ЛВМХ е сè поблиску до тоа да стане главен спонзор на Формула 1

Луксузниот конгломерат ЛВМХ (Moët Hennessy Louis Vuitton / LVMH) е во завршни преговори да стане главен спонзор на Формула 1, во договор што ќе овозможи француската компанија да ги промовира своите водечки брендови на тркачката патека.

Компанијата со седиште во Париз е блиску до договор според кој производителот на часовници „Таг Хојер“ (Tag Heuer), како и други брендови, вклучувајќи го шампањот „моет и шандон“ (Moet & Chandon), а веројатно и синџири на хотели, ќе стане спонзор на Ф1, со логоа и производи на брендовите прикажани пред гледачите на трката, велат извори запознаени со ситуацијата.

Потенцијалниот договор би можел да вреди околу 150 милиони долари годишно и би бил удар за „Ролекс“ (Rolex SA), водечкиот швајцарски бренд за часовници, кој е официјален спонзор за мерење на времето на Ф1 од 2013 година.

Преговорите се во тек и сè уште не е постигнат конечен договор, велат анонимни извори. Претставниците на Формула 1 и „Ролекс“ одбија да коментираат. Претставниците на ЛВМХ не одговорија веднаш на барањето за коментар.

Популарноста на Ф1 експлодира во последниве години, делумно поттикната од проширувањето на локациите за трки, а делумно и од серијата на „Нетфликс“ (Netflix) „Формула 1: Вози за да преживееш“.

Потенцијалниот договор со Ф1 ќе обезбеди широка глобална платформа за неколку бренда на ЛВМХ, поддржувајќи ги деловните и маркетиншките амбиции на основачот на компанијата и мнозински акционер Бернард Арно, кој ја изгради најголемата луксузна компанија во светот преку серија аквизиции.

„Луј Витон“ (Louis Vuitton) и брендот за накит „Тифани“ (Tiffany & Co.) редовно се појавуваат на глобалните спортски настани, особено со кутиите за трофеи на Светскиот куп на ФИФА или НФЛ. „Луј Витон“ е особено познат по популарните рекламни кампањи со фудбалерите Кристијано Роналдо и Лионел Меси, како и тенисерите Рафаел Надал и Роџер Федерер, фотографирани од Ени Лејбовиц.

ЛВМХ беше главен спонзор на Олимписките и Параолимписките игри што се одржаа во Париз летово, обезбедувајќи финансиска поддршка во вредност од 150 милиони евра (166 милиони долари). Неговите брендови беа истакнати во текот на натпреварите. Поточно, ѕвездата Селин Дион носеше блескав бел свилен фустан на „Кристијан Диор“ (Christian Dior) додека пееше од Ајфеловата кула на церемонијата на отворањето на Олимпијадата кон крајот на јули.

Според луѓе запознаени со ситуацијата, многуте луксузни брендови на францускиот конгломерат му даваат предност во преговорите околу потенцијален мултибренд-договор со Формула 1 во споредба со „Ролекс“, кој произведува само часовници.

Доколку се постигне договор, соработката со ЛВМХ би можела да биде објавена пред крајот на годината и крајот на сезоната во Ф1. Финансискиот директор на ЛВМХ, Жан-Жак Гиони, за време на конференциска врска со аналитичари и инвеститори во јули потврди дека компанијата преговара со Формула 1, но тогаш рече дека „ништо не е решено“.

Во моментов нема коментари за веста. Биди прв да коментира...

Остави коментар