text size
Берзански брокер од Лондон прогнозира победа на Аргентина и нови години на болка за англиските фудбалски фанови, според неговата шема која го предвидува победникот на претстојното Светско првенство во фудбал, Катар 2022.
Откако ќе ја елиминира Шпанија во полуфиналето, Аргентина на Лионел Меси ќе го победи Гордиот Албион во финалето закажано за 18. декември во Катар и ќе го подигне својот прв светски шампионски трофеј по 36 години, изјави во вторникот стратегот на Liberum Capital Ltd., Јоаким Клемент.
Клемент додава дека неговиот модел прецизно ги предвидел победниците на последните две Светски првенства во 2014 и 2018 година - Германија и Франција. Тој предупреди дека процесот вклучува „елемент на случајност“ и додаде дека има подготвено неколку изговори во случај неговото предвидување да биде погрешно.
„Работам во индустријата за финансиски услуги повеќе од 20 години и ако усовршив некоја работа, тоа е како да најдам изговори за погрешни предвидувања“, посочи Клемент. „Ако сум во право, тоа е вештина, а ако грешам, вината е на некој друг“, шеговито додава тој.
Фактори во шемата на Клемент се: моменталната сила на тимот, како и социо-економски варијабли за кои претходното истражување покажало дека влијаат на перформансите на националните фудбалски тимови, како што се БДП по глава на жител, големината на населението и температурата во земјата, посочува тој.
Неколку инвестициски банки објавуваат предвидувања во пресрет на големите фудбалски турнири. „Голдман Сакс“ (Goldman Sachs Inc.) користеше податоци од околу 6.000 натпревари за да конструира модел на веројатност пред Евро 2020. Goldman првично ја посочи Белгија како освојувач на турнирот, за подоцна да се префрли на Англија, која заврши како второпласирана.
Фудбалското ривалство меѓу Англија и Аргентина датира неколку децении наназад. Познатиот гол „божјата рака“ постигнат од Диего Марадона во четвртфиналето на Светското првенство во Мексико во 1986 година, турнир што Аргентина на крајот го освои, се смета за главен момент. Англија еднаш го има освоено Светското првенство, во 1966 година.
Клемент од Liberum, исто така, својата белешка ја искористи за да ја изрази својата љубов кон играта. „Вашата работа, бракот, раѓањето на вашите деца, ништо од тоа не е важно во споредба со прашањето кој случаен збир од околу 20-тина милионери ќе биде најуспешен во клоцањето на детска играчка по тревникот“, посочува брокерот.
.webp){kind=icon}
