„Ферари“ го претстави првиот целосно електричен автомобил. Цена: 550.000 евра

„Ферари“ го претстави својот прв целосно електричен автомобил, модел со пет седишта со цена од 550.000 евра, што претставува голем пресврт во однос на досегашното наследство на производителот на спортски автомобили.

Презентацијата одржана во Рим во неделата претставуваше завршна фаза од триделното претставување на електричното возило наречено „ферари луче“ (Ferrari Luce), кое започна минатата година со прикажување на основната технологија на автомобилот, а подоцна и ентериерот. Акциите на „Ферари“ паднаа и до 7,8 отсто за време на раното тргување во Милано, што укажува дека инвеститорите се разочарани од изгледот на моделот „луче“.

„Луче“ развива над 1.000 коњски сили и до 100 километри на час стигнува за 2,5 секунди, побрзо од теренецот на „Ферари“, „пуросангве“ со V12 мотор. Максималната брзина надминува 310 км/ч.

Инвеститорите разочарани од изгледот на моделот „луче“, акциите паѓаат Ferrari

Појавата на овој модел следуваше откако „Ферари“ минатата година ги претстави долгорочните цели што ги разочараа инвеститорите и отворија прашања за тоа како компанијата ќе балансира електрична технологија со модели со мотори со внатрешно согорување, кои и понатаму остануваат централен дел од идентитетот на брендот. Планот на „Ферари“ за 2030 година го преполови очекуваниот удел на целосно електрични возила на 20 отсто од понудата, додека целта за модели со мотори на гориво е поставена на двојно повисоко ниво.

Сериозен тест за „Ферари“

Развиен во соработка со Џони Ајв и Марк Њусон од „Лав форм“ (LoveFrom), креативниот колектив основан од поранешниот директор за дизајн на „Епл“ (Apple), „луче“ со своите мазни површини и минималистички детали го одразува влијанието на Ајв и претставува оддалечување од традиционално мускулестиот дизајн на „Ферари“.

„Луче“ изгледа како „мешавина од 'хонда акорд ЕВ' и 'тесла модел 3'“, напиша Пјер Оливие Есиг, директор за истражување во АИР (AIR Capital). „Изгубени сме во превод со новата стратегија на 'Ферари', која се обидува да го имитира дизајнот на 'Епл'.“

„Луче“ претставува важен тест: „Ферари“ мора да покаже дека електричен автомобил може да се вклопи во неговиот модел на ограничено производство, високи цени и емотивна привлечност, додека истовремено ја шири понудата надвор од традиционалните спортски автомобили со две и четири седишта. Цената на возилото сугерира дека извршниот директор Бенедето Виња нема намера да ја жртвува ексклузивноста на брендот за да го зголеми обемот на продажба.

Компанијата од Маранело донесе над 200 претставници на медиумите во Рим за својата глобална промоција Ferrari

„Луче“ ќе покаже дали формулата на италијанскиот производител функционира и без звукот на мотор со внатрешно согорување, особено во момент кога секундарната вредност на електричните возила сè уште претставува проблем за богатите купувачи кои бараат суперавтомобили чија вредност ќе остане стабилна или дури ќе расте со текот на времето.

„Ламборгини“ го одложи својот прв електричен модел, што покажува колку им е тешко на луксузните производители да ги убедат купувачите да се откажат од звукот и чувството на мотор со внатрешно согорување.

„Ферари“ повеќепати нагласи дека ќе продолжи да им нуди на клиентите избор помеѓу мотори со внатрешно согорување, хибридни и електрични погонски системи. Стратегијата на компанијата и понатаму е фокусирана на комбинација на производи, персонализација и дисциплинирана распределба на производството, а не на зголемување на бројот на продадени автомобили.

Таа дисциплина е клуч на бизнис моделот на „Ферари“. Како луксузни компании како „Хермес“ и „Ролекс“, „Ферари“ со години се потпира на листи на чекање и строго контролирана понуда за да ја заштити ексклузивноста. Ограничената достапност не е нуспроизвод на бизнисот, туку алатка со која „Ферари“ ја поддржува побарувачката и цените.

