Туристичката област во Будимпешта забранува изнајмување преку „Ербиенби“

Една од најатрактивните туристички области во Будимпешта на референдум гласаше за забрана на краткорочно изнајмување на сместување по зголемените трошоци за домување и поплаките на жителите за бучава и ѓубре.

Шестата област на унгарскиот главен град е една од најпопуларните области на сервисот „Ербиенби“ (Airbnb) и слични опции за изнајмување, со повеќе од 2.200 единици за изнајмување, според општината. Во двонеделната јавна дебата, 54 отсто од жителите гласаа за забраната, покажуваат резултатите објавени во понеделникот рано наутро.

По гласањето во понеделникот, градоначалникот Тамаш Сопрони вети дека ќе предложи закон со кој од 2026 година ќе се забрани краткорочно изнајмување во областа, која е позната по својот ноќен живот и авенијата Андраси, големиот булевар во центарот на Будимпешта, опкружен со вили од 19 век и луксузни продавници.

Одлуката е дел од глобалното противење на жителите на туристичките „жешки точки“ против краткорочните изнајмувања на станови. Критичарите тврдат дека таквите објекти ги влошуваат станбените кризи со намалување на понудата на долгорочни изнајмувања и зголемување на нивните трошоци. Големите градови, вклучувајќи ги Њујорк, Токио, Лондон и Париз, воведоа ограничувања за ваквите изнајмувања. Во јуни, Барселона ги објави плановите за постепено укинување на краткорочните изнајмувања до 2029 година.

Владата на премиерот Виктор Орбан, исто така, работи на воведување национални ограничувања за туристичките станови, за да го запре зголемувањето на трошоците за сместување, рече министерот за економија Мартон Наѓ во интервју за „Инфорадио“ (Inforadio) на 9 септември.

Во моментов нема коментари за веста. Биди прв да коментира...

Остави коментар