Потрошувачите на луксузни стоки се вртат кон одржливоста и екологијата

Навиките на потрошувачите што купуваат луксузни производи брзо се менуваат, а во последните неколку години тие сѐ повеќе се фокусираат на одржливоста и поставуваат етички прашања, заклучија говорниците на конференцијата „Иднината на луксузот“ ("The Future of Luxury"), која ја организира „Блумберг Адрија“.

На првиот панел говорниците одговараа на прашања за промената на навиките на потрошувачите во светот на луксузот, кој брзо се менува. Панелистите од перспектива на различни сектори – луксузни јахти, автомобили и пластична хирургија – претставија кои се новите трендови што  ја менуваат индустријата и се обидоа да предвидат во која насока се движи таа.

Како што истакна Фарук Нефзи, маркетинг-директор на „Федшип“ (Feadship), конструктор на суперлуксузни јахти, на панелот „Променети барања и потреби на потрошувачите“, сѐ повеќе луѓе се свесни за животната средина и сѐ повеќе од нив поставуваат прашања за одржливоста.

Според него, нема јахтинг без чиста вода и чисти океани - секој сака да плови во убава околина.

„Кога се гради јахта, само пет проценти се посветени на изградбата на јахтата, емисиите на јаглерод диоксид, а 95 проценти на животниот век на јахтата кога плови. Ние кога ги градиме ги земаме предвид елементите на одржливите материјали, алтернативите и слично“. Тој додаде дека нивните јахти траат вечно - сите јахти што ги изградиле во последните 75 години сè уште пловат.

И во секторот на автомобилите и пластичната хирургија, одржливоста е неизбежна тема

Во автомобилскиот сектор неизбежна тема за одржливоста се електричните возила. Мекенси предвидува дека електричните возила ќе сочинуваат најмалку 50-60 отсто од луксузниот сегмент до 2030 година, а Александра Ѓурѓевиќ, извршна директорка на „Делта авто груп“, вели дека постигнувањето нула емисии веќе започнало и дека нема враќање назад на патот кон одржливоста.

„До 2035 година доаѓаат нула емисии. Нема враќање назад. Понекогаш луѓето овде се прашуваат дали ќе бидеме подготвени за тоа - тоа не е прашање. Можеме некое време да рециклираме автомобили, но тоа не е решение. Електричните возила се многу моќни и брзи“. Тоа е краток рок, додава таа, но верува дека до 2030 година половината ќе бидат електрични, а преостанатите ќе бидат хибридни.

Одржливоста ја менува и индустријата за пластична хирургија, а Игор Вишњар, специјалист по пластична, реконструктивна, естетска и општа хирургија, вели дека во пластичната хирургија промената е единствената константа.

Тој додаде дека на тоа поле се цени идејата за класичната безвременска убавина, како и грациозното стареење. „Во таа индустрија владее тренд да направите што помала штета на ткивото, а да постигнете што е можно поголем ефект“, посочи тој. Тој додаде дека материјалите што се користат во оваа индустрија со текот на времето се менуваат, како и дека е важно хирурзите да користат квалитетни материјали и со тоа да ги заштитат пациентите.

„Би било поевтино да се купат поевтини материјали, но тие се токму такви - евтини. Она што го работам, јас не го гледам како работа, туку како искуство. Мојот производ е ефектот што го создавам со процедурата. Мојот производ е промена на самодовербата и размислувањето кај некого“, рече Вишњар.

Растот на цените е константна појава

Во последно време се чини дека трендот на раст на цените е константна појава. Во автомобилската индустрија цените пораснаа меѓу 10 и 30 отсто, во зависност од сегментот, а Ѓурѓевиќ вели дека цените ќе продолжат да растат, на чело со азиско-пацифичкиот регион. „И во Европа ќе растат цените, но растот ќе го предводат Пацификот и Кина“, истакна таа.

Ни кај јахтите не е ништо поинаку. Сѐ додека има инфлација, вели Нефзи, ќе растат и цените на јахтите. Како што додаде тој, на цените влијае и тоа што овој сегмент од индустријата на луксузот има голем проблем со вработувањето и растот на платите. „Цените се за 20-30 отсто повисоки отколку во периодот веднаш по пандемијата“.

Индустријата на луксузот ќе се развива според искуството

Како што заклучија панелистите, индустријата на луксузот особено ќе се развива според искуството. Веќе не е важен само производот туку и искуството што стои зад него.

„Мислам дека индустријата на луксузот е ориентирана кон производот. За среќа, сфативме дека најважните работи во луксузот се нивото на ескапизам, благосостојбата и здравјето и, што е најважно, квалитетно поминатото време“, рече Нефзи.

Тој додаде дека на јахтите, нивните цени и на промената кај купувачите особено влијаела пандемијата на ковид-19. „Пандемијата е најдоброто нешто што ѝ се случи на индустријата за јахти - продававме како луди, како никогаш досега. Сите сфатија дека јахтингот е начин да избегате од ограничувањата поради пандемијата и квалитетно да го поминете времето со оние што ги сакате “, истакна тој.

Нефзи рече дека Порто Монтенегро е пример за импресивна марина и дека има голем потенцијал. Тој додаде дека на сите им е доста од типични дестинации, а како највпечатлива марина ја издвои Доха во Катар.

И другите панелисти го истакнаа потенцијалот на регионот во овој сегмент. Додека средната класа се шири, а новите генерации влегуваат на пазарот, брендовите добиваат можност да стекнат клиенти за себе - не само во Кина и Индија туку и во регионот Адрија.