Бесент сака трговско примирје со Кина

Министерот за финансии на САД, Скот Бесент, ја отвори можноста за продолжување на паузата на увозните давачки за кинеските производи на период подолг од три месеци доколку Кина го стопира својот план за воведување строги нови ограничувања на извозот на ретки метали.

САД и Кина од почетокот на годинава имаат договорено серија тримесечни примирја, а следниот рок истекува во ноември.

„Можно ли е да одиме кон подолг рок доколку Кина се откаже од планот за ограничување на извозот? Можеби. Но сето тоа ќе се договара во наредните недели“, изјави Бесент на прес-конференција во Вашингтон.

По неколку месеци релативна стабилност во односите меѓу САД и Кина, тензиите повторно се зголемија во последните недели, откако Вашингтон го прошири опсегот на технолошките ограничувања и предложи давачки за кинеските бродови што влегуваат во американски пристаништа. Кина реагираше со реципрочни мерки и најави построги контроли на извозот на ретки метали и други стратешки материјали.

Економистите ги толкуваат најновите потези на двете страни како обид да си обезбедат преговарачка предност пред очекуваната средба на лидерите што треба да се одржи овој месец, во рамките на самитот на АПЕК во Јужна Кореја.

Во меѓувреме примирјето во трговската војна – во која американските давачки достигнаа и до 145 проценти – треба да истече на 10 ноември, освен ако не биде продолжено.

На новинарско прашање дали двете најголеми економии во светот се движат кон долготрајна трговска војна доколку не постигнат договор, претседателот Доналд Трамп одговори: „Па, веќе сте во една“.

„Имаме царини од 100 проценти, ако немавме царини, ќе изгледавме немоќно“, изјави Трамп

Американските берзи продолжија да растат по изјавите на Бесент, додека коментарите на Трамп беа дадени по затворањето на тргувањето во Њујорк. Во раното тргување во Азија во четвртокот, фјучерсите на берзанските индекси укажуваа на раст во Шангај и Токио, додека оние за Хонгконг бележеа пад.

Американскиот трговски претставник Џејмисон Грир изрази сомнеж дека Пекинг навистина ќе го спроведе својот план, оценувајќи дека тоа би ја задушило трговијата со широк спектар на потрошувачки производи што содржат дури и минимални количества на ретки метали.

„Опсегот и размерот се едноставно незамисливи и неизводливи“, изјави Грир.

Во меѓувреме Бесент најави дека ќе следува координиран одговор на потегот на Кина од страна на САД и неколку сојузници.

„Ќе имаме севкупен заеднички одговор на тоа, бидејќи кинеските бирократи не можат да управуваат со синџирите на снабдување или производството за остатокот од светот“, изјави тој. 

„Ќе разговараме со нашите европски сојузници, со Австралија, Канада, Индија и азиските демократии.“

Новите правила на Кина, објавени минатата недела, предвидуваат странските компании да мораат да добијат одобрение од кинеската влада пред извоз на производи што содржат дури и траги од одредени ретки метали што потекнуваат од Кина.

Претседателот Доналд Трамп реагираше со закана дека ќе воведе дополнителна царина од 100 проценти на кинеските производи до 1 ноември. Тој исто така ја спомена можноста да го откаже планираниот состанок со претседателот Шји Џјинпинг и предупреди дека САД би можеле да ја прекинат трговијата со растителното масло, клучна состојка во производството на биогорива.

Кина располага со речиси половина од светските резерви на ретки метали

Bloomberg

Министерот за финансии изјави дека, според неговите информации, претседателот Трамп „е подготвен“ за средба со Шји во Јужна Кореја, додавајќи дека постои „многу добра шанса“ тој да отпатува во Азија пред Трамп и да се сретне со својот кинески колега, потпретседателот Хе Лифенг.

Посета на Азија

Бесент изјави дека очекува да бидат објавени трговски договори за време на азиската турнеја на Трамп. Претседателот најпрво треба да присуствува на самитот на АСЕАН во Малезија, а потоа ќе отпатува во Јапонија и Јужна Кореја, која ќе биде домаќин на годишниот самит на лидерите на АПЕК.

Тој додаде и дека САД се „при крај“ со преговорите со Јужна Кореја, кои во последно време се фокусирани на рамката на голема инвестициска програма. Според него, разговорите со Канада се „вратени на вистински пат“, а има напредок и во односите со Индија.

Бесент ја отфрли тезата дека падот на берзите би можел да ја натера администрацијата на Трамп на преговарачка позиција со Пекинг, нагласувајќи дека таквите разговори се водат исклучиво од економски интерес.

„САД нема да преговараат со Кина затоа што берзата паѓа“, изјави тој.

Тој исто така ја отфрли и тезата дека растот на цената на златото укажува на некаква фундаментална загриженост во однос на доларот. Бесент потсети дека каматните стапки во САД се намалени во споредба со другите економии и додаде дека еврото „треба да биде силно“, бидејќи, според економската теорија, кога е во тек фискална експанзија, логично е да дојде до зајакнување на девизниот курс.

„Дрзок“ функционер

Бесент во средата остро го критикуваше кинескиот заменик-министер за трговија Ли Ченганг, повикувајќи се на неговите изјави дадени при посетата на Вашингтон во август. Тој рече дека Ли се појавил „без покана“ и дека бил многу арогантен со неговите жестоки изјави.

Според Бесент, Ли предупредил дека Кина ќе „предизвика глобален хаос“ доколку САД ги спроведат плановите за наплата на пристанишни такси за кинеските бродови. „Можеби мисли дека е дипломат ‘воин-волк’“, рече тој, алудирајќи на изразот што се користи за агресивните кинески дипломати.

Бесент исто така рече дека Кина првично го оправдала доцнењето во испораките на магнети од ретки метали со државен празник – објаснување што, според него, покажува дека „на Кина не може целосно да ѝ се верува кога станува збор за глобалниот синџир на снабдување“.

„Ако Кина избере да биде непостојан партнер за остатокот од светот, тогаш светот ќе биде принуден да се дистанцира“, изјави тој. „Светот не сака раздвојување“, додаде тој. „Сакаме само да ги намалиме ризиците. Но ваквите сигнали од Пекинг водат токму кон раздвојување – нешто што, според нас, не е во интерес на Кина.“