Овој модел го заштити „Ферари“ од проблемите со кои се соочуваат европските производители со поголем обем на производство, кои се борат со налетот на поевтини кинески електрични возила. Италијанската компанија денес има најголема пазарна вредност меѓу европските производители на автомобили, иако произведува помалку од 14.000 возила годишно  - далеку под речиси девет милиони на „Фолксваген“. Сепак, акциите на „Ферари“ паднаа 27 отсто во последните 12 месеци поради загриженост околу глобалната побарувачка за луксузни производи.

Ентериер на возилото Ferrari

„Ферари“ го претстави „луче“ не како отстапка од регулативата или конкуренцијата, туку како обид да докаже дека електричната технологија може да понуди перформанси и карактер што ги очекуваат љубителите на брендот. Пораката на компанијата е дека електрификацијата треба да донесе нови можности во дизајнот и возењето, а не само да го замени моторот со батерија.

„'Ферари луче' не е одговор на промените“, изјави извршниот претседател Џон Елкан за време на презентацијата во неделата. „Тоа е свесна одлука да водиме во она што доаѓа следно.“

„Ферари“ за претставувањето на моделот „луче“ избра симболичната локација: „Вела ди Калатрава“ (Vela di Calatrava), структура во облик на едро што ја дизајнирал шпанскиот архитект и инженер Снтијаго Калатрава, во населбата Торе Вергата недалеку од Рим.

Амбиентот одговараше на големината на претставувањето. „Ферари“ доведе повеќе од 200 новинари од целиот свет во Рим за тој настан. Компанијата организираше две гала вечери во понеделник и вторник, со по 800 гости на секој настан. Купувачите можеа да започнат со нарачки од понеделник.

Промена на стилот

Необичната употреба на стакло е една од клучните карактеристики на моделот „луче“. „Ферари“ го опишува како „стаклена куќа“, форма налик на школка што се протега под линијата на каросеријата сè до рабовите на автомобилот.

Електричниот модел се оддалечува од визуелниот стил поврзан со директорот за дизајн на „Ферари“, Флавио Манцони, чиј дизајн најчесто комбинира мускули и елеганција по кои се препознатливи автомобилите од Маранело. „Луче“ е поелегантен и поедноставен, но и покласичен: неговата стаклена и минималистичка форма е поблиска до стиловите што стануваат сè почести кај електричните возила.

И покрај технологијата што „Ферари“ ја има вградено во „луче“, првиот впечаток изгледа прилично воздржан Ferrari

Тоа дополнително го зголемува притисокот врз возачкото искуство. И покрај технологијата вградена во „луче“, првиот впечаток делува прилично воздржано. „Ферари“ се обложува дека агилноста, звукот и реакциите на автомобилот ќе го направат она што самиот дизајн можеби не може  - да создаде чувство дека електричен автомобил со пет седишта недвосмислено е „ферари“.

„Мораше да почнеме од 'Ферари', а не од електричната технологија“, изјави Виња. „Мораше да почнеме од човечката димензија.“

„Луче“ го движат четири електромотори, по еден за секое тркало, и високонапонски батериски пакет дизајниран и произведен во Маранело.

Електричната платформа му овозможи на „Ферари“ првпат да вгради пет седишта, нешто што не беше можно со традиционалната конфигурација. „Луче“ ќе има и багажник од 600 литри, доволно за две торби за голф или три големи куфери.

Форматот на автомобилот е поблизок до електрични ГТ модели со високи перформанси како „порше тајкан“, отколку до електрични хиперавтомобили со две седишта, иако луксузната позиција на „Ферари“ и моделот на ексклузивност го прават споредувањето несовршено. Повеќето верзии на „тајкна“ чинат значително помалку од очекуваната цена на „луче“.

Звукот претставува уште еден клучен предизвик. „Ферари“ наведува дека поминал пет години и 40.000 километри тестирање на патека за да го развие акустичниот карактер на автомобилот. Наместо синтетичко имитирање на звук на мотор со внатрешно согорување, компанијата користи сензор на задната оска што го регистрира звукот на електромоторите, а потоа го обработува и засилува.

Таквиот пристап е осмислен за да одговори на една од главните дилеми околу електричниот „ферари“: дали бренд историски дефиниран од звукот на своите мотори може да ја задржи емоционалната поврзаност без звук на мотор со внатрешно согорување.