиот договор за климата, а подоцна во Белата куќа и директива што укажува дека САД ќе се повлечат од Светската здравствена организација.
Царини за Мексико и за Канада од 1 февруари?
Интересно е, сепак, што немаше никакви експлицитни уредби за царини, особено кога станува збор за Кина. Сепак, Трамп порача дека би можел да воведе тарифи за Мексико и за Канада до 1 февруари.
„Размислуваме за 25 проценти за Мексико и за Канада, бидејќи тие пуштаат огромен број луѓе“ во САД, рече Трамп одговарајќи на прашања од новинарите во Овалната соба во понеделникот вечер. „Мислам дека ќе го направиме тоа на 1 февруари“.
Плановите на Трамп за царини за двете земји, клучни за увоз на енергенти и автомобили во САД, се закануваат да предизвикаат трговска војна меѓу потписниците на договорот меѓу САД-Мексико-Канада, за кој се преговараше по инсистирање на Трамп, за време на неговиот прв мандат.
Давос во сенка на инаугурацијата на Трамп
Инаугурацијата на новиот американски претседател Доналд Трамп ја следеше деловната и политичката елита во Давос, каде што е во тек годишниот состанок на Светскиот економски форум. Воведната сесија на форумот беше посветена токму на новоизбраниот претседател на Америка. Забелешки за Трамп дадоа претставници на некои од водечките светски медиуми, кои се согласија дека вториот мандат на Трамп би можел да биде уште понестабилен од првиот.
Bloomberg
БЕРЗИ
Европа
Финансиските пазари мешано реагираа на инаугурацијата на Доналд Трамп и неговиот прв ден на функцијата претседател на Америка. Некои трговци беа задоволни што Трамп не најави сеопфатни царини за американските трговски партнери, додека други трговци изразија претпазливост во однос на можните идни мерки. И фјучерсите на европските акции утрово се колебаат меѓу добивки и загуби.
САД
Истовремено, фјучерсите на американските индекси се тргуваат со добивки. Имено, Волстрит колективно воздивна откако Доналд Трамп, првиот ден на функцијата, се откажа од воведување тарифи за Кина. Сепак, Трамп најави дека во блиска иднина би можел да воведе царини за Канада и за Мексико, што ја зголеми вредноста на доларот.
Bloomberg
Азија
Кога станува збор за акциите во азиско-пацифичкиот регион, тие претежно се во зелено. Кинеските акции предничеа по добивките во тој регион, откако Трамп не најави никакви нови царини за таа азиска земја. Јенот ги намали првичните добивки, бидејќи трговците се позиционираат за потенцијално зголемување на каматните стапки на Централната банка на Јапонија кон крајот на неделава.
НАФТА
Нафтата се колебаше меѓу добивки и загуби додека трговците ги разгледуваа ветувањата и извршните наредби на претседателот Доналд Трамп, вклучувајќи ја и заканата за царини за Канада и плановите за зголемување на домашното производство на енергија.
Брентот се тргуваше над 80 долари за барел, по три дена загуби, додека ВТИ (West Texas Intermediate) беше близу 77 долари.
Трамп воведе царини од дури 25 проценти за производителите на сурова нафта од Канада и од Мексико и потпиша наредба со која се прогласува национална енергетска вонредна состојба. Сепак, првиот ден на функцијата не откри тарифи наменети за Кина.
Bloomberg Mercury
.webp){kind=icon}