Ненадејното заминување на Клаус Шваб од Светскиот економски форум - СЕФ (World Economic Forum / WEF), влијателната организација што ја основа и ја водеше повеќе од половина век, ги искомпликува внимателно испланираните обиди Кристин Лагард незабележливо да го преземе кормилото, наведуваат лица запознаени со тие разговори.
Шваб (87) првично имал намера да остане на функцијата до почетокот на 2027 година, истата година кога завршува мандатот на Лагард како претседателка на Европската централна банк, но минатиот месец се повлече среде обвинувања за финансиски нерегуларности и конфликти со директорите на Форумот. Тој ги негира сите обвинувања, пишува „Блумберг“.
Додека се соочува со последиците од заминувањето на Шваб, одборот на СЕФ и понатаму ја гледа Лагард како главен кандидат и од моментот на оставката на Шваб води внатрешни разговори на таа тема, според анонимен извор. Проблемот е што Лагард има уште повеќе од две години мандат на чело на Европската централна банка и претходно изјави дека ќе го отслужи докрај.
ПОЛИТИКА
Рубио: Потребна е средба меѓу Трамп и Путин
Американскиот државен секретар Марко Рубио изјави дека се мали шансите за прекин на огнот во Украина доколку не дојде до директна средба меѓу рускиот претседател Владимир Путин и американскиот лидер Доналд Трамп. Рубио, кој денеска патува за Истанбул, нема да учествува во преговорите меѓу Русија и Украина, туку на нив, како што е соопштено, ќе учествува друг член на американската делегација. Потсетуваме и дека Трамп изјави дека би можел да отпатува на преговорите меѓу Русија и Украина во Турција „доколку биде соодветно“.
ЕКОНОМИЈА
Дајмон: Рецесија во Америка сè уште е можна
„Рецесијата во САД сè уште е реална можност поради пазарните потреси предизвикани од трговските мерки на администрацијата на Доналд Трамп“, изјави извршниот директор на „ЏП Морган“ (JP Morgan Chase), Џејми Дајмон. Тој на годишната конференција на банката што ја води, во Париз, предупреди дека – иако постои надеж дека рецесијата ќе се избегне – не треба да се исклучи такво сценарио.
БЕРЗИ
Европа
Со фјучерсите на европските акции во утрово се тргува со добивки, со што се продолжи растечкиот тренд од четвртокот. Потсетуваме, европскиот референтен индекс Stoxx 600 го заврши тргувањето во четвртокот со раст од 0,56 отсто. Најголеми добивки имаа акциите на компании од одбранбениот сектор, откако новиот германски министер за одбрана изјави дека го поддржува повикот на Трамп до членките на НАТО да издвојат пет отсто од својот БДП за трошоци за одбрана.
САД
Со фјучерсите на американските индекси утрово исто така се тргува во „зелено“, по серија мешани економски податоци. Имено, производствените цени во САД неочекувано паднаа во април – за 0,5 отсто, што е најголем пад во последните пет години. Истовремено, одделни податоци укажуваат на забавување на растот на малопродажбата, додека фабричкото производство падна за првпат во последните шест месеци.
Азија
Со акциите во азиско-пацифичкиот регион се тргува мешано. Па така, акциите на Тајван и во Австралија пораснаа, додека во Јужна Кореја, Кина и Јапонија беа регистрирани падови. Истовремено, БДП на Јапонија падна за првпат во една година, што укажува на слабост на економијата дури и пред целосниот ефект од царинските мерки на Трамп.
.webp){kind=icon}
