.webp){kind=icon}
Златан Ибрахимовиќ игра падел. Неодамна дури и го предизвика Новак Ѓоковиќ. Енди Мареј е толку голем љубител на спортот што лично инвестира во британската падел-компанија „Гејм фор падел“ (Game4Padel). Луксузните брендови низ светот се тркаат да спонзорираат турнири во падел.
Покрај професионалните спортисти, играњето падел станува дел од животниот стил на деловниот свет што сака да биде активен и кој сака малку конкуренција. Има голем интерес за падел, што ја зголемува неговата цена, исто како и во бизнисот. Тоа е најважната причина зошто паделот се смета за престижен спорт.
Поради сличноста со тенисот, постојат неколку верзии на приказната за потеклото на паделот. Официјалните информации се дека е создаден во Мексико во 1969 година, благодарение на идејата на Енрике Коркуера, кој сакал да создаде динамичен спорт за сите возрасти и физички способности. Првиот официјален терен за падел е изграден во Шпанија во 1974 година, кога Алфонсо де Хоенло го донесе овој спорт во Европа. Денес паделот се игра во повеќе од 90 земји во светот, а неговата популарност забрзано расте. Освен Латинска Америка и САД, каде што овој спорт е омилена рекреација, во Европа е најпопуларен во Шпанија, Норвешка и Шведска. Се очекува паделот во иднина да стане редовен спорт на Олимписките игри.
Терен за падел на отворено| Padel Bros
Во разговор со тренерот за падел Милан Бошковиќ од Белград, кој своето знаење го стекнал во Америка, откриваме сè што треба да знаете за овој сè попопуларен рекреативен спорт во регионот Адрија, каде што расте бројот на луксузни центри за падел, кои покрај надворешни и внатрешни терени, нудат и други погодности за релаксација, како што се спа и ресторански услуги и продавници каде што можете да купите опрема за падел.
„Овој луксузен спорт овде сè уште е во развојна фаза и главно се игра рекреативно. Особено ги привлекува деловните луѓе, директорите и сопствениците на компании. Другата половина е составена од поранешни професионални спортисти од различни спортови. Падел е одличен избор за нив бидејќи е динамичен и физички напорен, со што им овозможува да останат во форма дури и по завршувањето на нивната професионална кариера. Топчињата што се користат во паделот се под притисок и направени од гума. По големина и тежина се слични на тениските, но се помеки и помалку отскокнуваат од земја. Притисокот внатре во топчето е таков што тие не отскокнуваат толку високо, што влијае и на физичката ангажираност. Тоа овозможува подолго надигрување и поголема контрола во текот на играта и ветува сериозни 600 калории за еден час. Околу 90 проценти од играчите се мажи, иако има и сè повеќе жени“, вели Бошковиќ.
„Една од карактеристиките што го прават паделот луксузен спорт е големата побарувачка, како и трошоците за изнајмување терени, обука и опрема, во чие производство се користат скапи материјали и напредни технологии. Опремата може да се изнајмува од клубови, но многу играчи претпочитаат да имаат своја опрема, што ги одразува нивниот личен стил и престиж. Една од неопходните работи во кои играчите треба да инвестираат се патиките за падел, бидејќи не им дозволуваме да излезат на теренот без нив“, додава тој.
Најпопуларни термини за падел се оние по работа | Depositphot
Патиките за падел чинат околу 100 евра. Достапни се во спортските продавници како дел од понудата на стандардните брендови на спортска опрема: „Адидас“ (Adidas), „Најк“ (Nike), „Рибок“ (Reebok), но има и специјални брендови за падел чии производи, засега, може да се нарачаат онлајн. „Булпадел“ (Bullpadel) и „Нокс“ (Nox) се само некои од нив и нудат задолжителна и придружна опрема за падел: торби за рекети, грип-лента што се намотува на рачката и сл.
Рекетот за падел се разликува од тенискиот рекет по тоа што е пократок и нема жици, туку е направен од фиберглас, карбонфибер или други материјали. Цената на рекетот се движи од 100 до 300 евра.
Од другите давачки потребни за падел, изнајмувањето терен за време од еден час чини од 20 до 30 евра, а индивидуален час со професионален тренер чини околу 40 евра. „Потребни се 15-20 часа за оние што никогаш не играле тенис и се апсолутни почетници. Тоа е доволно за да ја совладаат техниката на пристојно ниво за да уживаат во спортот. Правилата се релативно едноставни и лесни за разбирање, што го прави забавен и достапен спорт за играчи од сите нивоа на вештини. Една од предностите на паделот е тоа што брзо се учи“, истакнува Бошковиќ и додава дека паделот е привлечен бидејќи се игра во тимови од по двајца играчи, што дополнително ги поттикнува дружењето и тимскиот дух.
Зошто бизнис-заедницата се пронаоѓа во паделот
Покрај физичкиот ангажман, кој ветува добра форма, причина за популарноста на паделот е и тоа што е стратегиска игра, така што вештините од деловното поле се лесно применливи и на теренот. Со комбинирање на следните клучни деловни стратегии, играчите можат да ги подобрат перформансите и да постигнат добар резултат (системот на бодување во падел е сличен како кај тенисот, со натпревари што обично се играат во формат подобар од три сета).
• Комуникација: Ефикасната комуникација меѓу партнерите е од суштинско значење за координирање на тактиките и потезите.
• Позиционирање: Играчите на падел мора мудро да ја изберат својата позиција на теренот за да ги искористат слабостите на противникот и да имаат поголема контрола врз играта.
• Тактика: Потребно е добро да се размисли за изборот на удари во согласност со ситуацијата на теренот.
• Точен прв чекор: Сервирањето е важно за понатамошниот тек на играта.
Терен за падел во затворено| Padel Bros
Патем, во падел сите сервиси се изведуваат под раката (пределот под половината), за разлика од тенисот, каде што сервисот е над главата и целта е да се испрати дијагонала преку теренот во сервисниот простор на спротивната страна од мрежата. Играчот што сервира мора да држи една нога зад линијата за сервис сè додека не го удри топчето, а сервисот мора да се изведе откако топчето прво ќе ја допре подлогата.
„Теренот за падел е помал од тенискиот терен, со стаклени ѕидови, кои овозможуваат топката да отскокнува од ѕидовите, што создава дополнителна динамика и тактички предизвик во играта. Подлогата е вештачка трева со стандардизирани карактеристики, под која има бетон, а над неа се посипува ситен песок“, објаснува Бошковиќ. За оние што гледаат на паделот како на деловна инвестиција, цената на основен модел на терен за падел е од 10 до 15 илјади евра, па до 30 илјади евра за панорамски модел што има стакло во еден дел, што овозможува поубав изглед, но исто така подобар преглед на теренот. Клубовите обично имаат од четири до шест терени со придружни објекти (соблекувални, бањи, кафулиња и ресторани, сауни и простории за масажа). Бошковиќ посочува дека поради малиот број на вакви центри во земјите од регионот, препорачливо е термините да се резервираат навреме, а истакнува дека најрезервирани термини во центарот „Падел брос“ во Белград се оние по работа и дека падел се игра до полноќ.
