Еуфоријата по Лабубу може да пукне како балонот со „Бини бејбис“, велат аналитичари

Еуфоријата околу играчките Лабубу на компанијата „Поп Март“ (Pop Mart International Group Ltd.) сè повеќе личи на циклусот на брз подем и пад што во 1990-тите заврши со колапсот на „Бини бејбис“, според единствениот аналитичар што има препорака за „продажба“ на акциите на „Поп Март“. Хистеријата по Лабубу наскоро ќе го достигне својот врв, а сомнежите околу тоа што би можело да биде следниот двигател на продажбата на „Поп Март“ укажуваат дека акциите имаат ограничен простор за раст, смета Мелинда Ху, истражувачка аналитичарка во „Бернстин“ (Bernstein) во Хонгконг.

„Реткоста, потрагата, налетот на допамин и секундарниот пазар“ што ја поттикнуваат популарноста на Лабубу потсетуваат на шпекулативниот циклус на играчките „Бини бејбис“, вели Ху. „Не би им препорачала на долгорочните инвеститори да ја зголемуваат својата изложеност кон акциите без суштински промени во стратегијата на компанијата“, додава таа.

Златната ера на акциите на „Поп Март“ можеби веќе заврши. Акциите на компанијата што котира во Хонгконг паднаа за повеќе од 30 отсто во однос на августовскиот максимум, при што некои од загубите се случија откако еден вработен за време на пренос во живо ја доведе во прашање цената на една од „кутиите со изненадување“ (blind-box).

Овој пад следуваше по растот на акциите од над 1.500 отсто од почетокот на минатата година до август.

Од 46 аналитичари што ја покриваат „Поп Март“, дури 42 имаат препорака „купување“ или еквивалент, а тројца ја оценуваат акцијата како „задржи“, покажуваат податоците на „Блумберг“. Акциите паднаа за околу 25 отсто откако Ху почна да ја покрива компанијата на 16 октомври, со оцена „под перформансите“.

Ху, која работи во „Бернстин“ околу седум години, во моментов покрива десет компании, меѓу кои „Анта“ (ANTA Sports Products Ltd.) и „Шисејдо“ (Shiseido Co.). Инвеститорите што ги следеле нејзините препораки би оствариле просечна загуба од 5 отсто во последните шест месеци, во споредба со просечниот пад од 2,7 отсто кај другите аналитичари.

Позиционирањето на инвеститорите покажува растечка скепса во однос на краткорочните резултати на „Поп Март“. Таканаречениот „краток интерес“ (short interest), изразен како дел од вкупниот слободен промет, порасна на 2,8 отсто заклучно со четвртокот, највисоко ниво од април 2024 година, покажуваат податоците на „Ес енд пи глобал“ (S&P Global Inc.).

„Бини бејбис“, кадифените играчки во облик на животни, станаа огромен хит кон крајот на 1990-тите, сè додека не почнаа да се третираат како инвестиција. Балонот пукна околу 1999 година, а денес овие играчки во најголем дел немаат вредност.

Што е со другите франшизи на „Поп Март“?

Акциите на „Поп Март“ паднаа за повеќе од 9 отсто на 23 октомври, кога резултатите за третиот квартал ги надминаа прогнозите, но не ги отстранија стравувањата дека растот ќе забави до 2026 година. Зголемената зависност на компанијата од Лабубу сè повеќе ги загрижува инвеститорите: серијата „Монстерс“ (Monsters), во која спаѓа и овој лик, учествуваше со околу 35 отсто од вкупниот приход во првата половина од годината, наспроти 14 отсто една година претходно.

„Дебатата меѓу оптимистите и песимистите се сведува на едно прашање: Може ли компанијата да се ослободи од зависноста од Лабубу и да поттикне раст преку други ликови?“, вели Ху, мислејќи на интелектуалната сопственост.

„Бернстин“ проценува дека годишниот приход на „Поп Март“ ќе го достигне својот врв со раст од 145 отсто годинава, додека маржите постепено ќе опаѓаат поради растечките трошоци за маркетинг за одржување на популарноста на ликовите и финансирање на меѓународното проширување.

Иако падот на цената на акциите веќе ја спушти вредноста под едногодишната целна цена на Ху од 225 хонгконшки долари, таа засега не ја менува проекцијата, наведувајќи дека станува збор за долгорочна оценка.

Bloomberg

Дали Лабубу сепак ќе опстане?

Оптимистичките аналитичари посочуваат неколку позитивни фактори, меѓу кои раната фаза на глобалната експанзија на „Поп Март“ и напорите за диверзификација на портфолиото на производи.

„Сметаме дека пазарот ги потценува проактивните чекори на ’Поп Март‘ за зголемување на популарноста на нивните ликови“, напишаа аналитичарите на „Морган Стенли“ (Morgan Stanley), Дастин Веин и неговиот тим. Покрај лансирањето нови производи, нивната активност во забавната индустрија, како тематски паркови, филмови и соработки со познати личности, претставува ефикасен начин за продолжување на животниот век на ликовите.

„Поп Март“ има и една одржлива алтернатива за Лабубу, посочува „ЏП Морган“ (JPMorgan Chase & Co.).

„‘Твинкл твинкл’ (Twinkle Twinkle) привлекува автентична база на обожаватели и не функционира само како замена кога потрошувачите не можат да го купат Лабубу“, напиша аналитичарот Кевин Јин. Оваа линија на играчки ќе учествува со 8 отсто од продажбата до 2027 година, во споредба со 2,8 отсто во првата половина од годинава.

Ху останува скептична. „Сè уште не сум видела доказ дека другите ликови можат самостојно да генерираат стабилен интерес“, вели таа. „Видливоста на долгорочната одржливост на растот на ’Поп Март‘ е многу ограничена.“

Аналитичарката на „Бернстин“ исто така се сомнева дека Лабубу може да изгради трајна популарност како Хелоу Кити на „Санрио“ (Sanrio) или куклите Барби на „Мател“ (Mattel).

Кај Хелоу Кити и Барби „нема шпекулативен маркетинг, нема намерна оскудност, нема механика на ’кутија со изненадување‘ , нема купување водено од допамин“, вели Ху. Производите се постојано и лесно достапни за сите потрошувачи — што е клучно за нивниот стабилен долгорочен раст.