.webp){kind=icon}
Кога кралот Чарлс на 6 мај беше крунисан за монарх на Велика Британија, во Вестминстерската опатија, можеа да се видат многу блескави украси за глава: круната на Свети Едвард, чие поставување официјално го означува моментот на крунисувањето; кралската државна круна, која ја носеше кралот Чарлс; круната на кралицата Мери, која ја носеше кралицата Камила.
Немаше многу тијари.
Во согласност со визијата на кралот за поедноставна, поскромна монархија, тијарите беа непожелни на церемонијата, речиси како и Меган Маркл. Само Кетрин, принцезата од Велс, и нејзината ќерка Шарлот носеа украси за главата на Александар Меквин слични на тијара, со сребрени прачки и кристални листови.
Но љубителите на кралскиот гламур не треба да се грижат. Неколку недели по крунисувањето, тијарите беа во сила на раскошната венчавка на јорданскиот престолонаследник, принцот Хусеин. Тие се појавија вплетени во фризурите на женските членови од кралското семејство на Јордан, како и на принцезата Мери од Данска, принцезата Викторија од Шведска и на принцезата од Велс, која ја носеше омилената тијара на принцезата Дијана, симболично наречена „Љубовен јазол“.
Всушност, тијарите сè уште се носат со гордост на Блискиот Исток и на раскошните венчавки низ светот. Голем избор може да се направи по посебна нарачка во традиционалните јувелирски куќи, со векови омилени меѓу претставниците на аристократијата, како што се „Гарард“ во Лондон и „Шоме интернешнал СА“ во Париз. Многу куќи ги вклучуваат во современите луксузни колекции на накит, меѓу кои се и „Бушерон“ и „Хари Винстон“.
Овој месец, „Де Бирс“ вклучи авангардна тијара во својата нова колекција „Метаморфозис чаптер ту“. Оваа уникатна модерна интерпретација содржи четири дијамантски ленти од платина и обоен титаниум и седум импозантни дијаманти - вклучувајќи го и централниот камен во облик на круша од 8,49 карати. Вкупно, тијарата содржи повеќе од 40 карати блескава сјај.
Иако можеби не гледате тијари на секој чекор, нивната трајна привлечност е неоспорна. Делото на Џефри Ц. Ман, „Тијари: Историја на сјајот“ (Tiaras: A History of Splendour), импозантна енциклопедија од 432 страници, која првпат беше објавена во 2001 година, во јануари ќе го доживее своето осмо издание. Профилите на социјалните мрежи посветени на кралското семејство и неговиот накит имаат голем успех со објавите за тијарите. Аманда Мата (@matta_of_fact) редовно добива стотици илјади прегледи на своите коментари за стилот на Тикток; а видеото со детали за историјата на тијарата „Полтимор“ на принцезата Маргарет привлече повеќе од 1,3 милион прегледи. На Инстаграм, @a.tiara.a.dai редовно објавува „вести за тијари“ за своите 57.000 следбеници, кои се многу посетувани.
Но, да ја оставиме фасцинацијата настрана, кој ги купува? „Колекционерите на скапоцени камења и накит, се разбира“, вели Клејбурн Поиндекстер, потпретседател и виш специјалист во „Кристи“, како и клиенти што планираат да ги носат на венчавки и специјални пригоди, па дури и на јубилејни роденденски прослави. Неодамнешната онлајн аукција на „Кристи“ претстави три, а секоја ги надмина очекувањата. Дијамантската тијара од почетокот на 20 век од „Бушерон“ е продадена за 352.800 фунти (449.000 долари), што е повеќе од двојно од нејзината првична висока процена од 150.000 фунти.
Принцезата Грејс Кели: портрет од банкнота на Кралството Монако /Depositphotos
Поимпресивните парчиња се резервирани за настани во живо: на мајската аукција „Величествени скапоцени камења“, „Кристи“ во Женева ја продаде дијамантската тијара „Бесборо“ за 945.000 швајцарски франци (1,1 милион долари). Деветтиот гроф од Бесборо нарачал арт-деко дизајн од „Шоме“ за својата сопруга. „Потеклото односно колку е познато парчето е движечки фактор при купувањето тијара на аукција“, вели Поиндекстер.
„Гарард“ креираше многу тијари за британското кралско семејство, вклучувајќи го и „Љубовниот јазол“. „Специјалните нарачки најчесто доаѓаат од Блискиот Исток“, вели директорката за дизајн и развој Клер Скот, а куќата нуди модел од тијарата на принцезата за невестите што не можат да чекаат една година да им се изработи тијара по специјална желба. Постојниот дизајн има делови што подоцна може да се откачат и да се носат како приврзоци. „Гарард“ во јуни воведе услуга за изнајмување, па невестите сега можат да го избегнат трошењето стотици илјади долари за украс што би можеле да го носат еднаш или двапати.
Денес, кога гледаме тијари надвор од кралските настани и венчавки, тоа се украси за глава со скапоцени камење. Познатите личности како Лејди Гага, Салма Хајек, Рут Нега и Натали Портман носеа „тијари“ на црвениот тепих, но ништо не може да се спореди со екстравагантната дијамантска тијара на Мајк Тод што Елизабет Тејлор ја носеше на многу настани, вклучувајќи го и доделувањето на „оскарите“. Актерката многу добро знаеше дека тијарите - за разлика од круните, кои се резервирани за кралевите и кралиците - се за оние што одлучуваат дека заслужуваат да бидат третирани како кралици.
