text size
Глобалните цени на луксузните куќи паднаа во првиот квартал годинава за првпат од финансиската криза. Индексот на примарните цени во 46 града се намали за 0,4 проценти на годишно ниво, што е прв ценовен пад од 2009 година, според консултантската куќа за недвижности „Најт Френк“ (Knight Frank). Тоа претставува остар пресврт од растот од 10 проценти што беше забележан во четвртиот квартал од 2021 година.
Пазарот на становите во Нов Зеланд забележа најголем пад, при што цените на луксузните домови во Велингтон, Окланд и Крајстчрч паднаа со двоцифрен процент. Пад на цените забележаа и неколку големи градови, вклучувајќи ги Сан Франциско, Њујорк, Лос Анџелес, Хонгконг и Ванкувер.
Промена на цената на луксузните домови на годишно ниво / Bloomberg Mercury
„Забавувањето на растот во голема мера е поттикнато од наглото покачување на каматните стапки по неодамнешното заострување на глобалната монетарна политика“, напиша Лијам Бејли, глобален раководител за истражување во „Најт Френк“.
Сепак, поголемиот дел градови што ги следи компанијата забележаа пораст на цените во првиот квартал, при што Дубаи и Мајами забележаа двоцифрен процентен раст на цените. Имено, луксузните станови во Дубаи поскапеа дури за 44 проценти, со што нивната цена од ерата на пандемијата, односно од март 2020 година, порасна за вкупно 149 проценти.
„Иако пазарите на луксузните станови најверојатно ќе се соочат со континуиран надолен притисок во следните неколку квартали, има само малку знаци за можно повторување на финансиската криза, кога индексот падна за 8,2 процента“, напиша Бејли.
.webp){kind=icon}
