Модниот дизајнер Мајкл Корс ѝ кажал на федералната судијка дека конкуренцијата на пазарот на чанти е толку силна и разновидна што првпат слушнал за еден бренд кога видел фотографија од Тејлор Свифт со чантата во раката.
„Кога го погледнав брендот, веб-страницата веднаш падна“, сведочеше Корс за брендот „Аупен“, кој стои зад хит чантата од минатата година, која ја носеа и Џенифер Лоренс, Кајли Џенер и Оливија Родриго.
Корс беше на говорницата за сведоци во понеделникот, во втората недела од сослушувањата што ќе одлучуваат за судбината на планираното преземање од страна на „Тапестри“ (Tapestry Inc.) на „Капри холдингс“ (Capri Holdings Ltd.), проценето на 8,5 милијарди долари. На судијата му кажа за чантите што станаа популарни откако се појави на фотографиите на Бијонсе и Мадона.
Договорот ќе ги комбинира брендовите „Тапестри коуч“ (Tapestry’s Coach), „Кејт Спејд“ (Kate Spade) и „Стјуард Вајтцман“ (Stuart Weitzman) со брендовите „Капри“, „Мајкл Корс“, „Версаче“ и „Џими Чу“, за да создаде еден од најголемите модни брендови во светот. Американските антимонополски власти тужат за да го блокираат спојувањето, тврдејќи дека тоа ќе ја намали конкуренцијата на пазарот на луксузни чанти. Ова е прв случај од секторот на модната индустрија под водство на претседателката на Федералната трговска комисија (ФТЦ), Лина Кан, која се бореше со преземања во различни сектори, од технологија до прехранбена индустрија, со различен успех.
Компаниите велат дека конкуренцијата на пазарот на чанти е исклучително разновидна, почнувајќи од торба од 2,99 долари од „Трејдер Џо“ (Trader Joe), која стана вирална, до европските луксузни брендови, чии чанти чинат илјадници долари. Тие тврдат дека ова преземање е клучно за ревитализација на брендот за чанти „Мајкл Корс“, кој е во стагнација.
Корс (65) ѝ кажа на американската окружна судијка Џенифер Рошон како ја лансирал својата прва колекција женска облека од неговиот стан во Њујорк во 1981 година и ги изложил подемите и падовите на неговата четиридецениска кариера.
„Понекогаш сте најпопуларни, понекогаш млаки, а понекогаш целосно ладни“, сведочеше тој. Во последните неколку години, неговиот бренд е во пад, изјави тој пред судот.
„Мислам дека дојдовме до точка на замор на брендот“, рече Корс. „Марката моментално е во состојба на стагнација“.
Корс ѝ кажа на судијката Рошон дека „Капри“ работел на заживување на брендот, но не успеал, делумно поради „финансиски ограничувања“. Според истражувачката компанија „Глобал дата“ (GlobalData), договорот ќе ја создаде четвртата по големина луксузна компанија во светот и втората по големина во Америка, зад ЛВМХ.
Аналитичарите од „Ти-ди коен“ (TD Cowen), предводени од Оливер Чен, во луксузниот сегмент, чантите што чинат во просек 150 долари ги дефинираат како чанти со пристапни цени и ја проценуваат големината на американскиот пазар од 10 до 15 милијарди долари. Според процените на аналитичарите, „Тапестри коуч“ има 11 отсто удел на тој пазар, додека Мајкл Корс има 9 отсто.
Сведочењето треба да заврши во вторник, а Рошон, која го суди случајот без порота, ќе ги слушне завршните зборови на 30 септември, по што ќе одлучи дали ќе издаде привремена забрана за трансакцијата во очекување на внатрешната постапка на ФТЦ. Привремена забрана ефективно ќе го прекине договорот.
За време на сведочењето на Корс, адвокатот на „Капри“ го прашал кои брендови ги смета за конкуренти на неговите чанти.
„Конкуренцијата стана многу пофлексибилна - сè, од ’Лулулемон’ (Lululemon), ’Зара’ (Zara), ’Луј Витон’ (Louis Vuitton) до продажба на половни чанти“, рече Корс, мислејќи на пазарот на користени производи што беше отсутен во 2000-тите, но денес е достапен за широк спектар на потрошувачи. „Сите се тука сега“.
„Продажбата може вртоглаво да порасне благодарение на изборот на ѕвездите и инфлуенсерите на мрежите, кои често се платени да носат одредени брендови“, објасни Корс. Благодарение на подемот на социјалните мрежи, вклучувајќи го и Тикток, многу е полесно да се лансира нов бренд отколку пред десет години и тој да стане „сензација“, додаде тој.
Сепак, тој ѝ кажа на судијката дека е речиси сигурен дека тоа не е случај со мегаѕвездите како Свифт, Бијонсе и Мадона.
„Ниту еден од овие брендови нема пари да ги плати нив“, рече тој.
Случајот се води под името „Федералната трговска комисија против Тапестри 24-цв-03109“, во Окружниот суд на САД за јужниот округ на Њујорк (Менхетн).
.webp){kind=icon}
