Тестиравме „ламборгини темерарио“: Ретко кој автомобил дава такво чувство на моќ

Минатото лето добив казна за пречекорување на брзината додека возев „ламборгини ревеулто“ од Лос Анџелес кон Кармел, Калифорнија. Ретко добивам сообраќајни казни, но зад воланот на „ревеулто“ сепак малку се опуштив. Хибридниот мотор V-12 со 1.001 коњска сила, вреден 664.799 долари, беше толку брз и забавен за возење што казната од околу 400 долари ми изгледаше како мала цена за таквото уживање на отворен пат.

Затоа со големо возбудување неделава возев „ламборгини темерарио“, вреден 382.654 долари, на патеката Есторил во Португалија. Сакав повторно да ја почувствувам таа радост! Новиот хибриден мотор V-8 со 907 коњски сили го заменува моделот V-10 на „хуракен“, чие производство заврши во 2024 година. Сепак, повеќе го доживувам како бунтовен помлад брат на „ревеулто“, со оглед на тоа што дели сличен плагин хибриден погон и речиси совршена крива на испорака на моќноста, која се протега до импресивни 10.000 вртежи во минута - дури и повеќе од „ревеулто“, кој застанува на 9.500.

Компактниот „темерарио“ обезбедува толку голема стабилност во брзината и урамнотеженост на моќта што претставува совршен доказ како врвните спортски автомобили може идеално да функционираат во спој на електрична и технологија на мотор со внатрешно согорување. Ако „ревеулто“ е лидер што им се спротивставува на законите на физиката, „темерарио“ е неговиот заводлив, посвесен придружник во семејството Ламборгини.

Новиот хибриден мотор V-8 со 907 коњски сили го заменува моделот V-10 на „хуракен“, чие производство заврши во 2024 година - Hannah Elliott/Bloomberg

Основни карактеристики

За разлика од „хуракен“, кој е развиен во соработка со партнерската компанија „Ауди“, „темерарио“ е целосно развиен во рамките на „Ламборгини“. Ова е важна информација во време кога компанијата се соочува со непредвидливи царински политики воведени од претседателот на САД, Доналд Трамп. Додека други автомобилски компании го преселуваат производството во Соединетите Американски Држави (САД) за да избегнат царини, „Ламборгини“ нема да го направи тоа, истакнува Стефан Винкелман, претседател и главен извршен директор на „Аутомобили Ламборгини“. „Произведено во Италија“ (Made in Italy) е еден од нашите најважни адути, вели тој.

„Не можеме да го регионализираме нашиот производ“, додава Винкелман. „Нашиот бизнис-модел се базира на корените и ДНК на брендот. Произведено во Италија – тоа е она што го сакаат нашите купувачи“.

Купето, кое по изглед личи на ајкула, има погон на сите тркала, осумстепен автоматски менувач со двојна спојка и дури 13 режима на возење, вклучувајќи и режим за дрифтaње. Електричниот режим на возење овозможува дострел од околу 10 километри. Системот вклучува распределба на вртежен момент, контрола на пролизгување и управување со суспензијата што во 80 отсто од случаите ги предвидува потезите на возачот наместо да реагира со задоцнување, објаснува Рувен Мор, технички директор на „Ламборгини“. (Тоа значи дека премините помеѓу кочење и забрзување се исклучително мазни. Кај „хуракен“ балансот беше приближно 50/50, додава тој.)

Кабината е значително пространа во споредба со претходниот модел, со конзола што нуди повеќе простор за полнење телефони, а новиот технолошки пакет „вижн пек“, вреден околу 5.000 долари, носи корисни видеоснимки, податоци за возење и дури возачки тренинг преку апликација. Многу атрактивна опција е и тоа што три камери снимаат 60 секунди возење од кабината, со толку материјал лесно може да се стане вирална ѕвезда.

Внатрешноста на „ламборгини темерарио“ е пространа, сега има доволно место и за повисоки возачи, како и за тркачки шлемови.

Внатрешноста на „ламборгини темерарио“ е проширена — сега има доволно простор и за високи возачи и за тркачки шлемови| Bloomberg

Постојат две верзии на „темерарио“: стандардна, тешка 3.725,9 фунти, и „алегерита“ (Alleggerita што на италијански значи „олеснета“), која е за 25 килограми полесна. Стандардната верзија достигнува максимална брзина од 343 км/ч. и забрзува од 0 до 100 км/ч. за 2,7 секунди. Портпаролот не можеше да ги потврди бројките за полесната верзија.

„Алегерита“ има карбонски капак на моторот, заден спојлер, преден сплитер и странични панели, што ја зголемува аеродинамичната сила за 67 проценти и протокот на воздух за 62 проценти во споредба со стандардната верзија. Цената се зголемува за дополнителни 49.113 долари, а карбонските тркала додаваат уште 26.200 долари на цената. Федерико Фоскани, директор за продажба и маркетинг во „Ламборгини“, вели дека „алегерита“ ќе сочинува 30 проценти од вкупната продажба на „темерарио“.

Предности

Метеоритскиот „темерарио“ е неверојатно моќен, но и изненадувачки лесен за возење, што е комбинација што ретко се гледа. Ги возев и двете верзии на патеката Есторил (4,12 км), во близината на Лисабон, каде што Аиртон Сена во 1985 година ја оствари својата прва победа во Формула 1. Разликата помеѓу моделите за мене, како аматерка, не беше драстична. Двете верзии беа исклучително забавни и будеа доверба; почувствував почеток на убаво пријателство со автомобилот.

Џакомо Бари, Италијанец што ми беше инструктор, ми даваше совети преку слушалки, ме пофали за контролата во свиоци и ми сугерираше кога да газам. Инаку, „темерарио“ има доволно простор за возач висок 183 см со шлем - ако купувате облека во одделите за „големи и високи“ (big and tall), ова е „ламборгини“ за вас.

„Темерарио“ се нуди дури во 400 различни бои и три различни опции за тркала - Hannah Elliott/Bloomberg

Управувачките карактеристики се беспрекорни: агилен и стабилен, потврдено од „хуракен“, но не и прецврст, реагира на најмалиот потег на воланот и останува смирен при силно кочење, без навалување напред. На рамниот дел од патеката Есторил достигнав брзина од 265 км/ч. - значително повеќе отколку со „ревеулто“ на автопатот во Калифорнија. Забрзувањето е моментално и линеарно - моќта на хибридниот систем е извонредна.

Екраните во „ламборгини темерарио“ се сведени на минимум, додека три камери скриени во кокпитот можат да снимаат возење и да собираат телеметриски податоци - Hannah Elliott/Bloomberg

Дизајнот на „темерарио“ е софистициран – на прв поглед изгледа воздржано, но крие многу детали: хексагонални светла, триаголни шари на капакот на моторот, двојно закривен покрив што дава дополнителна висина, изложени задни тркала што потсетуваат на „каунтач“ (Countach) од 1970-тите, широки задни раменици како „галарадо“ (Gallardo) од 2000-тите и високо поставен издувен систем што потсетува на мотоциклите „дукати“ (Ducati). Чиста уметност.

Недостатоци

Цените растат. Поради царините од 27,5 проценти, „Ламборгини“  ја зголеми цената на моделот „урус“ (Urus) за седум проценти (до 276.740 долари) и на „ревеулто“ за 10 проценти (до 664.799 долари), а и „темерарио“ е поскап за седум проценти во однос на првичниот план. „Ламборгини“ ќе ги преземе преостанатите трошоци за да не се префрли целата тежина врз купувачите.

Испораките почнуваат следната година - Hannah Elliott/Bloomberg