„Долче и Габана“ се врти кон секторите за убавина и луксузни недвижности

„Долче и Габана“ (Dolce & Gabbana Srl), италијанска модна куќа позната по своите смели дизајни инспирирани од Медитеранот, верува дека нејзиниот сегмент за убавина го држи клучот за независна иднина во светот на луксузот, кој брзо се менува.

Приходите од производите за убавина се очекува да пораснат за повеќе од 20 проценти во последните 12 месеци (заклучно со март 2025 година), на 610 милиони евра, наведе во интервју извршниот директор Алфонсо Долче. Тоа би ги зголемило вкупните годишни приходи на околу две милијарди евра.

Компанијата има цел од сегментот за убавина да достигне приходи во висина од една милијарда евра до крајот на финансиската 2027 година, откако ќе премине од лиценцирање на директно управување со производството и дистрибуцијата на парфеми, шминка и производи за нега на кожа.

Алфонсо Долче Извор: „Долче и Габана“ (Dolce & Gabbana Srl)

„Долче и Габана“ се свртува кон секторот за убавина во време кога модната индустрија се соочува со големи предизвици, а глобалниот пад на продажбата го отвора прашањето за иднината на некои од нејзините конкуренти како независни брендови.

„Прада“ (Prada SpA), компанијата што котира на берзата во Хонгконг, е блиску до договор за купување на „Џани Версаче“ (Gianni Versace Srl), додека модната икона Џорџо Армани ја потресе индустријата минатата година велејќи дека повеќе не исклучува спојување или излегување на берза по неговото пензионирање.

„Долче и Габана“ одлучи дополнително да ја зајакне својата независност со диверзификација на изворите на приходи. Покрај директното управување со сегментот за убавина, компанијата ги истражува можностите во секторите за недвижности и хотели.

„Се запрашавме што друго можеме да ѝ кажеме на модната индустрија по 40 години на врвот“, рече Долче (60), кој ја води компанијата што во 1985 година ја основаа неговиот брат Доменико и Стефано Габана.

„Долче и Габана холдинг“ (Dolce & Gabbana Holding Srl), која ја опфаќа групацијата во областа на модата, додатоците и сегментот за убавина, оствари приход од околу 1,9 милијарда евра во дванаесетте месеци до март 2024 година, што претставува зголемување од 19 проценти во споредба со претходната година, при што оствари речиси петкратен раст во сегментот на убавина.

Модел на резиденцијален комплекс во Марбеља, Шпанија Извор: „Долче и Габана“ (Dolce & Gabbana Srl)

 

Сепак, добивката на компанијата пред камати и даноци (ЕБИТ) е сè уште само мал дел од тоа што го остваруваат нејзините италијански ривали. „Долче и Габана“ забележа ЕБИТ од четири милиони евра на крајот на минатата финансиска година, додека „Прада“ оствари 1,28 милијарда евра со приходи од 5,4 милијарди евра.

Сè уште не е јасно колку ќе биде успешен вториот голем потег за диверзификација - инвестирањето во недвижности и во хотели.

„Успехот во сегментот на убавина е добар показател за силата на брендот“, рече Лука Солка, виш аналитичар во „Бернштајн“ (Bernstein). „Сепак, не верувам дека угостителството и хотелскиот сектор ќе имаат голема улога за нив“.

Компанијата бара дополнителни средства, вклучувајќи го и развојот на нејзините проекти за недвижности, кои вклучуваат резиденции во Марбеља, Мајами и Дубаи, како и хотели на Малдиви и во Саудиска Арабија.

Тоа претставува уште една промена во стратегијата за компанија што традиционално интерно ги финансира своите инвестиции, рече Долче. Кредитот од 300 милиони евра, од кои околу 25 проценти се веќе вратени, датира од 2022 година. Модната куќа има и револвинг кредитна линија од 100 милиони евра.

Сега компанијата преговара со банките за дополнителни 150 милиони евра, но кредиторот сè уште не донел одлука.

Излог на „Долче и Габана“ во центарот на Лондон Извор: Bloomberg Mercury

 

Летни посетители

Причините за диверзификација лежат во преголемата зависност од посетителите од Медитеранот, призна извршниот директор, а закрепнувањето на групацијата по пандемијата беше краткотрајно.

Руската инвазија на Украина во 2022 година ги намали приходите за повеќе од 100 милиони евра, додека продажбата на кинеските клиенти и нивните вкусови опаднаа поради економската криза во земјата.

Сепак, Долче е уверен дека неговата компанија може да опстане како независен ентитет. „Доколку макроекономската состојба дополнително се влоши, ние имаме сопствен недвижен имот и сопствени магацини и секогаш можеме да го намалиме нашиот буџет за рекламирање, кој е двојно поголем од оној на нашите конкуренти“, рече тој.

Тој исто така останува цврсто на својата одлука дека не сака надворешни инвеститори - барем засега.

„Ги слушаме сите – инвестициските банки, семејните фондови, фирмите со приватен капитал“, рече извршниот директор. „Но нашиот одговор е секогаш ист – во моментов не сме заинтересирани за отворен капитал“.

Во моментов нема коментари за веста. Биди прв да коментира...

Остави коментар