Хотелиерот Шрагер сака повеќе да личи на „Епл“ отколку на „Мериот“

Раскинувањето помеѓу Иан Шрагер и „Мериот интернешнел“ беше, според сите извештаи, елегантна и пријателска разделба. 

Хотелиерот, најпознат по својот основачки удел во „Студио 54“ во Њујорк, во април 2022 година објави дека ќе се раздели со овој хотелски гигант, со кој ги градеше хотелите „Едишн“ откако компанијата го објави овој бренд пред 15 години. Но една година откако ја изрази намерата да си замине, конечно зборува за она што следува. 

Во ексклузивното интервју за „Блумберг“, Шрагер вели дека сè уште е одговорен за седум хотели „Едишн“. Потоа ќе се фокусира на „најважната идеја“ што некогаш ја имал - негови зборови - проширување на хотелот „Паблик“ на Лоуер ист сајд на Менхетн и создавање нов голем хотелски бренд (и попристапен конкурент на „Едишн“). 

„Се променивме, а луксузот денес има ново и поинакво значење“, објаснува тој, зборувајќи преку Зум од својот дом во Њујорк. „Луксузот денес претставува слобода - слобода од притисокот сè да се поедностави, слобода од временските ограничувања, слобода да им го посветите своето време на работите што ви се навистина важни“. 

Тоа може да звучи како добар инстинкт, но пристапот на Шрагер да го претвори „Паблик“ во луксузен бренд е невообичаен. Неговата идеја е да се прифати актуелниот тренд на намалување на работната сила за да се обезбеди високодизајниран производ по иста цена како и хотелите со проширен опсег на услуги (што значи помалку удобности што ги нуди хотелот). „Изгледот и атмосферата на местото, како и привлечноста на разновидна публика што ја привлекуваат пониски цени од другите лајфстајл-хотели на истите дестинации (и до 30-40 отсто пониски), го дополнуваат недостигот од услуги како што се портири или консиержи“, објаснува Шрагер. Со други зборови, неговата нова дефиниција за луксуз значи пониски цени, помалку удобности, храбар дизајн и многу интересни гости. 

„Не сакаме да ги преплавиме нашите гости со застарени услуги во бели ракавици, кои се стари двесте или триста години“, вели тој. „А причината поради која мислам дека ’Студио 54’ беше толку успешно е тоа што луѓето се чувствуваа целосно слободни додека беа таму“, додава тој, истакнувајќи го начинот на кој славните личности биле во целосна хармонија со обичните посетители од сите возрасти и потекла во познатиот клуб. 

Целта на Шрагер не е да се вклопи во постојните категории, туку да создаде нова. „Како би го категоризирале ајфон?“, прашува тој, не мислејќи на моментално достапната 14-та генерација на производот, туку на оригиналниот прв модел. „Што го прави купувањето телефон на ’Епл’ толку пожелно за луѓето од сите афинитети, од секаква демографија?“ Тој тврди дека ајфон ги разби предрасудите со генијалниот дизајн и утилитаризам. 

Тоа е начинот на кој тој го гледа „Паблик“. „Создавањето хотел што има срце на поевтин хотел со ограничени услуги, но душа на луксузен хотел и софистицираност на лајфстајл-хотел е новиот жанр“, тврди тој. 

Тој исто така го гледа тоа како иднина на бизнисот: „Луксузните хотели заработуваат профитни маржи од 8 отсто, додека хотелите со ограничени услуги можат да заработат дури 50 отсто“, вели Шрагер. „Паблик“ му овозможува да ги искористи финансиските придобивки од хотелот со ограничени услуги, а истовремено прави неговите гости да се чувствуваат како да престојуваат во нешто полуксузно. За разлика од „Мериот“, кој своите брендови ги дава под франшиза и обезбедува поддршка во управувањето, Шрагер ги поседува и управува со своите хотели; маржите се негова опсесија. 

Шрагер планира да изгради 10 хотели „Паблик“ во следните пет години - или дури и повеќе ако најде компанија што сака да продаде и преуреди некои од своите постојни локации. (Замислете хотелите „Ејс“ одеднаш да решат да се повлечат и да му дозволат на Шрагер да го ребрендира целото нивно портфолио.) Приоритет ќе бидат урбаните центри и местата што привлекуваат урбана популација; но исто како што „Едишн“ имаше огромен успех во Бодрум, ултрашик дел на турскиот брег, Шрагер вели дека „Паблик“ може да постои и во форма на ресорт. 

Прв на ред е „Паблик Вест Холивуд“, реконструкција на поранешниот хотел „Стандард“ на Сансет булевар, кој е планирано да биде отворен на крајот на 2024 година. Многу други локации се во план, но сите сè уште се непотврдени. Ако се реализираат моменталните договори што се во тек, тие ќе вклучуваат локација во Бруклин, ски-центар и нов тип на семеен камп во планините Кетскил. 

Со оглед на разновидноста на дестинациите, секој хотел ќе има и посебен дизајн. Шрагер нема намера само да ги копира неонски црвените подвижни скали што се заштитен знак на неговата оригинална локација во Сохо - и покрај моќното брендирање на легендарните бели спирални скалила на „Едишн“. (Знаете дека сте во „Едишн“ кога...) Една заедничка карактеристика може да биде големината: Шрагер цели на 175 до 225 соби како совршен број. „Сите треба да бидат уникатни, препознатливи, вистински погодок“, вели тој. Овие зборови честопати немаат никакво значење кога доаѓаат од големите брендови, но тие постојано го дефинираат секој неверојатно интересен проект на Шрагер, без разлика дали станува збор за хотелот „Гремерси парк“, „Делано“ или „Морган“. 

Но, исто како и ајфон, така и „Паблик“ веќе доживеа поскапување. Кога беше отворен првиот хотел во 2017 година, ветувањето беше дека цените ќе започнуваат од 150 долари за ноќ; сега е речиси невозможно да се најде соба под 320 долари, дури и во периодите на најмала побарувачка. Цените почесто се движат од 400 до 600 долари. Тоа е сè уште релативно евтино за Њујорк, но веќе не е толку поволно како што беше првично планирано. 

Шрагер тврди дека целта е луксузот да се направи достапен за сите. Времето ќе покаже дали хотелот може истовремено да биде достапен, профитабилен и луксузен.