Почнува летниот ред на летање, а со тоа и нови авиолинии од Македонија

Со летниот распоред на летање што стапува во сила од полноќ, од Скопскиот аеродром ќе летаат 16 авиокомпании до 47 редовни дестинации, а три ќе сообраќаат со 10 чартер летови. На 2 април стартува летот на „Изиџет“ до Меѓународниот аеродром Скопје од аеродромот Орли во Париз, а од 3-ти мај, „Визер“ од Барселона и Лион. Од Охридскиот аеродром, пак, шест авиокомпании  ќе летаат на седум редовни линии, а ќе има и чартер лет од Манчестер.  

Од „ТАВ Македонија“ за МИА велат дека со летниот ред на летови имаат многу новости за патниците.

„Следната недела, на 2 април ќе го пречекаме првиот лет на 'Изиџет' до Меѓународниот аеродром Скопје од аеродромот Орли во Париз, што е важно поради две работи. Првата е дека аеродромот во Париз - Орли е управуван од 'Групацијата АДП' (Groupe ADP), групација во која 'ТАВ Аеродроми' е членка, а втората важна работа е дека од 2 април патниците на скопскиот аеродром ќе имаат бенефит да патуваат на еден од најфреквентните аеродроми во Франција, кој нуди бројни домашни и европски летови“, изјави за МИА, Неџат Курт, генерален директор на „ТАВ Македонија“.

Следни нови линии што од 3 мај ќе се воведат од Меѓународниот аеродром Скопје се Барселона и Лион, со „Визер“. Тоа, посочува Курт, е уште една одлична вест за патниците на скопскиот аеродром, особено во однос на повторното воведување на авиолинијата до Барселона, бидејќи е многу барана дестинација за патување.

До почетокот на летната сезона на, летови Меѓународниот аеродром Скопје доби две нови авиокомпании и две нови дестинации – „Трансавиа“ и „Изиџет“, додека аеродромот Св. Апостол Павле во Охрид како нова авиокомпанија ја доби „Туркиш ерлајнс“, која четири пати неделно го поврзува Охрид со Истанбул.

ТАВ Македонија

 

На Охридскиот аеродром вчера беше пречекан првиот лет од Истанбул на „Туркиш ерлајнс“, а на 2-ри месецов стартуваше авиолинијата Скопје – Амстердам на „Трансавиа“, нова авиокомпанија на македонскиот авијациски пазар, дел од групацијата „КЛМ Ер Франс“, која ќе лета до Шипхол, главниот авио центар во Холандија.

Според летниот распоред на летови на редовните авиолинии кои сообраќаат преку целата година, но и на сезонските, Скопскиот аеродром на располагање има 47 дестинации и 16 авиокомпании. Покрај 47-те редовни дестинации од скопскиот аеродром, три авиокомпании ќе сообраќаат со 10 чартер летови.

Од Охридскиот аеродром Св. Апостол Павле, пак, во текот на летната сезона на летови во 2025 година, шест авиокомпании ќе опслужуваат летови до Белград, Цирих, Амстердам, Истанбул, Виена, Дортмунд и Меминген.                      

Редовни и сезонски летови од Меѓународниот аеродром Скопје има до следниве дестинации: Атина, Белград, Истанбул, Бодрум, Измир, Анталија, Виена, Цирих, Базел, Загреб, Сплит, Париз, Варшава, Франкфурт, Берлин, Дортмунд, Фридрихсхафен, Хамбург, Минхен Меминген, Нирнберг, Штутгарт,  Карлсруе, Осло, Амстердам,  Ајндховен, Барселона, Болоња, Милано, Рим (Фјумичино и Чампино), Венеција Тревизо, Братислава, Брисел, Гетеборг, Малме, Лион, Малта, Љубљана, Лондон Лутон. Од Охридскиот аеродром Св. Апостол Павле, пак, во текот на летната сезона на летови во 2025 година, шест авиокомпании ќе опслужуваат летови до Белград, Цирих, Амстердам, Истанбул, Виена, Дортмунд и Меминген

  

„Дополнително, според последните информации што ги добивме како аеродромски оператор, ТУИ (TUI) ќе лета со еден чартер лет од Манчестер“, изјавија за МИА од „ТАВ Македонија“.

Како што најави неодамна во интервју за МИА  Курт, се очекува следниот месец да стартуваат работите  за модернизацијата на Аеродромот „Св. Апостол Павле“ во Охрид. Плановите се да се зголеми капацитетот на патничкиот терминал и да се обезбеди удобност за патниците кои ќе патуваат низ аеродромот, а за тоа ќе се инвестираат 2,7 милиони евра. Во тек на планираните активности авиосообраќајот нема да биде запрен. Модернизацијата на аеродромот е обврска на ТАВ, согласно Договорот за концесија на аеродромите. 

На двата аеродрома од почетокот на годинава се превезени 597.086 патници 

Изминатата, 2024 година, „ТАВ Македонија“ ја заврши со 3.174.484 превезени патници на Меѓународниот Аеродром Скопје и на охридскиот аеродром Св. Апостол Павле, што е зголемување од еден процент во однос на 2023 година. За годинава од компанијата очекуваат зголемувањето на бројот на патници да остане константно.

„Оваа година, со оглед на неодамнешното и идно проширување на авиолиниите од двата аеродрома, сезонските трендови на патување, особено за време на шпицот на летната сезона, маркетинг стратегиите на 'ТАВ Аеродроми' за привлекување нови авиокомпании и воведување нови авиолинии и владините политики, очекуваме зголемувањето на бројот на патници да остане константно, а сепак да се заснова на долгорочни модели на раст, бидејќи од минатата година темпото на пораст во авиосообраќајот на глобално ниво од темпо за закрепнување премина во структурно“, изјави Курт.

Вицепремиерот и министер за транспорт, Александар Николоски, на 10-ти месецов, по средбата со Јири Пос, претседател на Бордот на директори на aеродромот Вацлав Хавел - Прага, најави дека се разгледуваат можностите Скопје и Прага да се поврзат со авиолинија и да има нова авиолинија Охрид - Карлови Вари. 

Николоски во октомври лани најави дека годинава ќе бидат отворени шест нови авиолинии, со Дубаи, Барселона, Лион, Штутгард, Базел и Истанбул.

Владата во август лани усвои сет мерки за зголемување на бројот на патници и најави нова програма за периодот од 1 јануари годинава до 31 декември 2027 година во износ од 125 милиони денари (над два милиона евра) годишно или вкупно 375 милиони денари (скоро 6,1 милиони евра) за поддршка на авиосообраќајот. Променет е начинот на финансиска поддршка и субвенциите се доделуваат за авиодестинациии, наместо како претходно на авикомпании. Поддршката од седум евра по превезен патник од скопскиот аеродром се зголеми на девет евра, а на охридскиот аеродром наместо 4,5 евра како претходно се доделуваат 12 евра по превезен патник.

Од 1 јануари заклучно со 27 март преку Меѓународниот Аеродром Скопје и Аеродромот Св. Апостол Павле Охрид патувале 597.086 патници и биле реализирани 4.933 летови. Во текот на зимската сезона 2024/2025 година, од 24 октомври лани до 19 март годинава, се превезени вкупно 1.034.562 патника и реализирани се 8.479 летови.

 

Во моментов нема коментари за веста. Биди прв да коментира...

Остави коментар