Документарна серија за Тејлор Свифт пристигнува на „Дизни+“

Компанијата „Волт Дизни“ (Walt Disney Co.) најави шестделна документарна серија за случувањата зад сцената на светската турнеја „Ерас тур“ (Eras Tour) на Тејлор Свифт – најпрофитабилната концертна турнеја на сите времиња.

Серијата под наслов „Тејлор Свифт, Ерас тур: Крајот на една ера“ („Taylor Swift / The Eras Tour / The End of an Era“) ќе има премиера на 12 декември на платформата „Дизни+“ (Disney+), што Свифт го објави на социјалните мрежи и во емисијата „Добро утро, Америка“ (Good Morning America). Премиерата ќе се совпадне со излегувањето на новиот концертен филм, снимен на завршниот настап од турнејата во Ванкувер.

Документарецот ќе им овозможи на обожавателите поглед зад сцената и ќе покаже како се создавал спектаклот што Свифт го изведе во 51 град на пет континенти, од март 2023 до декември 2024 година. Турнејата оствари приход од повеќе од две милијарди долари и привлече над десет милиони посетители.

По објавата на веста, акциите на „Дизни“ во понеделникот пораснаа за 1,2 отсто на берзата во Њујорк. Првите две епизоди ќе бидат достапни на 12 декември, додека наредните две ќе се емитуваат секоја следна недела, се наведува во соопштението на „Добро утро, Америка“.

Според изјавата на „Дизни“, серијата ќе „ги следи развојот, влијанието и внатрешното функционирање на феноменот Ерас тур“, а ќе понуди и интимен увид во животот на пејачката ѕвезда. Во епизодите ќе се појават и познати имиња како Грејси Абрамс, Сабрина Карпентер, Ед Ширан и Флоренс Велч.

Покрај серијата, на „Дизни+“ пристигнува и документарниот концертен филм „Тејлор Свифт: Финалниот настап“ („Taylor Swift / The Eras Tour / The Final Show“) – целосен запис од последниот концерт на турнејата, снимен на 8 декември 2024 година во арената „Би-си плејс“ (BC Place) во Ванкувер. Филмот за првпат ќе го прикаже целиот сет песни од албумот „The Tortured Poets Department“, кој Свифт го објави за време на турнејата.

Да потсетиме, претходниот концертен филм „Тејлор Свифт: Ерас тур“ („Taylor Swift: The Eras Tour“),
прикажан во киносалите во октомври 2023 година, стана најуспешниот концертен филм на сите времиња. Неговото продолжение имаше премиера на „Дизни+“ во март 2024 година.

Повеќекратно наградуваната пејачка неодамна го објави и својот нов албум „The Life of a Showgirl“, заедно со караоке-филмот „The Official Release Party of a Showgirl“, кој го дистрибуира компанијата „Еј-ем-си ентертејнмент“ (AMC Entertainment Holdings Inc.).

Новиот албум само во првата недела се продаде во повеќе од четири милиони примероци во САД, покажуваат податоците на компанијата „Луминејт“ (Luminate) – со што беше соборен рекордот што дотогаш го држеше британската пејачка Адел. Бројката ги опфаќа и физичките изданија и стриминг-преслушувањата.