Како да го обиколите езерото Гарда во Италија за три дена?

Во Италија постојат повеќе од 1.000 езера, но најголемото во земјата, езерото Гарда, несомнено е едно од најдраматичните и најживописните. Сместено е помеѓу Алпите и Доломитите, и долго е 51 километар од својот северен врв до јужниот крај, а пространите води на езерото Гарда се опкружени со историски градови на брегот, недопрени плажи, замоци и планинарски патеки. Што и да изберете од ова, одморот на езерото Гарда нема да ве разочара.

Гарда е најголемо езеро во Италија | Nataša Kočiš

Езерото Гарда, или Lago di Garda како што го нарекуваат Италијанците, нуди разновиден брег со должина од околу 160 километри, кој се протега од ниските брегови на југ до стрмните карпести падини на неговиот најсеверен дел, во подножјето на Алпите, и без многу напор го спојува алпскиот шарм со италијанската елеганција. Без разлика дали патувате сами, со деца, дали сте во потрага по авантура или пак барате луксузни хотели, езерото Гарда нуди изобилство избори - мирни плажи, погледи што го одземаат здивот, живописни градови, воодушевувачки планински предели, возбудливи авантури на отворено, живи фестивали и пазари, и незаборавни кулинарски искуства.

Nataša Kočiš

Најдобриот начин да го запознаете регионот е преку истражување на градовите, што во случајот на езерото Гарда значи дека ќе бидете разгалени со избор. За краток одмор препорачувам неколку.

Сирмионе

Сликовит град на полуостровот на јужниот брег на езерото Гарда во Ломбардија, каде единствениот начин да влезете е преку подвижен мост. Познат е по замокот од 13 век - Скалигеро Касл (Scaligero Castle), римските остатоци Гроте ди Катуло (Grotte di Catullo), и претставува совршен спој на историја, одмор и живот покрај езерото. Неговиот шармантен стар град без автомобили и сликовитите карпи и плажи, вклучувајќи ја познатата плажа Јамајка (Jamaica Beach), го прават една од најбараните дестинации на езерото. Познат е и како спа и велнес центар бидејќи има термална бања која има корени уште од римско време, но официјално е во употреба од 1889 година.

Лимоне сул Гарда (Limune Sul Garda)

Приод кон градот Лимоне со брод | Nataša Kočiš

 

Историското село на западниот брег на езерото во Ломбардија е сместено меѓу драматичните планински падини и кристално чистата вода на западниот брег. Лимоне е познат по своите древни насади со лимони и пастелно обоениот стар град со калдрмисани улици, живото пристаниште и некои од најдобрите велосипедски патеки. Ова мало место е идеално за опуштање, излети со брод, возење велосипед, планинарење и водени спортови. 

Лазисе

Лазисе, старото пристаниште | Nataša Kočiš

Градот гледа кон југоисточниот брег, на веронската страна од езерото. Познат е по своите шармантни пејзажи и значајната уметничка и историска вредност, но и како дестинација за оние што бараат момент на опуштање и рекреација.

Лазисе е целосно опкружен со прстен од ѕидини со кули кои го опфаќаат историскиот центар, денес исполнет со елегантни ресторани и занаетчиски дуќани. Внатре во ѕидините ќе го видите прекрасниот центар на градот, со сликовитото старо пристаниште и Венецијанската царина свртена кон езерото, како и неговите величествени цркви.

Ако случајно се најдете овде во среда наутро (што го препорачувам), прошетајте низ центарот на градот каде што се одржува локалниот пазар: обично трае од рано утро до пладне и е добра прилика за купување локални производи, како што се вино, маслиново масло и сирење.

Локални производи на пазар | Nataša Kočiš

Дезенцано дел Гарда

Крајно жив град на југозападниот брег на езерото, отворен во текот на целата година, кој често се смета за „престолнина“ на езерото поради својата големина и живата атмосфера. Овој симпатичен град нуди мешавина од римска историја, динамичен ноќен живот, шопинг и одлични сообраќајни врски, што го прави одлична база за посетување на другите градови околу Гарда.

Архитектурата во Лимоне | Nataša Kočiš

Малчесине 

Мал град на североисточниот брег на езерото, сместен во регионот Венето, покраината Верона, во подножјето на планинскиот масив Монте Балдо, кој е мека за едриличари и сурфери на штица, но кој нуди и многу други можности за сечиј вкус.

Nataša Kočiš

Познат и како „бисерот“ на езерото, како и по средновековниот замок Кастело Скалигеро ди Малчесине (Castello Scaligero di Malcesine) кој доминира над градот, тесните камени улици и спектакуларните погледи кон езерото и планината Монте Балдо до која води и ротирачка жичница.

Особено е омилен кај оние што сакаат планинарење, скијање и параглајдинг.

Рива дел Гарда 

Се наоѓа на северниот врв на езерото и е главен центар на регионот Гарда во Трентино, во подножјето на Доломитите Брента. Го карактеризира живописниот стар град со шармантно шеталиште покрај езерото, но и стрмните планини, алпските предели и силните, постојани ветрови, поради што е совршено место за едрење и сурфање на штица. Освен тоа, Рива е одлична дестинација за оние што сакаат планинарење, возење велосипед и качување по карпи.

Домашен сладолед има на секој чекор | Nataša Kočiš

Вински туризам

Езерото Гарда има блага клима па затоа е совршено за истражување и посетување на локалните лозја како што се Валполичела, Соаве, Бардолино, Сгрева, Лугана, а најтешкиот дел е да се одлучи каде прво да се оди.

Бидејќи виното е еден од најважните производи, постојат многу фестивали во оваа област кои го слават во сите негови облици. Еве неколку препораки:

Феста дел вино (Festa del Vino) - Полпеназе (Бреша): се одржува веќе седумдесет години во последниот викенд во мај и е посветен на вината Валтенези и Ривиера дел Гарда.

Валтенеси ин Роси (Valtenesi in Rosi) - Монига (Бреша): првиот викенд во јуни, посветен на розе виното, а особено на Чиарето, најважното локално розе вино.

Профуми ди Мосто (Profumi di Mosto) - Пуегнано (Бреша): посветен на автохтоната сорта Гропело која се користи за многу локални вина, и се одржува во првата недела во октомври.

Феста дел ува е дел вино (Festa dell’Uva e del Vino) - Бардолино (Верона): деведесет години го слави истоимено вино и се одржува во првата недела во октомври.