Истражување: Жените што користат лекови за слабеење имаат поголеми шанси да најдат работа

Жените што користат лекови за лекување на дебелината не губат само килограми – тие ги зголемуваат и своите шанси да најдат работа.

Тоа е главниот заклучок од новото истражување на професорката по економија од Универзитетот „Харвард“, Ребека Дајмонд, која за „Блумберг њуз“ изјави дека за ова истражување ја поттикнал попатен коментар на пријателка за тоа како луѓето почнале поинаку да се однесуваат кон неа откако почнала да користи терапија ГЛП-1.

Студијата, која сè уште не поминала стручна рецензија, покажала дека стапката на вработеност кај жените што не работеле пред почетокот на терапијата се зголемила за 27 отсто по околу една и пол година.

„Масовното фармаколошко намалување на телесната тежина не е само здравствен феномен. Тоа е и промена во начинот на кој општеството и пазарот на трудот ја вреднуваат телесната тежина“, заклучува Дајмонд.

Таа додава дека еднакво е важно и она што не се променило.

„Ситуациите што остануваат исти најчесто се оние што веќе постојат, каде што првите впечатоци одамна се формирани и каде што телесната тежина е само една од многуте карактеристики на личноста“, наведува Дајмонд. Со други зборови, жените што веќе биле вработени немале поголеми шанси да најдат подобра работа.

Задоволството од животот не е загарантирано 

Дајмонд ги анализирала податоците од истражувањето што го спроведува Универзитетот на Јужна Калифорнија и опфаќа повеќе од 10.000 возрасни испитаници во САД. Таа ги споредувала жените што почнале да користат лекови за слабеење ГЛП-1 со жени што сакале да ги користат, но сè уште не ја започнале терапијата.

Влијанието врз мажите не било предмет на анализата, бидејќи жените значително почесто користат лекови ГЛП-1, а примерокот од мажи во истражувањето бил премал за да се извлечат сигурни заклучоци.

Досегашните истражувања покажувале дека жените со поголема телесна тежина во просек заработуваат помалку и поретко се вработени, но било тешко да се утврди дали телесната тежина е причината или само е поврзана со други фактори, како што се семејното потекло, образованието или социоекономскиот статус.

„Клучното прашање не е само дали телесната тежина влијае туку и во кои ситуации влијае - во постојните работни места и врски или при воспоставувањето нови работни места и нови врски“, пишува Дајмонд во трудот.

Користејќи ги податоците од истражувањето, Дајмонд формирала контролна група од жени што изразиле желба да користат лекови за лекување на дебелината, но сè уште не ги користеле. Се покажало дека жените што претходно не биле вработени, а започнале терапија ГЛП-1 почесто наоѓале работа. Истовремено, жените што немале партнер имале еднакво поголема веројатност да склучат брак или да започнат заеднички живот со партнер.

Меѓутоа, она што не се променило е нивното субјективно задоволство од животот.

„Иако на хартија нивниот живот изгледа подобро, истовремено не се забележува и пораст на субјективното чувство на благосостојба“, изјави Дајмонд во интервју.

Поради ограничениот период на набљудување од две години, истражувањето не можело да утврди дали жените што користат лекови ГЛП-1 подоцна оствариле и повисоки приходи. Сепак, се покажало дека корисничките на овие лекови во просек имале повисоки приходи во домаќинството од жените што само биле заинтересирани за терапијата, пред сè благодарение на вработените сопружници, кои можеле да ги финансираат скапите лекови.

Според податоците на фондацијата „Кајзер фемили“ (Kaiser Family Foundation), еден од осум Американци веќе користел некој лек ГЛП-1, а се очекува тој број значително да се зголеми благодарение на проширувањето на здравственото осигурување што ја покрива терапијата, како и на достапноста на лековите во форма на таблети.

Глобалниот пазар на лекови ГЛП-1 би можел да достигне вредност од 190 милијарди долари до 2035 година, што е повеќе од двојно во однос на 2025 година, се наведува во априлскиот извештај на „Морган Стенли“ (Morgan Stanley Research).

Во последните месеци во САД беа одобрени таблети за слабеење на компаниите „Ели Лили“ (Eli Lilly & Co.) и „Ново Нордиск“ (Novo Nordisk A/S), со што лековите ГЛП-1 станаа подостапни за луѓето што не сакаат да користат инјекции.

Како што сè повеќе луѓе постигнуваат резултати со помош на лекови за слабеење, се очекува да се намалува разликата во вработувањето меѓу лицата со прекумерна телесна тежина и кандидатите со просечна телесна тежина.

Сепак, Дајмонд предупредува дека овој тренд би можел дополнително да ги продлабочи општествените нееднаквости.

„За луѓето со пониски приходи или помалку ресурси лесно е да се замисли сценарио во кое ова би можело дополнително да ја зголеми нееднаквоста“, заклучува таа.