.webp){kind=icon}
По две години присилно наздравување преку Зум (Zoom), сè поголем број директори оваа празнична сезона сакаат повторно да ги соберат своите вработени на едно место и да организираат убава прослава.
Од Њујорк до Сан Франциско, локалите се целосно резервирани за овој месец, првпат откако омикрон, сојот на коронавирусот, им ги наруши плановите на многу компании минатата година. Според истражувањето на фирмата за регрутирање „Челинџер, Греј енд Крисмас“ (Challenger, Grey & Christmas Inc.), од над 250 бизниси со седиште во САД, речиси 60 отсто планираат новогодишни забави со лично присуство. Тоа е значително зголемување во однос на минатата година, иако сè уште е под 75 отсто, колку што беше во 2019 година, непосредно пред избувнувањето на глобалната пандемија.
Иако сè уште има некои пречки - инфлација, страв од рецесија, отпуштања во технолошката индустрија и помали или непостојни бонуси - многу газди сметаат дека собирите во празничната сезона се премногу важни за да се откажат. Тие претставуваат ретка можност за целиот персонал да се собере лично, сега кога толку многу работат комбинирано или целосно од далечина. Забавите се убав начин да им се покаже благодарност на вработените на сè уште конкурентниот пазар на трудот и тие можат да бидат клучен засилувач на моралот по особено тешката година.
„Лидерите сакаат да ја засилат поврзаноста во своите тимови, што има смисла од човечка гледна точка - ние копнееме да бидеме заедно“, вели Каролин Волш, потпретседателка во одделот за човечки ресурси во консултантската фирма „Гартнер“ (Gartner). „Но има смисла и од гледна точка на перформанси: истражувањата покажуваат дека градењето лични врски со вашиот тим, особено надвор од канцеларијата, може да биде навистина моќно средство“.
Depositphotos
„Заедничкото собирање ги зајакнува соработката, радоста, благосостојбата“, појаснува Волш.
Но тоа не значи дека сите компании слават помпезно. Многу фирми организираат скромни прослави, или за да ги зауздат трошоците или за да покажат солидарност кон оние што се погодени од кратењето на работните места и замрзнувањето на вработувањата до кои дојде во економскиот метеж во 2022 година.
„По отпуштањата десетици илјади луѓе од технолошката индустрија, познатите прослави во Силиконската Долина добиваат поскромни димензии“, вели Мелани Зелник, основачка и главна извршна директорка на „Глоу“ (Glow), компанија за планирање корпоративни настани со седиште во Сан Франциско. Иако таа нема никакви откажувања, неколку клиенти годинава ги префрлаат забавите во своите канцеларии. Другите едноставно внимаваат на деталите како менито. „Нема да служиме кавијар и шампањ“, вели Зелник.
Сепак, тематските забави и натаму се популарни - „Глоу“ организира забави посветени на „вселената“ или на филмот „Всушност, љубов“ (Love Actually).
За некои фирми, годинешниот поскромен пристап подразбира одлука за мали регионални забави во големите канцелариски центри, заштеда на значителни суми за изнајмување места и авионски билети за вработените. „Лендинг клаб“ (LendingClub), фирма за финансиски услуги, ќе биде домаќин на канцелариски прослави во Бостон, Солт Лејк Сити и седиштето во Сан Франциско.
„Мандеј“ (Monday.com), кој обезбедува софтвер за соработка и управување со задачи, на почетокот на овој месец одржа забава на тема „Роринг 20“ во Челзи Пирс, на Менхетн, за своите повеќе од 200 вработени во Њујорк. Настанот имаше отворен бар, музика и танчари, а некои вработени беа облечени како флаперс или ликови инспирирани од ТВ-шоуто „Пики Блајндерс“ (Peaky Blinders). Канцелариите на компанијата во Лондон и Денвер одржаа слични забави, додека помалите канцеларии, како таа во Мајами, беа домаќини на приватни вечери во ресторани. „Мандеј“, исто така, ќе одржи виртуелна забава оваа недела за своите 50 оддалечени работници, на која ќе учествува комичар и ќе има час за правење коктели.
За Мајк Лам, потпретседателот на „Мандеј“ за луѓе во Америка, одлуката да биде домаќин на големи прослави беше „без никакво размислување“. „Здружувањето на луѓето е поважно од кога било“, рече тој. „Присуството не беше задолжително, но повеќето работници дојдоа бидејќи настаните лично се редовна појава во компанијата“, рече Лам. „Мандеј“ организираше празнични забави надвор од локацијата и минатата година.
За стартапите чии буџети се премногу ниски, во последните шест месеци се актуализира економија на споделување простор за настани, според Вил Брикер, директор во „Хасл фонд“ (Hustle Fund), фирма за ризичен капитал, со средства од околу 90 милиони долари. Бидејќи големата популарност на работата од далечина ги остава канцелариите празни во повеќето денови од неделата, основачите си ги нудат своите простории еден на друг бесплатно, во обид максимално да ги искористат во опкружување што е страшно за собирање финансиски средства.
На Волстрит, пак, бурните забави финансирани од фирмите се далечно сеќавање кај повеќето „тешкаши“ уште од времето на финансиската криза, бидејќи повеќето се претпазливи во покажувањето на вишоците. „Вообичаена практика сега е управниот директор да ја плати сметката за пијалаци или вечера“, вели Џесика Кадмус, лична стилистка на директорите на Волстрит, која ја започнала својата кариера како соработничка во „Голдман Сакс“ (Goldman Sachs). Намалувањето на работните места во финансискиот сектор и падот од приближно 16 отсто на S&P 500 досега оваа година се само причина повеќе за поголема економичност.
„Имав еден клиент на доста висока позиција, кој ми рече: 'Малку е проблематично. Но ова беше навистина тешка година, а луѓето едноставно сакаат да бидат заедно’. Без оглед на пристапот што ќе го преземе, мислам дека нашите напори ќе бидат ценети“, пренесува таа.
