Фудбалска бизнис-лига – можност и за забава и за заработка

Тие што се обиделе знаат колку е тешко во Македонија да се соберат на едно место сите најголеми компании. Но тоа што речиси никој не може, фудбалот може да го направи.

Веќе 15 години најголемите компании во земјава се организирани во неформално натпреварување во мал фудбал. Бизнис-лигата годинава има 30 екипи, најмногу од основањето.

Дел од натпреварувањето се компании што имаат и по неколку илјади вработени, но и мали компании, кои влегле во проектот затоа што газдата сака фудбал, но и затоа што видел можност за зголемување на приходите.

Главната цел на сите е забава. Рекреација на вработените по долгиот работен ден и зближување. Фудбалскиот терен во спортскиот центар „Борис Трајковски“ е место каде што се брише границата меѓу шефовите и работниците, па дури и се менуваат улогите.

Одлична можност за развивање на тимскиот дух

Младен Ѓуровски е еден од „виновниците“ за проектот Бизнис-лига. Во разговор за „Блумберг Адрија“ тој вели дека овој проект, прв од ваков вид во земјата, е големо задоволство за организацискиот тим. Но и дека патот до сегашниот успех бил полн со предизвици.

„Развојниот пат на Бизнис-лигата, како и на секоја сериозна организација, не беше баш лесен. Главен предизвик беше да се убедат големите компании и нивниот менаџмент да ја сфатат Бизнис-лигата во целост како забава, спорт, рекреација, а наедно и за сопствена промоција“, вели Ѓуровски.

Најголемата компанија што учествува веќе неколку сезони во ова натпреварување е „Кромберг и Шуберт“, која во Битола и во Скопје вработува околу 7.000 работници. На натпреварите во „Борис Трајковски“ настапува екипа составена од вработени и од главниот град, но и од Битола, од каде што патувањето, особено во зимските месеци, воопшто не е лесна работа.

Екипата на „Кромберг и Шуберт“ на еден од натпреварите/ Бизнис-лига на Македонија, ФБ-страница

Од компанијата велат дека секогаш поддржуваат активности што се насочени кон промоција на активниот живот и здравите навики, но и будење на спортскиот дух.

„Мотивирани од љубовта кон спортот, решивме да бидеме дел од најелитното аматерско натпреварување во мал фудбал. Дека имаме сериозен пристап кон ова натпреварување говорат и нашите резултати. Овие резултати се доказ дека секогаш и кон сите наши цели сме посветени и професионални. Освен дружбата на колегите и заедничката прослава на успесите, една од главните придобивки за нашите вработени е и развивањето на тимскиот дух, кој е од особена важност за секоја компанија“, велат од одделот за човечки ресурси на „Кромберг и Шуберт“ за „Блумберг Адрија“.

И маркетинг и грижа за вработените

Освен големите компании, од година на година интерес за Бизнис-лигата пројавуваат и мали фирми. Една од нив е скопската компанија „Глас лукс“, која вработува 30 луѓе, а првпат годинава учествува во натпреварувањето.

Во разговор за „Блумберг Адрија“ сопственикот Александар Ристовски вели дека главната причини зошто учествува во натпреварување со многу поголеми компании е маркетингот.

„Доволно е 10 отсто од вработените во големите компании со кои сме играле да го запаметат името ’Глас лукс’ и кога ќе имаат потреба од каков било производ од стакло, ние да им бидеме првата асоцијација“, вели Ристовски.

Екипата на „Глас лукс“ на еден од натпреварите / Бизнис-лига на Македонија, ФБ-страница

Следната, не помалку важна причина е грижата за вработените. Тој вели дека на овој начин се зголемува дружењето меѓу работниците, а тие чувствуваат дека припаѓаат на колектив што се грижи за нив, што, пак, ја подобрува нивната продуктивност.

„И можеби најважното нешто е физичката активност, која ни е потребна на сите. Поздрави работници значи помалку отсуство од работа, а во мала компанија со 30 вработени, секое отсуство носи застој во процесот. Нашето мото е ’клиентот на прво место’ и затоа секогаш настојуваме да го испочитуваме рокот што сме го ветиле за испорака. Ако двајца вработени се разболат, неминовно е дека ќе трпи работата“, вели сопственикот на „Глас лукс“.

На пазарот лути ривали, на теренот пријатели

„Окта“, „Макпетрол“ и „Лукоил“ се меѓу ветераните во натпреварувањето и главни конкуренти на нафтениот пазар. Ѓуровски вели дека ривалството на теренот не се чувствува затоа што фудбалот обединува. Но тоа не значи дека на натпреварите на Бизнис-лигата нема и непријатни сцени. Како и на секој спортски терен, и тука главите се вжештуваат.

„Фудбалската игра е полна со такви ситуации. Впрочем, и убавината на целото ова натпреварување е баш во таквите ситуации. Но успеваме да ги решиме таквите ’кризи‘. Голем дел од екипите учеснички располагаат со играчи што се поранешни фудбалери, кои знаат на теренот да бидат лути ривали. Сепак, надвор од него, со помош на ова натпреварување, сите стануваат пријатели“, вели тој.

Нема шефови и работници

Ова натпреварување е пример дека работниците и шефовите можат да ги сменат улогите, кој има повеќе искуство со фудбал, тој е главен – сѐ во име на победата.

„Бизнис-лигата е тука за да направи микс и надвор од работното место, поточно на фудбалскиот терен сите да бидат еднакви, за да можат да го развијат тимскиот дух“, вели Ѓуровски.

По 15 години, организаторите велат дека нивниот проект прерасна во нешто многу повеќе од само спорт, рекреација и забава за вработените во компаниите.

„Во Бизнис-лигата се склопуваат не само нови познанства туку и нови бизнис-партнерства, па, оттука, таа со два збора претставува начин на живот“, завршува Ѓуровски.

Во моментов нема коментари за веста. Биди прв да коментира...

Остави коментар