.webp){kind=icon}
„Хермес“ (Hermes) забележа значително зголемување на продажбата и профитот, издвојувајќи се меѓу конкурентите во луксузната индустрија благодарение на континуираната побарувачка за неговите висококвалитетни чанти „биркин“, особено во САД и во Кина.
Приносот и растот на продажбата во првата половина од годината ги надминаа процените на аналитичарите. Приходите во Америка се зголемија за 21 отсто во вториот квартал, што е речиси двојно повеќе од очекувањата на аналитичарите. Цената на акциите порасна за 4,3 отсто на париската берза.
„Хермес“ ги надмина ривалите ЛВМХ (LVMH Moet Hennessy Louis Vuitton SE) и „Ричмонт“ (Richemont), кој стои зад брендот „Картие“ (Cartier), кои известија за послаба побарувачка во САД по двегодишна успешна продажба.
„Побарувачката остана силна во сите региони во јули“, рече извршниот претседател Аксел Думас, додавајќи дека е уверен оти ќе остане така до крајот на годината.
„Во тешки времиња постои стратегија што во финансиите ја нарекуваме ’лет кон квалитет’, од која ние имавме корист“, рече Думас, додавајќи „не сакам да го расипам тоа“.
Оперативната добивка се зголеми за 28 отсто, на 2,95 милијарди евра (3,24 милијарди долари) во првата половина од годината, а маржата достигна рекордни 44 отсто.
Аналитичарите сметаат дека „Хермес“ е во посебна категорија кога станува збор за моќта на ценовната политика, бидејќи побарувачката за неговите чанти секогаш го надминува производствениот капацитет. Тоа значи и дека многу чанти имаат поголема вредност на пазарот за препродажба.
Дуќан на „Хермес“ во Париз/Bloomberg
„’Хермес’ ја соборува целата индустрија за луксузни стоки“, напиша аналитичарот Лука Солка од „Бернштајн“.
Приходот на ЛВМХ во САД падна за 1 отсто во вториот квартал на органска основа. „На растот на ’Хермес’ во Америка влијаеше работата на сите сектори, а најмногу поголемиот обем на продажба“, рече Думас. Продажбата во некои региони, вклучувајќи ја и Кина, исто така се зголеми за повеќе од една третина.
Думас рече дека профитабилноста е историски посилна во првата половина од годината.
Акциите на „Хермес“ ги надминаа своите конкуренти од светот на луксузот, зголемувајќи се за околу една третина годинава, а и пазарната капитализација оваа година го надмина симболичниот праг од 200 милијарди евра.
Џејн Биркин, актерката што беше муза за моделот на чантата што го носи нејзиното име, почина во почетокот на овој месец.
„Таа беше драга пријателка на нашата куќа“, рече Думас, опишувајќи ја како „сестрана слободоумна“ уметница, која му била блиска на неговиот вујко Жан-Луј Думас, кој порано ја водел компанијата. Откако во 1980-тите ја сретнал на еден лет, Жан-Луј го прифатил нејзиниот дизајнерски предлог за моделот на чантата што набрзо стана еден од најбараните производи на брендот.
Производителот на чантите „кели“, именувани по актерката Грејс Кели, има цел годишно да отвора по еден нов погон за производство на кожа во Франција за да ја одржи стапката на раст од околу 7 отсто за своите кожени производи.
Компанијата соопшти дека нема планови дополнително да ги зголемува цените на производите оваа година по порастот во јануари.
