Како да го намалите загадувањето само со еден клик?

Во време кога аерозагадувањето во повеќето македонски градови е алармантно, група ентузијасти развиваат иновативни методи што носат позитивни промени во општеството. Нивната цел не е само да ја издигнат еколошката свест туку и да понудат конкретни алтернативи. 

Сте слушнале ли за банка за дрвја? Знаете ли дека можете да бидете наградени ако пешачите или возите велосипед? Имате ли воопшто претстава кои бизниси кај нас се зелени и општествено одговорни? Одговорите ги дознавме само со неколку клика.  

Treebanks

Ако веќе планирате да го резервирате вашето следно патување, добро е да знаете дека во исто време можете да помогнете и во борбата против енормното загадување во Македонија, и тоа без дополнителни трошоци. Како?  

„Трибенкс“ е уникатна семејна платформа основана од агрономот Митко Стевчев и неговите синови Михаил и Невен, ИТ-инженер и лекар. За секоја резервација на Букинг (Booking), Киви (Kivi) и Агода (Agoda) направена преку нивните линкови тие добиваат мал процент што го инвестираат во садење дрвја. 

Проектот го почнале како локална идеја, но сфатиле дека може да биде и глобален концепт. Сега садници за пошумување купуваат и со средства што ги собираат преку продажба на специјално дизајнирани маици и дуксери со нивното лого, кои може да се нарачаат и надвор од Македонија и чинат од 16 до 45 долари.  

Дрвјата ги садат самостојно, со помош на волонтери. Локациите ги договараат со ЈП „Национални шуми“ и досега засадиле над 15.200 чемпреси, јавори, багреми, јасени... Нивната мисија е да засадат милион дрвја низ светот. 

Depositphotos

Yes for less 

Во јули минатата година беше промовирана првата македонска платформа што ги популаризира екосвесните бизниси. Основачките Катерина Илијовска и Сара Коцевска со оваа идеја победија на натпреварот за социјално претприемаштво „Рајс џурни“ (RISE Journey) и добија грант и менторска поддршка истата таа да ја доразвијат. 

Нивниот концепт овозможува само со еден клик да им пристапите на бизнисите во земјава што нудат најразлични еколошки производи, услуги и искуства.  

Овде ќе најдете информации за местата каде што се селектира и рециклира секаков вид отпад - пластика, хартија, стакло, облека, електроника, па дури и отпадни масла за готвење. 

На сајтот се нуди и еколошка алтернатива за различни типови производи, од нега и козметика, до органска и локално одгледана храна.  

Според податоците наведени на платформата, нивната база на клиенти во моментов има над 35 бизниси што придонесуваат за почиста и поздрава животна средина. 

Challenger 

Оваа мобилна апликација за одржливо живеење ги охрабрува своите корисници да не користат автомобили и да се одлучат за еколошки транспортни методи како што се пешачењето и возењето велосипед.  

За секој изминат километар се заработуваат поени со кои се овозможуваат награди и попусти кај одбрани локални бизниси. 

Апликацијата генерира дневни, неделни и месечни предизвици преку кои корисниците меѓусебно се поддржуваат, инспирираат и се натпреваруваат со една цел - да станат општествено одговорни граѓани. 

Соосновачите на платформата сметаат дека „Челинџер“ има потенцијал да стане моќна интерна алатка и кај компаниите како составен дел од нивните тим-билдинг активности.