.webp){kind=icon}
Кога сопственикот на брендот „Коуч“ (Coach), компанијата „Тапестри“ (Tapestry Inc.), и родителската компанија на „Мајкл Корс“, „Капри Холдингс“ (Capri Holdings Ltd.), ги започнаа своите аквизициски походи, имаа можност да станат американски еквивалент на ЛВМХ (LVMH - Moët Hennessy Louis Vuitton).
Сега, шест години подоцна, ниту една од нив самостојно не го постигна успехот на најголемата луксузна групација во светот. Сепак, тие имаат уште една шанса да станат моќен играч во светот на луксузот: „Тапестри“ неодамна објави дека ќе ја купи „Капри“ за 8,5 милијарди долари.
Оваа комбинација создава моќен американски луксузен гигант, со над 12 милијарди долари годишен приход и речиси две милијарди долари оперативен профит. Покрај брендовите „Коуч“ и „Мајкл Корс“, „Тапестри“ ги поседува „Кејт Спејд“ (Kate Spade) и производителот на чевли „Стјуарт Вајцман“ (Stuart Weitzman), додека „Капри“ ги вклучува „Версаче“ (Versace) и „Џими Чу“ (Jimmy Choo). Проширената компанија ќе има и поглобален досег, бидејќи операциите на „Капри“ во Европа го дополнуваат присуството на „Тапестри“ во Азија.
Комбинираната групација и натаму ќе биде помала во споредба со европските конгломерати, како што се ЛВМХ, сопственикот на „Гучи“ (Gucci) - „Керинг“ (Kering SA) и родителската компанија на „Картие“ (Cartier), „Компани финансие Ришемон“ (Cie Financiere Richemont SA). Но сепак ќе им се приближат. И заедно, „Тапестри“ и „Капри“ ќе бидат подобро опремени за да се натпреваруваат со европските имиња, како и со домашните ривали, како „Ралф Лорен“ (Ralph Lauren Corp).
Ова е клучно, бидејќи последните три години донесоа поларизација меѓу најголемите играчи и остатокот од индустријата. Размерот значи повеќе ресурси за промовирање одредени брендови. Европските гиганти можеа да инвестираат во најдобрите продавници, најимпресивните маркетинг-кампањи и најпознатите дизајнери. Заштеда на трошоци е тешко да се постигне во луксузниот сегмент, но „Тапестри“ посочи дека поради оваа синергија очекува повеќе од 200 милиони долари во рок од три години.
Освен тоа, по неколку години импресивен раст, продажбата на луксузни производи почнува да се задржува на понормални нивоа во услови на забавување во САД и знаци дека враќањето на кинеските купувачи по пандемијата можеби и не е толку спектакуларно како што се очекуваше. Дури и моќниот ЛВМХ мораше да инвестира повеќе во првата половина од својата фискална година за да ги задржи своите брендови на листите на желби на потрошувачите; инвестираше во премиерното модно шоу на Фарел Вилијамс за машката колекција на „Луј Витон“ во Париз.
„Тапестри“ и „Капри“ главно работат во поризичниот премиум-сегмент, а не на самиот врв на пазарот на луксузни стоки. Помладите богати купувачи почнуваат да се повлекуваат. Остануваат супербогатите. И двете компании се изложени токму на таков тип клиенти.
Се разбира, секоја комбинација има свои предизвици.
„Тапестри“ нуди 57 долари по акција во готовина за „Капри“, што е премија од 65 отсто во однос на цената од минатата среда. Иако акциите на „Капри“ паднаа речиси за 50 отсто од февруари, кога компанијата ги намали своите проекции за оваа година, тоа можеби не е доволно за да привлече инвеститори. Пред предупредувањето акциите беа купувани за околу 68 долари. Во меѓувреме, според предложената вредност, мултипликаторот на ЕБИТДА е 9 пати, значително пониско од околу 16-те пати назначени во неодамнешното стекнување на „Керинг“ со 30 отсто од уделот во „Валентино“. Акциите на „Капри“ се зголемија речиси за 60 отсто, до околу 55 долари во претпазарното тргување.
Bloomberg
Послабата проекција произлегува од позицијата на брендот „Мајкл Корс“ во рамките на компанијата „Капри“, кој во текот на годините страдаше од прекумерна изложеност, проблеми со продажните места и привлекување клиенти што чувствуваат финансиски притисок. Овие долгорочни проблеми сè уште ќе треба да се решаваат. Сепак, предизвиците што ги има Корс би можеле подобро да се решат како дел од поголема група. Не само што ќе има поголема финансиска моќ туку „Тапестри“ има и силен успех во заживувањето на исцрпени брендови. Тој постигна добри резултати со ревитализација на својот водечки бренд „Коуч“ преку пласман на попосакувани производи, ефективен маркетинг и соработки со познати личности, како Селена Гомез и Џенифер Лопез.
Навистина, ризиците поврзани со овој договор бараат труд. Доколку „Тапестри“ и „Капри“ успеат да го направат вистинскиот потег, тие може да станат поголема сила на глобалната луксузна сцена. Дури можеби ќе се појави и можност за понатамошно проширување, на пример преку договор со „Ралф Лорен“, доколку основачот одлучи да ја продаде својата компанија.
САД отсекогаш имале помало влијание во светот на луксузот отколку што веројатно се очекува. Со оглед на тоа што „Тифани“ (Tiffany) стана дел од ЛВМХ и шпекулациите дека „Ралф Лорен“ може да го следи тој пример, барем овие две американски имиња се обидуваат да тргнат по друг пат, настрана од Париз.
