Лекорну доби клучна поддршка од социјалистите пред гласањето за недоверба

Францускиот премиер Себастијан Лекорну доби клучна поддршка од Социјалистичката партија во Националното собрание на Франција, што значително ги подобри шансите за опстанок на неговата нова влада, која в четврток ќе се соочи со гласања за недоверба.

Социјалистите, кои имаат влијание во Долниот дом на парламентот, изјавија дека нема да гласаат за уривање на Лекорну, откако тој предложи привремено суспендирање на законот за пензии што ја зголемува старосната граница за пензионирање – услов за нивната поддршка.

„Правиме облог, ризичен облог“, изјави Борис Вало, лидер на социјалистите во Долниот дом, за време на своето обраќање во вторникот. „Ако сите сме посветени на Републиката, мора да се обложиме на тоа да понудиме фер буџет за земјата.“

По повикот на францускиот претседател Емануел Макрон за предвремени избори минатата година, Националното собрание е фрагментирано, а централната власт ослабена. Ниту една политичка група нема мнозинство, но социјалистите имаат доволно места за да бидат клучни при гласањето за недоверба.

Во исто време, приносот на француските 10-годишни обврзници падна за седум базични поени, на 3,40 отсто, што е најниско од средината на август. 

Индексот CAC 40 ја заврши сесијата со пад од 0,2 отсто, откако го врати поголемиот дел од загубите што ги имаше во текот на денот. Индексот падна за 1,4 отсто во раните тргувања.

Што вели „Блумберг економикс“ (Bloomberg Economics): 

„Суспензијата на реформата за пензии до 2027 година може да биде фискално скапа, но може да ја намали политичката несигурност, што претставува клучен ризик за економијата во 2026 година“, нагласуваат економистите Жан Далбар и Антонио Баросо.

Лекорну направи отстапка по однос на законот за пензии, бидејќи неговата премиерска позиција е на стаклени нозе. Тој поднесе оставка осум дена претходно, поради кавги во кабинетот, но прифати нов мандат во петокот. Макрон му даде целосна слобода да ги води напорите за излез од кризата.

Националистичката партија на Марин Ле Пен, како и левицата, порачаа дека ќе се обидат да го соборат Лекорну со гласање за недоверба што ќе се одржи в четврток.

„Некои сакаат оваа парламентарна криза да прерасне во криза на режимот“, изјави Лекорну. „Но тоа нема да се случи благодарение на институциите на Петтата Република и нивните поддржувачи.“

Макрон ја губи контролата врз власта

Контролата на Макрон врз политичката сцена значително ослабе откога се одржаа предвремените избори минатата година, што резултираше со фрагментирано Национално собрание, со блокови што не можат да се усогласат.

Законодавците веќе принудија двајца претходни премиери – Мишел Барние и Франсоа Бајру – да поднесат оставки поради нивните планови за намалување на буџетскиот дефицит, кој стана најголем во еврозоната. Ако Националното собрание го урне Лекорну оваа недела, Макрон им кажал на министрите дека тоа би било исто како да се поднесе „молба за распуштање на парламентот“, што би можело да доведе до нови избори.

Лекорну изјави дека неговата единствена цел е да го донесе буџетот за Франција, но призна дека ќе мора да им овозможи на законодавците поголемо влијание врз законот и други политики за да спречи нов пад на владата.

„Франција мора да има буџет, бидејќи постојат итни мерки што мора да се преземат без одлагање“, изјави Лекорну во вторникот.

Bloomberg

Предлог-буџетот што беше презентиран во парламентот во вторникот има цел да го намали дефицитот на 4,7 отсто од 5,4 отсто оваа година. Две третини од корекцијата се засновани на мерки за намалување на трошоците, вклучувајќи непопуларни замрзнувања на пензии и социјални плаќања.

Проектот вклучува и продолжување на привременото зголемување на корпоративниот данок за најголемите компании, данок за највисоките заработувачи, како и нов данок на богатството во холдинг-компаниите. Владата очекува да собере 6,5 милијарди евра од овие мерки.

Лекорну изјави дека законодавците имаат слобода да ги менуваат овие планови, но дека резултирањето со дефицит поголем од 5 отсто од економскиот резултат не треба да биде прифатливо.

„Вашиот текст може да биде изменет и ние ќе го направиме тоа“, изјави Вало. „Вашата почетна линија нема да биде наша крајна цел.“

Во последните недели сојузниците на Макрон, вклучувајќи ја и поранешната премиерка Елизабет Борн, ги повикаа Лекорну и Макрон да попуштат пред барањата на опозицијата. Економистот Филип Агјон, кој го советуваше Макрон за економската програма за изборите во 2017 година и оваа недела ја доби Нобеловата награда, исто така рече дека промените треба да бидат ставени на чекање до изборите во 2027 година.

„Едноставно, треба да се стопира часовникот за една година“, рече тој во понеделникот на француската телевизија. „Не знам дали зборот ’суспензија’ е страшен, но јасно е дека тоа е потребно, тоа е начин да се смири ситуацијата.“

Целосна суспензија ќе чини 400 милиони евра во 2024 година и 1,8 милијарда евра во 2027 година, според Лекорну.

„Живееме и ќе продолжиме да живееме во време на криза“, изјави Лекорну. „Можеме да страдаме поради тоа или да го искористиме тоа во наша корист. Можеме да се промениме или да бидеме променети.“