Ако се суди по движењето на цените на акциите, инвеститорите се подготвуваат за тешка сезона на заработки кај производителите на луксузни добра.
Кошницата на луксузни акции на „Голдман Сакс“ (Goldman Sachs Group Inc.) падна за 8,1 отсто од почетокот на годината, поради ескалирањето на геополитичките тензии и прашањата околу побарувачката на кинеските потрошувачи, со што се избришани голем дел од добивките од претходните два квартала. Ова претставува непријатен пресврт, особено затоа што аналитичарите предвидуваа враќање на растот во 2026 година, по две години стагнација.
„Инвеститорите се плашат дека очекуваното обновување на заработките дополнително се одложува за во иднина“, изјави Сем Гловер, портфолио менаџер во ЕФГ (EFG Asset Management). „Видовме повлекување на дел од шпекулативните инвестиции кои се појавија кај некои луксузни брендови за време на четвртиот квартал од минатата година.“
Само „Хермес“ е во плус
Движење на цените на акциите од почетокот на годината, заклучно со 26. јануари
Bloomberg
Резултатите за четвртиот квартал на францускиот гигант во луксузот ЛВМХ (LVMH), кои ќе бидат објавени во вторник, се следниот голем тест за целиот сектор. Другите големи француски компании од луксузниот сектор, „Керинг“ (Kering SA) и „Хермес“ (Hermes International), ќе ги објават своите резултати на 10. односно 12. февруари. Без оглед на падовите од почетокот на годината, сите овие акции сè уште се над своите најниски нивоа од 2025, при што „Керинг“ се издвојува со раст од дури 75 отсто.
Оптимизмот се зголеми откако американскиот претседател Доналд Трамп во април се откажа од своите најстроги предлози за царини. Индексот за луксузни акции на „Голдман“ тогаш скокна од априлскиот минимум за 26 отсто до средината на ноември, кога цените на акциите застанаа во место еден месец или подолго. Сепак, новиот бран трговски тензии месецов повторно ги потисна акциите надолу.
Иако акциите на „Хермес“ се единствените што се во плус, аналитичарите се скептични во врска со заработката
Bloomberg
Заработките на компаниите ЛВМХ, „Хермес“, „Монклер“ (Moncler SpA) и „Керинг“ (Kering) се очекува да опаднат во просек за 6,1 отсто во четвртиот квартал, што е значително послабо од MSCI Europe индексот, каде што се проценува раст од 1,3 отсто во истиот период, според податоците на „Блумберг интелиџенс“ (Bloomberg Intelligence). Клучното прашање во оваа сезона на извештаи ќе биде дали компаниите се уверени дека можат да остварат опоравување на профитите во 2026 година.
За инвеститорите, влогот е голем. Со години луксузните акции се сметаа за европски одговор на високата технологија во САД: големи, брзорастечки компании со отпорни деловни модели. Сепак, по наглиот раст на каматните стапки во 2022 и ослабнувањето на кинеската побарувачка, секторот во целина заостанува зад пошироките пазари.
Секторот доби краткотрајно олеснување минатата недела, кога Трамп ја повлече заканата за царини кон европските земји во рамките на неговата политика за Гренланд, со што беа ублажени грижите околу продажбата во САД. Аналитичарите ја гледаат Северна Америка како важен двигател на растот оваа година.
Распродажбата на акции во луксузниот сектор не покажува знаци на смирување
По закрепнувањето во втората половина на годината, секторот повторно е под притисок
Аналитичарите внимателно ќе ги следат резултатите на ЛВМХ за да видат дали новите креативни директори во модните куќи на компанијата, како и долгоочекуваните иницијативи во малопродажбата, ќе донесат подобри резултати во текот на годината.
Досегашните резултати од секторот беа дочекани со поделени реакции.
Сопственикот на „Картие“ (Cartier), „Ришемон“ (Richemont SA), пријави продажба подобра од очекувањата, но инвеститорите сепак ја казнија акцијата поради слабата побарувачка во континентална Кина, како и негативните ефекти од валутните движења и растот на трошоците за суровини врз профитните маржи. Кај „Барбери“ (Burberry Group Plc), која поминува низ трансформација под новиот извршен директор, Голема Кина ја поттикна продажбата над очекувањата, што привремено ја зголеми цената на акцијата - добивката која подоцна беше анулирана.
Сопственикот на „Картие“, „Ришемон“, објави продажба подобра од очекуваната, но инвеститорите не се оптимисти за акциите на компанијата
Bloomberg
Резултатите на ЛВМХ ќе дадат појасна слика, рече аналитичарот на „Дојче банк“ (Deutsche Bank AG), Адам Кокрејн, „но основниот сценарио сега е дека Кина ќе покаже секвенцијално забавување кај повеќето луксузни брендови“. Аналитичарите очекуваат дека органската продажба на клучната модна и кожена дивизија на компанијата опаднала за 2,9 отсто во четвртиот квартал.
За секторот во целина, аналитичарите на Банка на Америка (Bank of America Corp.) очекуваат забрзан раст годинава, со зголемување на приходите за 5 отсто, во споредба со падот од 1 отсто во периодот 2023–2025. Циклусот на намалување на прогнозите за заработките е запрен, што помогна за раст на акциите во втората половина на минатата година.
Со оглед на тоа што инвеститорите се повлекоа од секторот и дека очекувањата за забавување во Кина станаа пореалистични, „сметаме дека односот на ризик и потенцијален принос во продолжение на сезоната на извештаи е покоректен“, изјави Кјара Батистини, аналитичарка во „ЏП Морган“ (JPMorgan Chase & Co).
Луксузните акции сè уште се скапи во споредба со поширокиот европски индекс
Процената на луксузниот сектор ги надминува просечните вредности на последните десет години
Сепак, неизвесноста околу ситуацијата со кинеските потрошувачи веројатно ќе продолжи и во наредните недели. Кинеската нова година, клучен период за продажбана луксузни добра, понекогаш се паѓа на крајот од јануари или почетокот од февруари, што им овозможува на раководителите да коментираат актуелни трендови на конференциските повици. Оваа година празникот е во втората половина на февруари.
„Луксузните акции влегоа во годината со зголемени очекувања дека Кина ќе закрепне побрзо и порамномерно, што сè уште не се остварува целосно, освен во некои сегменти“, изјави Џон Пласар, директор на инвестициска стратегија во ЦГ (Cité Gestion).
Што велат аналитичарите на „Блумберг“
„Производителите на луксузни добра би можеле да остварат постепено закрепнување на приходите со ограничени зголемувања на цените и насочување кон раст заснован на обем, додека притисоците поврзани со царините се апсорбираат. Позитивното расположение и раните знаци за закрепнување на потрошувачката во Кина ги поддржаа поотпорните брендови од високата класа во однос на поевтините луксузни брендови во текот на 2025 година. Аспиративната мода и ‘entry-level’ луксузот сè уште се борат со долгорочно слабата побарувачка и ниската доверба кај ценовно чувствителните потрошувачи.“
- Дебора Аиткен и Андреа Фердинандо Легиери, аналитичарки
Дополнителна причина за претпазливост на инвеститорите се високите проценки на секторот. Иако соодносот на цена и заработка (P/E) падна од скоро четиригодишниот максимум, луксузните акции сè уште се тргуваат со премија од 74 проценти во однос на паневропскиот Stoxx 600 индекс.
„Клучната порака е: не трчајте пред времето“, вели Ешли Валас од Банка на Америка во интервју. „Пазарот веќе има пресметано многу работи, а видливоста за формата на глобалното закрепнување на побарувачката за луксуз сè уште е ниска.“
.webp){kind=icon}
