Неделен преглед: Нов обид за мир во Украина и нови тензии со Кина

По успешното посредништво за крај на двегодишниот конфликт на Блискиот Исток, иако и таму тешкиот дел допрва следува, Трамп повторно го враќа фокусот на војната што близу четири години се води на европско тло. Тој најавува втор состанок со Путин во Будимпешта откако вчера, по третпат годинава, се сретна со Зеленски во Вашингтон. Пред средбата со американскиот, украинскиот претседател напиша на Х дека земјата ја сработила домашната, и воено и економски, и подготвила список со ветувањата за Трамп. 

И додека траат процесите за смирување на војните со оружје, трговската војна се разгорува. Распродажбата што почна во петокот, откако Кина најави блокада на ретките метали, збриша милијарди. По потегот на Пекинг, Трамп се вознемири и најави 100 отсто царини за Кина. Потоа Кина најави дополнителни ограничувања, а Трамп се закани со царини и за маслото. Агресивните потези на Шји беа во центарот на вниманието на годишните состаноци на Светската банка и ММФ во Вашингтон, каде што лидерите бараа алтернативи за кинеските производи. Министерот за финансии на САД сака примирје, а ММФ предупредува на ризиците поради овој судир. „Морган Стенли“ предупреди на пад на индексот S&P 500 до 11 отсто поради трговската војна. 

Прочитајте повеќе:

Постојат четири вида земји: развиени, неразвиени, Јапонија и Аргентина

Неочекуван сојузник во битката против отпорноста на антибиотици

Игри на суперлуѓе: Експеримент што ја брише границата меѓу допингот и спортот

Во земјава ноќеска на полноќ почна изборниот молк пред утрешните локални избори. Кампањата остави многу работи недовршени. Уште не е донесен законот што ќе го регулира данокот на јаглерод, кој стапува во сила од 1 јануари 2026 година. Не се донесени ни подзаконските акти што треба да овозможат целосна примена на меѓународните сметководствени стандарди што се веќе во сила.  

Се чека и решението за ДДВ за становите – дали ќе остане 5 отсто или ќе се качи на 18 отсто. Градежниците предупредуваат дека зголемување на стапката ќе падне на товар на купувачите во услови на најбрз раст на цената на квадратен метар во последните две и пол децении. Кога станува збор за другите цени, експертите во анкетата на Народната банка велат дека очекуваат забрзување на инфлацијата во Македонија. 

Неделава беше објавено дека хрватската држава влегува во Македонската берза, а Македонија може да учи од Хрватска како се собираат милиони преку берза.  

Конечно оваа недела „Стопанска банка Битола“ доби нов сопственик - српската „Алта банка“, со што успешно заврши процесот на аквизиција со сите регулаторни согласности. 

Објавивме истражување според кое македонските телеком-компании се меѓу оние со најбрз мобилен интернет во Европа. Анализиравме и за што го користат Македонците брзиот интернет.  

Прочитајте повеќе:

Мали компании со визија: Како „Скуп“, „Туф“ и „Чиа диа“ го освојуваат светот

Што сѐ има на располагање Македонија од ЕУ-фондовите?

Златото не запира со постигнувањето нови ценовни рекорди, а расте и цената на среброто. Металите останува безбедно засолниште во услови на ескалација на трговските тензии, но ние анализиравме сценарио во кое златото веќе не блеска. Понудивме три идеи како да го заштитите портфолиото.

Познат милијардер вели дека вештачката интелигенција нема да донесе драматични промени во финансиската индустрија, а нашите аналитичари предупредуваат дека сегашниот раст на акциите на технолошките гиганти носи препознатливи симптоми на прегреан пазар односно дека пазарот веќе не дише со полни гради, затоа ви понудивме три стратегии за заштита на капиталот во случај акциите за вештачка интелигенција да паѓаат.  

Неделава биткоинот се бореше да закрепне по историскиот пад. Трговците стравуваат од трајни последици по крахот на криптото од 131 милијарда долари.