Кинески луксуз по цена од 115.000 евра: Зошто ни Џејмс Бонд не може да продаде „Денца“ во Европа?

Како што слабее домашната побарувачка, кинеските производители на луксузни автомобили би требало агресивно да ги туркаат своите модели на странските пазари, на ист начин како што тоа го прават нивните брендови од масовниот сегмент. Но, наплатата на трипати повисока цена отколку на домашниот пазар, како што направи „БЈД“ (BYD) при претставувањето на својот најнов луксузен модел во Европа, не е вистинскиот пристап, дури и ако актерот Даниел Крег е заштитно лице на кампањата.

Британската ѕвезда беше ангажирана да го промовира „Денца З9ГТ“ (Denza Z9GT) на неговата премиера во Париз минатиот месец. Претставен, според некои, како електричен автомобил со најдолг досег во светот, самиот автомобил е многу убедлив производ. Батеријата од втората генерација овозможува полнење од пет минути за досег од околу 400 милји. Други карактеристики што го вбројуваат во повисоката класа вклучуваат забрзување до 100 километри на час за помалку од три секунди и независно управување со задните тркала за прецизни маневри, вклучително и вртење во место и странично паркирање.

Топ пет кинески производители на премиум автомобили

 

Вкупната продажба е повисока за 24 отсто во однос на претходната година/CATARC, Bloomberg Intelligence

Новиот „Денца“ е дел од бранот претставувања на премиум модели, клучен тренд на саемот „Ауто Чајна 2026“ во Пекинг, кој заврши во неделата, на 3 мај. Луксузниот сегмент опфаќа автомобили што чинат од околу 300.000 јуани, односно 44.000 долари. Тоа е приближно цената на просечно возило во САД или Европа. Но, во Кина тоа е доволно за модел со високи перформанси, големи екрани, напреден систем за паметно возење, простран ентериер и едноставно поврзување со мобилни телефони. Реакциите од странство на овие автомобили главно се позитивни, а понекогаш и повеќе од тоа.

Дали овие луксузни брендови ќе се продаваат успешно во странство, останува да се види. Домашните производители повеќе не се само нискобуџетни предизвикувачи, туку го редефинираат премиум сегментот. Но, она што им недостига е силата на брендот, таа неопиплива вредност што ги тера луѓето да платат повеќе. Претходно тврдев дека „БЈД“ треба да влезе во Формула 1 за да изгради репутациска вредност и, на крајот, моќ за диктирање цени. Но, тоа е долготраен процес.

Кинеските автомобили и натаму првенствено се познати по добриот однос меѓу цената и квалитетот. Затоа имаше многу подигнати веѓи кога „Денца“ во Германија и Франција беше промовиран со цена од 115.000 евра, приближно исто колку „Порше Панамера“ (Porsche Panamera), спортски автомобил со четири врати. На домашниот пазар, почетниот модел З9ГТ чини околу 40.000 долари.

„БЈД“ Денца З“ електрично возило на Саемот за автомобили во Пекинг/Qilai Shen/Bloomberg

Секако, европската цена мора да биде повисока поради даноците и дополнителните трошоци. Стандардната царина за увоз на автомобили изнесува 10 отсто, плус дополнителни 17 отсто за возилата на „БЈД“ како дел од посебните царини за компанијата. Тоа заедно би значело зголемување на основната цена за околу 10.000 долари. Додавањето уште 30.000 долари за различни трошоци како сертификација и разумна профитна маржа би ја довело цената до околу 80.000 долари, односно 70.000 евра, што и понатаму би било поволно со оглед на техничките карактеристики на возилото.

„БЈД“ зазеде спротивен пристап. Со високата цена ѝ порачува на светската јавност дека неговите производи се подеднакво добри како етаблираните западни брендови. Иако привлекува внимание, оваа стратегија е спротивна на она што го нудат кинеските производители: напредна технологија со побрзо темпо и пониска цена. Сепак, пораката е привлечна во регион што се соочува со криза на животните трошоци.

Ваквиот пристап веќе успеа кај моделите од масовниот сегмент. Пред пет години кинеските автомобили имаа минимален удел на европскиот пазар, според Џулијан Лицинџер од „Датафорс“ (Dataforce). Но, тие забележаа метеорски раст. Минатата година кинеските брендови ги надминаа американските и јужнокорејските ривали. Во март заостануваа само четири процентни поени зад јапонските производители.

Кинеските производители ги надминаа американските и јужнокорејските ривали во Европа

 Dataforce

Подостапните модели го вклучуваат „Џеку 7“ (Jaecoo 7) на „Чери аутомобил“ (Chery Automobile) со цена од 35.000 фунти, односно 47.000 долари, кој поради сличниот дизајн и подостапната позиционираност беше наречен „Тему Ренџ Ровер“. Друг пример е плаг ин хибридот „БЈД Сил“ (BYD Seal U DM-i), кој е околу 10.000 фунти поевтин од споредлив модел на „Фолксваген“ (Volkswagen).

Кинеските премиум брендови сè уште немаат изградено посериозно присуство во Европа и во март учествувале со само 0,4 отсто во вкупната продажба, според „Датафорс“ (Dataforce). Но, со правилна маркетинг и ценовна стратегија, тоа може да се промени. Тоа би отворило важен нов простор за раст во период кога домашниот замав слабее.

Домашната побарувачка слабее

China Passenger Car Association, S&P Global Ratings

Уделот на луксузните автомобили на кинескиот пазар стабилно се удвојувал меѓу 2017 и 2022 година. Но, по достигнувањето на врвот кратко потоа, почнал да опаѓа, според анализата на „С&П“ (S&P Global Ratings) и податоците на кинеското здружение на производители на автомобили. Приближно во исто време, побарувачката за основни модели во ценовниот опсег од 50.000 до 100.000 јуани пораснала по повеќегодишен пад. Овие купувачки навики се последица на колапсот на пазарот на недвижности, што доведе до пад на довербата кај потрошувачите.

Тоа е дополнителна причина за барање нови пазари. Европа, домот на најексклузивните производители на автомобили во светот како „Ауди“ (Audi), „БМВ“ (BMW), „Мерцедес-Бенц“ (Mercedes-Benz) и „Порше“ (Porsche), е исклучително тежок пазар за освојување. Ангажирањето познато лице како Даниел Крег беше добар потег, но мора да биде проследено со попромислена ценовна стратегија. Намалувањето на цената на новиот модел „Денца“ би било добар почеток.