.webp){kind=icon}
Редакцијата на „Блумберг Адрија“ состави листа на Топ 50 луѓе од регионот што ја обележија 2023 година. Меѓу нив се најде и Игор Стефановски-Иџе, европски шампион на ридско-планински патеки.
Најдобриот македонски автомобилист лани ја освои третата европска титула во кариерата, а неодамна стана и првиот возач од Балканот што доби поддршка директно од „Ферари“ (Ferrari). Стефановски е и првиот натпреварувач од Стариот Континент што со овој бренд ќе се натпреварува на претстојниот Европски шампионат во ридско-планински патеки на Меѓународната автомобилска федерација - ФИА (Fédération Internationale de l'Automobile).
Игор Стефановски-Иџе
Преговорите за оваа историска соработка со светски познатиот производител на луксузни автомобили траеле долго.
„Неколкуте средби во Италија, заедно со мојот тим, и повикот од нивна страна за тестирање на автомобилот дадоа плод и добив шанса да бидам првиот Македонец што ќе влезе во семејството на ’Ферари’ и доследно ќе го претставува брендот на ова елитно натпреварување“, вели Стефановски за „Блумберг Адрија“.
Неговиот нов „службен“ автомобил е „ферари 488 челинџ ево“ (Ferrari 488 Challenge Evo). Тој е придвижуван од моќен 3,9-литарски турбо V8 агрегат, располага со 670 коњски сили и со 760 Nm максимален вртежен момент. Сето тоа е доволно за забрзување до 100 километри на час за помалку од три секунди, пред да достигне максимална брзина од 340 километри на час.
Игор Стефановски-Иџе
Овој модел е лимитиран на 199 парчиња, а почетната цена му е 350.000 евра. Автомобилот на Иџе, кој неговите обожаватели имаа можност да го видат изложен во Скопје, е последна генерација на моделот „488 челинџ ево“ и е значително поскап.
„Применети се сите најнови модификации, од кои дел се применува и во Формула 1, што го прави овој модел вистински ’ѕвер’ на тркачките патеки и кој со адаптацијата за ова првенство чини многу повеќе“, објаснува Стефановски.
Автомобилите на „Ферари“ генерално се доживуваат како симбол на брзина, луксуз, богатство и престиж, па го прашавме трикратниот европски шампион што значи да се биде најдобар на Стариот Континент од финансиски аспект. На нашата провокација дали може и приватно во секој момент да си дозволи „ферари“, ни одговори дипломатски.
Игор Стефановски-Иџе
„Автомобилизмот е еден од најскапите спортови на денешницата. Средствата што се потребни да можам да учествувам на овие елитни натпревари се навистина големи и им благодарам на спонзорите. Приватно, не ми е потребен брз автомобил со вакви перформанси, но не значи дека во иднина тоа нема да се промени“.
Иако има три европски титули, 180 извозени трки, 110 подиуми, од кои 80 победи, и многу рекорди поставени на најпознатите тркачки патеки низ Европа, оваа сезона ќе му биде особено значајна - првпат во својата кариера ќе управува со автомобил со заден погон и моќност од 700 КС.
Игор Стефановски-Иџе
Европскиот шампионат во ридско-планински патеки на ФИА годинава ќе стартува во Австрија (26-28 април), а ќе заврши во Хрватска (13-15 септември). Другите земји во кои Иџе ќе се натпреварува се Франција, Шпанија, Португалија, Чешка, Италија, Полска, Швајцарија и Словенија. Како најголем предизвик тој ги издвојува трките во Австрија, Португалија и во Швајцарија, на кои, како што вели, со новиот автомобил ќе се достигнуваат брзини и над 260 км/ч. и ќе биде исклучително опасно со оглед на конфигурацијата на самите патеки.
Игор Стефановски-Иџе дебитира на Македонскиот шампионат во кружни автомобилистички трки во 2001 година. Ова натпреварување го освои три години подоцна, а до 2013 година се закити уште со осум титули на домашен терен. Европски шампион на ридско-планински патеки стана во 2014 година, подвиг што го повтори во 2015 и 2023 година. Стефановски лани доминираше на патеките и победи на седум од десетте трки.
