text size
Ако одамна посакувате да го посетите Вечниот Град, тоа дефинитивно треба да го направите сега. Во овој период од годината метежот пред туристичките локации е значително помал, за разлика од март до ноември, а и цените за сместување се поприфатливи.
Во Рим нема да потрошите многу ниту на превоз. Сите главни атракции се релативно блиску, па најдобро ќе го истражите градот ако пешачите. Освен удобни обувки, понесете и шише за вода, кое ќе можете секаде да го дополните. Водата од чешма е безбедна за пиење, а тоа од старт ќе ви заштеди десетици евра.
Еве кои други седум работи во италијанската метропола можете да ги доживеете бесплатно или за помалку од 10 евра.
1. ПАНТЕОН
Приватна архива/Ѓорге Стојанов
Најстарата зграда на светот што сѐ уште е во употреба. Изграден од римскиот цар Адријан околу 125 година, ова, всушност, е третата верзија на објектот, откако првата од 80 година изгорела во пожар, а втората од 110 година се урнала по удар на гром. Внатрешноста е покриена со купола, која денес е најголемата неармирана бетонска купола на светот.
Некогашен храм, а сега црква, ова архитектонско чудо на Римското Царство годишно го посетуваат седум милиони луѓе. Италијанското министерство за култура од годинава одлучи да им наплаќа влез на туристите (пет евра), а собраните средства ќе ги намени за одржување и за реновирање на објектот. За малолетни лица и за жителите на Рим влезот останува бесплатен.
2. БАЗИЛИКАТА „СВЕТИ ПЕТАР“
Во една од најголемите цркви на светот годишно влегуваат пет милиони туристи. Посебно доживување е нејзината импозантна купола, од која имате убав поглед кон плоштадот „Свети Петар“.
Приватна архива/Ѓорге Стојанов
До врвот на базиликата се стигнува на два начина и воопшто не е едноставно, па оваа авантура не е препорачлива за трудници и за лица со срцеви заболувања. Ние го одбравме „полесниот“ пат, кој чини десет евра - користење ескалатор до одредено ниво, па искачување на 300 скали во тесен простор без огради, во одреден момент само со едно јаже, кое го држите за поддршка при искачувањето. Постои опција да платите две евра помалку, но во тој случај заборавете на лифтот.
Влезот во базиликата „Свети Петар“ е бесплатен, но редот знае да биде бесконечен, особено во претпладневните часови, па подобра опција е првиот дел од денот да го поминете во обиколка на Ватиканските музеи и Сикстинската капела.
Билетот не е евтин и чини 17 евра, а доколку резервирате онлајн и одберете да го прескокнете редот (skip the line), ќе мора да одвоите уште неколку евра. Сепак, многу туристи ја одбираат оваа опција, затоа што чекањето може да трае со часови.
И овде може да влезете бесплатно, но само во последната недела од месецот, од 9 до 14 часот. Тоа не важи за Велигден и за Божиќ.
3. ФОНТАНА „ДИ ТРЕВИ“
Најпознатата фонтана во светот е исто така бесплатно доживување. Најфотографираното место, во просек, на градот му носи околу 3.000 евра дневно, односно повеќе од милион евра годишно, но вие не сте обврзани да потрошите ниту денар.
Сепак, доколку се одлучите за веројатно најголемото клише во Рим, добро е да знаете дека парите од фонтаната секојдневно ги собираат активистите од хуманитарната организација „Каритас“ и ги користат за купување храна и лекови за сиромашните.
Приватна архива/Ѓорге Стојанов
Уште еден бесплатен совет! Овде ретко се наоѓа агол од кој можете да го овековечите местото без да ви влета во кадарот некој од стотиците туристи, но инфлуенсерите и за тоа имаат решение. Влезете во продавницата на „Бенетон“, која се наоѓа на спротивната страна од фонтаната. Качете се на вториот кат, застанете покрај еден од двата прозорци и фотографирајте на раат!
4. ШПАНСКИТЕ СКАЛИ
Уште една бесплатна знаменитост во Рим што не смеете да ја пропуштите се Шпанските скали, кои се под заштита на УНЕСКО како светско културно наследство.
Изградени во периодот од 1723 до 1725 година од Френческо де Санктис, 174-те скали биле дизајнирани да ја поврзат тогашната шпанска амбасада со црквата „Тринита деи Монти“, од која имате панорамски поглед и убаво зајдисонце.
Приватна архива/Ѓорге Стојанов
Последното реновирање на скалите чинеше 1,5 милион евра. Во 2019 година градските власти одлучија да воведат забрана за седење на нив, па полицајци постојано патролираат и ги опоменуваат неинформираните гости. Ако не го почитувате редот, може да ви наплатат 250 евра. Ако, пак, скалите ги извалкате или оштетите, законот предвидува казна и до 400 евра. Многу граѓани на Рим сметаат дека ваквата одлука е претерана, па дури и бизарна.
5. КАМПО ДЕ ФЈОРИ
Една од најживите области во Рим уште од 1869 година што вреди да ја посетите. Секое утро, освен во недела, истоимениот плоштад околу статуата на Џордано Бруно се претвора во огромен пазар, каде што можете да најдете буквално сѐ - од свежа храна до цвеќиња и сувенири. Изборот е голем, па овде најлесно ќе потрошите десет евра.
Приватна архива/Ѓорге Стојанов
Ова место е еднакво атрактивно за посета и во вечерните часови, кога се претвора во корзо. Тезгите експресно се креваат, па забавата продолжува во многубројните кафулиња и ресторани.
6. УСТА НА ВИСТИНАТА
Уште една бесплатна и забавна активност што може да ја направите во Рим е да ја посетите мермерната маска што стои на левиот ѕид од влезот на црквата „Санта Марија“ во Космедин.
„Устата на вистината“ (Bocca della Verità) е огромна мермерна скулптура на Океанус, богот на морето. Легендата вели дека маската се користела како древен детектор за лаги, кој го тестирал човечкиот интегритет одгризувајќи им ги рацете на оние што не ја кажувале вистината.
Приватна архива/Ѓорге Стојанов
Никој не знае кога е создадена и што точно претставува. Некои веруваат дека е украсен капак за бунар, други, пак, сметаат дека е парче декорација од фонтана.
Ова обележје на градот станува особено популарно во филмскиот класик „Празник во Рим“ (Roman holiday) од 1953 година, со Одри Хепберн и Грегори Пек во главните улоги.
7. ТРАСТЕВЕРЕ
Шармантен боемски кварт со евтини ресторани. Идеално место за опуштање откако ќе ги посетите главните знаменитости, област каде што ќе го доживеете вистинското темпо на градот.
Приватна архива/Ѓорге Стојанов
БОНУС ПРЕПОРАКА: ЕВЕ ШТО ДА ЈАДЕТЕ!
Едно од најпознатите места за улична храна во Рим е „Алантико винаио“ (All'Antico Vinaio) и се наоѓа во непосредна близина на Пантеон. Овде туристите трпеливо чекаат и по половина час за да ги пробаат најпродаваните сендвичи во градот, кои исто така нема да ве чинат повеќе од десет евра.
Приватна архива/Ѓорге Стојанов
Задолжително пробајте и супли (Supplì), италијански ужинки од 2,5 евра, многу слични со сицилијанските аранчини. Се прават од топче ориз и се јадат со прсти. Кога парчето ќе се скрши на два дела, однатре протекува моцарела.
.webp){kind=icon}
