Кога размислуваме за летен одмор од соништата, прво што ни паѓа на ум е некоја бајковита вила, спална соба со совршен поглед, плажа што остава без здив. Веднаш помислуваме на некој прочуен ресорт, иако со истиот буџет можеме да искусиме нешто многу понесекојдневно, а во исто време целосно приспособено на нашите потреби.
„Многумина мислат дека изнајмувањето јахта е само за богатите и славните, но искуствата покажуваат дека тоа не е баш така. Изнајмувањето брод може да ве чини приближно исто, понекогаш дури и поевтино од луксузен хотел, а тоа што ќе го добиете за возврат е неспоредливо“, вели нашата позната водителка и инфлуенсерка Елена Најдоски. која четврта година по ред практикува такво летување.
Елена Најдоски
Блумберг Адрија
Авторката на проектот „Живот со стил“ годинава третпат пловеше по Хрватска. Со сопругот Бојан и со уште две двојки во екот на сезоната изнајмија 12-метарски катамаран.
(Линк од бродот)
„Турите се секогаш на седум дена, од сабота до сабота. Бродот го изнајмувате во зависност од потребите. Првата година пловевме со едрилица и тоа е едно поадреналинско искуство, но и многу поприфатливо од финансиски аспект. Тогаш плативме 3.500 евра. Катамаранот е постабилен, поголем и покомфорен, на ниво на јахта, а сепак со универзална намена, па и со него можете да едрите. Поради сето тоа, разбирливо е и поскапа варијанта. Нашиот беше со четири кабини, овој пат бевме поголема екипа и сакавме да имаме и поголема комоција. Цените почнуваат од 5.000 евра, во зависност од опремата и годината на производство. Нашиот беше речиси нов, изграден во 2022 година, со одлично опремена кујна, со клима во секоја кабина и со интернет-пристап, и нè чинеше 8.500 евра. За гориво потрошивме 560 евра“, открива Најдоски.
Во оваа цена е вклучен само бродот. Сè друго се доплаќа. Во листата на фиксни трошоци спаѓа и капетанот на бродот, односно скиперот. Ако пловите со катамаран, во Хрватска тој ќе ве чини 200 евра од ноќ или вкупно 1.400 евра за целото патување. Доколку, пак, се одлучите за едрилица, ќе платите 350 евра помалку. Секако, за тие седум дена треба да му обезбедите и храна, но и посебна кабина за спиење.
Едрење
Блумберг Адрија
„Капетан ни беше пријател од Словенија. Поинтимно е кога имате свој човек, а и полесно ги договарате работите. Тој се грижи и за хигиената на бродот, иако сите партиципирате. Маршрутата се договара два-три дена пред поаѓање и многу зависи од временските услови. Можете да одберете помалку острови и да кружите околу нив или да видите повеќе места со пократки закотвувања. Изборот е ваш“, објаснува Елена.
ХВАР УБЕДЛИВО НАЈСКАП, ЛАСТОВО - РАЈ НА ЗЕМЈАТА
Одморот од соништата годинава го почнале од „Марина Каштела“, едно од најпосетуваните пристаништа. Прва дестинација им била таканаречената хрватска оаза на мирот и спокојот - прекрасниот остров Шолта. Утредента отпловиле кон Брач, па следувале Хвар, Корчула и она што најмногу ги фасцинирало, островот Ластово, кој во 2006 година беше прогласен за национален парк, а британски „Гардијан“ лани го вброи во топ 10 најегзотични острови во Европа.
„Можеби еден од најубавите острови во Хрватска е токму Ластово. Кога си на брод, предноста е што можеш да видиш и места што по копно воопшто не се достапни. Во една таква недопрена природа се уверивме токму овде“, коментира Најдоски.
Мирот и убавината на хрватскиот брег
Блумберг Адрија
Цените во Хрватска летово се топ тема не само во регионот туку и во западниот свет, а, според неа, револтот кај туристите е оправдана реакција.
„На Хвар никаде не можете да најдете мало шише вода поевтино од 2,5 евра. Храната е значително поскапа. Последиците се веќе воочливи. Пред две години Бол на Брач беше преполн со туристи, овој пат половина од кафулињата не работеа. Сè е поскапено за 50 отсто“, информира нашата соговорничка.
Што се однесува до наутичкиот туризам, таа вели дека во Хрватска е многу поорганизиран, поразвиен и помодерен од оној во Грција, барем по тоа што лани го доживеала пловејќи по островите на Јонско Море.
„Грција е малку поевтина алтернатива за ваков тип одмор, ама џет-сетот е во Хрватска. Во Грција сè е некако потивко, попензионерски, пристаништата се понесредени. Можете да избирате каде ќе се закотвите, некој од локалните жители ќе ви понуди и јадење, а во Хрватска речиси нема импровизации. Едно закотвување на „АЦИ Марина Палмижана“ чини 200 евра од ноќ. Исто толку ќе треба да платите и на Бол. Секако дека постои и поевтина варијанта, да се врзете на пловка, која во зависност од популарноста на местото чини од 30 до 100 евра. Сепак, во одреден момент мора да ги дополните резервоарите за гориво и за вода. Колку за споредба, ако застанете на половина час на пристаништето кај Вела Лука на Корчула да наполните вода, ќе ви наплатат 50 евра, без разлика што следниот ден веќе сте резервирале преноќување кај нив“, појаснува Елена.
Богата трпеза на бродот
Блумберг Адрија
СЛОБОДАТА НЕМА ЦЕНА, ВНИМАВАЈТЕ СО КОГО ЈА СПОДЕЛУВАТЕ
Желбата за ваков тип летување на Елена, која веќе четврта година одмора на брод, ѝ се родила за време на една од многуте посети во Хрватска, каде што живее сестра ѝ.
„Нејзини пријатели имаат бродови, па во една пригода нè поканија на неколкудневно пловење. Тогаш вистински почувствував како е да си од другата страна. Кога ќе се опуштиме на плажа на некоја лежалка, често знаеме да си помислиме колку им е убаво на оние што уживаат на палуба. Подоцна сфатив зошто таа поинаква перспектива е непроценлива. Разликата е во слободата, а таа нема цена. Правите што сакате и каде сакате. Уживате комплетна приватност и никој не ви пречи. Ниту еден ресорт не може да го замени ова уживање. Ова го сметам за вистински одмор за душата, рај за очите.. Можете каде било да го фрлите сидрото и да уживате. Не мора да играте по правила, да се брзате да го фатите појадокот или да се ’тепате’ за лежалка во првиот ред, па и да плаќате за сето тоа. Разликата е огромна“, нагласува Најдоски.
Октоподот е највкусен кога се јаде на брод
Блумберг Адрија
Таа вели дека пловењето со брод е за луѓе со авантуристички дух, за ентузијасти што сакаат секое наредно утро да им биде различно, за истражувачи што милуваат што повеќе да видат и да осознаат.
Ако првпат се впуштате во ваква авантура, таа има неколку многу добри совети за вас.
„Треба да бидете свесни дека на брод мора да се качите со луѓе што многу добро ги знаете, затоа што немате излез. Вие сте одбрале да бидете седум дена со истиот човек, со истата другарка, и таму сте како една фамилија, како Робинзон Крусо. Мора да бидете свесни дека кога има бранови, треба машки да го издржите тоа. Треба да бидете подготвени дека ќе спиете во помала спална соба, во кабина, и треба да го надминете тоа. Првата година може да ви биде страшно, чудно, на моменти можеби и клаустрофобично, но откако ќе го надминете сето тоа, секој нареден одмор ќе сакате да му се вратите на морето“, завршува Најдоски.
.webp){kind=icon}