На почетокот од 2021 година туристичкиот одбор на Хаваи започна нов план за инјектирање на автентичната домородна хавајска култура во секој аспект на индустријата за посетители, користејќи ја за да помогне во заштитата на своите заедници и кревките места, истовремено продлабочувајќи го туристичкото искуство.
Сега, само три години подоцна, иницијативата „Малама Хаваи“ или „Грижа за Хаваи“ за поттикнување одржлив туризам можеби е на крајот. Со оглед на тоа што претстои напорна летна сезона на патувања, законодавците на Хаваи не одвоија никакви средства за 25-годишната државна канцеларија за туризам во фискалната 2023-2024 година, кој ќе започне на 1 јули. А на крајот на април пратениците разгледаа два нацрт-закона за распуштање на Управата за туризам на Хаваи и нејзина замена со агенција што помалку ќе се фокусира на маркетинг на Хаваи за туристите, а повеќе ќе се насочи на управување со ресурсите на дестинацијата. Предлог-законот беше одложен, но многу познавачи на состојбите што зборуваа за „Блумберг“ предвидуваат дека исклучувањето на агенцијата од финалниот буџет значително ќе ги намали напорите во делот на управување со туризмот на островите.
Bloomberg
Џон де Фрис, главен извршен директор на Туристичката управа на Хаваи - ХТА (Hawaii Tourism Authority-HTA), рече дека без финансирање, работата на ХTA во управувањето со дестинациите, едукацијата на посетителите и маркетингот ќе биде загрозена. Тој рече дека ХTA ќе донесе тешки одлуки во наредните денови за откажување на постојните договори и тековната работа во заедницата.
Законодавците рекоа дека туристичката канцеларија може да искористи 30 милиони долари неискористени средства од Законот за американскиот план за спас за да продолжи со управувањето со туризмот, што е износ еднаков на половина од парите што ХTA ги побара за претстојната фискална година. Сето ова претставува за егзистенцијална закана за културните активности, фестивалите и можностите за волонтери, кои неодамна го направија Хаваи толку живописно место за посета.
Судирот меѓу законодавците и Туристичката канцеларија на Хаваи не е новост. Тој достигна точка на вриење во 2019 година, кога 1,5 милион жители на Хаваи гледаа како нивното место станува случај на прекумерен туризам со 10,4 милиони посети годишно. Меѓу несаканите ефекти на таа нерегулирана индустрија се ѓубрето што се фрла крај популарни знаменитости, плажи толку преполни што ќе ви биде тешко да најдете простор за крпа, корални гребени што страдаат од белење, сообраќајни метежи предизвикани од туристи што прават самослик и свети места што се сквернавени со графити или спрејови во боја.
За многу Хавајци, и внатре и надвор од владата, ХTA беше жртва на сопствениот маркетиншки успех на државата.
Bloomberg
Раководството од главно бели директори беше заменето со водство што речиси целосно го сочинуваа домородни Хавајци и целите на агенцијата повторно беа фокусирани на правење туризам поодржлив за секого. Започна кампањата „Малама Хаваи“, со која се ширеа одговорни туристички пораки до посетителите претходно и за време на нивните патувања, со цел посетителите да бидат повеќе свесни за кревкоста на прекрасните и свети места на Хаваи.
Промените помогнаа да се привлечат повеќе богати патници што трошат повеќе, што објаснува зошто во 2023 година се предвидува државата да инкасира рекордни една милијарда долари данок на хотелските услуги.
Владата оттогаш ги заузди овластувањата за трошење на канцеларијата за туризам, ја прекина директната линија за финансирање од хотелските даноци и почна да бара одобрување од државата за доделување договори и носење годишни буџети.
Bloomberg
Одржливост
За краток период ХTA постигна видлив и мерлив напредок. Повеќе од 25 проценти од посетителите на Хаваи од копнениот дел на САД, анкетирани во четвртиот квартал 2022 година, изјавиле дека виделе пораки пред и за време на нивното патување за грижа и почитување на културата, луѓето и околината на Хаваите.
Bloomberg
Што се однесува до планот за одржливост, сè поголем број државни паркови сега бараат резервации. За повеќе од двојно се зголеми бројот на волонтери за туристи преку проект финансиран од програмите на ХТА. Сето тоа помогна да се подобри расположението кај жителите за туризмот.
Квартална анкета, спроведена есента 2022 година, покажа дека речиси половина од испитаните 1.949 жители на Хаваи рекле дека веруваат дека туризмот е подобро управуван од претходно. Сепак, имаше мала промена во бројот на испитаници што велат дека нивниот остров повеќе служи за туристи отколку што се води сметка за жителите.
Bloomberg
Што следува?
Тие што повикуваат на затворање на ХTA се залагаат за изградба на поинаков вид туристичка канцеларија, која ќе се фокусира исклучиво на одржливо управување со туризмот, а не на маркетинг за туристите. Ќе биде потребно време да се воспостави, а тоа ќе донесе и трошоци.
На ризик се изложени програмите и искуствата, кои се исто толку вредни за туристите, како и за локалното население, настани спонзорирани од ХTA, како што е фестивалот на книгата и музиката на Хаваи во Оаху, кој ги слави хавајското наследство и култури преку раскажување приказни и песни, фестивалот на храна и вино на Хаваи, фестивалот „Мауи укулеле“, како и фестивалот за чоколади на Големиот Остров. Овие фестивали помагаат хавајските уметници и културата да бидат во центарот на вниманието, давајќи им на посетителите побогато искуство, а на локалното население значителни приходи.
Bloomberg
Доколку гувернерот Џош Грин не стави вето на предложениот државен буџет, многу од овие програми веројатно ќе претрпат кратења во следните од три до шест месеци.
„Да се одземе сето тоа е застрашувачко“, вели Сандерс од Асоцијацијата за угостителство на домородните Хавајци. Исто така, на ризик ќе бидат изложени и системите за резервации и мерките за контрола на метежот, кои во моментов го ублажуваат прекумерниот туризам во најкревките и најубави краеви на Хаваи.
.webp){kind=icon}
Во моментов нема коментари за веста. Биди прв да коментира...