Шеикот Џасим Бин Хамад Ал Тани немаше своја страница на Википедија до петокот вечерта, околу еден час по соопштението за медиумите во кое ја објави својата понуда од повеќе милијарди фунти за Манчестер Јунајтед.
Третиот син на поранешниот катарски премиер Хамад бин Џасим бин Џабер Ал Тани и член на кралското семејство стана главен актер во водечката понуда за реномираниот фудбалски клуб, а тој ја ангажираше Банката на Америка за консултант во зделката.
Во петокот вечерта, шеикот Џасим го испука првиот истрел во потенцијално една од најголемите војни за наддавање во годината, што може да кулминира со рекордна цена платена за спортски клуб. Џим Ретклиф, најбогатиот човек во Велика Британија со богатство направено од природни ресурси, исто така е во трка за мнозински удел во Манчестер Јунајтед, а во трка е и хеџ фондот „Елиот Инвестмент Менаџмент“.
Шеикот Џасим, кој има практично неограничено богатство зад себе, би можел да објави конечна понуда која го вреднува Манчестер Јунајтед, кој моментално е во сопственост на семејството Глејзер, на околу пет милијарди фунти, објави „Блумберг Њус“. Тоа би ги надминало 4,65 милијарди долари што минатата година ги плати групата предводена од наследникот на Волмарт, Роб Волтон за Денвер Бронкос од НФЛ.
За разлика од неговиот татко, кој исто така беше поранешен шеф на Катарската инвестициска управа и сопственик на средства во луксузни лондонски хотели, до удел во Дојче банк, шеикот Џасим е релативно непознат на меѓународно ниво.
40-годишникот бил вклучен во голем број бизниси со блиски врски со владата. Тој седеше во одборите на некои од најголемите компании во Катар пред да наполни 20 години, вклучително и многу компании кои ги отелотворуваат стратешките иницијативи на владата и кои сметаат на значителни удели од државата или нејзиниот државен фонд.
Во 2005 година, шеикот Џасим стана претседател на Катарската Исламска банка, вториот по големина заемодавач во земјата и една од најголемите банки усогласени со шеријатот во регионот. Од 2000 година е во бордот на директори на компанија која меѓу другото се занимава и со извоз на течен природен гас.
На нешто помалку од 30 години, тој стана член на одборот на групацијата „Кредит Свис“, претставувајќи го своето семејство и земјата откако државниот богат фонд на Катар инвестираше во швајцарска банка по финансиската криза, и се повлече од таа позиција во 2017 година. Фодновите поврзани со неговиот татко инвестирале околу 200 милиони долари во фондови што банката ги водела со пропаднатиот заемодавач Гринсил.
Семејството на шеикот Џасим беше вклучено во големи спортски зделки во минатото – неговиот татко беше премиер во 2010 година кога Катар ја доби својата контроверзна кандидатура за домаќин на Светското првенство во 2022 година.
Шеикот Џасим сега ќе мора да раководи со друг семеен бизнис. Семејството Глејзер со седиште во САД - предводено од Аврам Глејзер и Џоел Глејзер, извршен претседател и директор на Манчестер Јунајтед - размислуваат за продажба на клубот од минатата година.
Покојниот Малколм Глејзер го купи Манчестер Јунајтед во 2005 година и го оптовари со огромни долгови, а семејството оттогаш се соочува со недоверба од тврдокорните навивачи. Иако револтот беше ублажен во раните години на нивната сопственост, бидејќи тимот продолжи да освојува трофеи под водство на легендарниот менаџер Алекс Фергусон, незадоволството продолжи да расте по неговото пензионирање во 2013 година.
Понудувачите сега имаат пристап до доверливите податоци кои се однесуваат на приходите на Манчестер Јунајтед и се очекува да објават конкретни понуди во наредните недели. Ретклиф понудил да купи 69 отсто од акциите на Глејзер, според лице запознаено со ситуацијата, додека шеикот Џасим дал понуда за 100 отсто од клубот.
Шеикот Џасим ќе мора да ја убеди и УЕФА дека изворот на неговото богатство не е поврзан со Париз Сен Жермен - моментално во сопственост на Катар Спорт Инвестментс, кој размислува да ги купи Тотенхем Хотспур и Ливерпул - како и Манчестер Јунајтед, објави Блумберг њуз.
Ако успее во својот план, шеикот Џасим сигурно ќе наиде на ривали каде и да се сврти. Манчестер Сити, и покрај тоа што се соочува со надзор на трошењата во Премиер лигата, се уште е голема финансиска сила во натпреварувањето. Од другата страна на Англија, Њукасл моментално минува низ ренесанса финансирана од неговите најнови сопственици - Саудискиот државен инвестициски фонд. Двата клуба треба да се сретнат в недела во финалето на англискиот Лига куп.
.webp){kind=icon}
