Пет работи што Маск ги мрази кај Твитер и сака да ги промени

Илон Маск работи на тоа да остави свој белег на „Твитер“ (Twitter Inc.), неколку дена откако ја презеде сопственоста врз платформата.

Најбогатиот човек на светот го прегледуваше кодот на компанијата со помош на инженерите од „Тесла“ (Tesla Inc.), додека се консултираше и со моќни пријатели на кои им верува за да му помогнат да донесе важни одлуки за тоа во која насока да ја постави услугата.

Засега испадна дека правењето големи промени на платформата стара 16 години, со околу 7.000 вработени, е полесно да се каже отколку да се спроведе. Еве преглед на она што Маск го посакува - и како тоа се вкрстува со реалноста:

Кратење на работни места

Вработените во Twitter се подготвуваат за отпуштања уште откако Маск го презеде и го отпушти највисокиот извршен тим, вклучувајќи го и главниот извршен директор, Параг Агравал. Во текот на викендот, неколку вработени со директорски и потпретседателски позиции биле отпуштени, според извори запознаени со ситуацијата. Од другите менаџери во текот на викендот било побарано да направат списоци на вработени во нивните тимови кои може да бидат отпуштени, посочуваат изворите.

Од високиот персонал во продукт-тимовите било побарано да се насочат кон намалување на бројот на вработени за 50 отсто, според лице запознаено со ова прашање. Инженери и директорски персонал од Tesla ги прегледaле списоците, вели лицето кое побарало да остане анонимно бидејќи станува збор за приватни информации. Списоците за отпуштања биле составени и рангирани врз основа на придонесите на поединци кон кодот на Twitter за време на периодот минат во компанијата, посочуваат изворите. Проценката ja правеле персоналот на Tesla и менаџерите на Twitter.

Bloomberg

Лидерство

Маск се обратил кон старите пријатели за совет во првите неколку дена од неговото шефување во Twitter. Редовно се состанува со Дејвид Сакс, капиталист и пријател од неговите денови во „Пејпал“ (PayPal), Џејсон Калачанис пријател и инвеститор и Срирам Кришнан, поранешен извршен директор на Twitter и сегашен генерален партнер во фирмата Andreessen Horowitz. Групата разговарала за стратегијата на Twitter, иако не се знае дали некој од нив ќе биде лидер со полно работно време. И Калачанис и Сакс имаат адреси на електронската пошта на Twitter, во внатрешниот директориум на компанијата, а Кришнан во неделата твитна дека сè уште е концентриран на секојдневната работа во Andreessen Horowitz.

Еден од можните лидери со полно работно време е Кајвон Бејкпур, поранешен шеф во Twitter, кој годинава беше отпуштен од претходниот извршен директор. Иако Бејкпур бил виден во канцелариите по затворањето на зделката и наводно му било побарано враќање, ништо не е финализирано, тврдат упатени извори.

Кратки видео содржни (Vine) 

Маск размислува за заживување на Vine, според луѓе запознаени со тековните состојби. Vine, купена од Twitter во 2012 година, беше популарна видео-апликација за кратки содржини, која создаде неколку интернет ѕвезди пред да избледе и да се исклучи. Услугата ги започна трендовите во кои сега доминира „Тик-ток“ (TikTok) на ByteDance Ltd, а се копирани од „Рилс“ (Reels) на Instagram и „Шортс“ (Shorts) на YouTube. Многу вработени внатре во компанијата волонтираат за да работат на проектот Vine, според извор запознаен со ова прашање, во надеж дека приклучувањето кон проектите за кои Маск сега е заинтересиран може да им помогне да ги задржат своите работни места.

Сепак, враќањето на оваа услуга не би било лесно и едноставно. Производот, исклучен во 2016 година, се базира на стар код кој веќе не е компатибилен со тековните системи на Twitter и најверојатно ќе треба да се преработи, велат познавачите. Тоа би довело и до други предизвици, како што се можноста за партнерства за музички права и потреба од подобри методи за плаќање на креаторите.

Верификација

Според лица запознаени со случувањата, Маск сака да почне да им наплаќа на корисниците за сината значка за верификација на налозите. Тој задолжил тим да ја креира ваквата опција под закана дека ќе им бидат елиминирани позициите доколку не го сторат тоа за 7 дена, објави The Verge.

Планот поттикна многу коментари од корисниците на Twitter, од кои некои порачаа дека никогаш нема да платат за нешто што порано го добивале бесплатно, додека други рекоа дека Twitter едноставно губи пари со тоа што не наплаќа за нешто што е толку посакувано. Некои критичари на планот забележаа дека ако Twitter наплаќа, најверојатно ќе заврши со помалку верифицирани корисници, создавајќи почва за лажно претставување и дезинформации. Исто така, ако верификацијата стане нешто за кое корисниците плаќаат - наместо да се квалификуваат, како јавни личности или брендови - сината значка би можела да носи помало социјално влијание отколку денес.

Модерација на содржината 

Која е најпознатата визија на Маск за иднината на Twitter? Платформата да се направи рај за „слободен говор“. Но, сè уште не е јасно како планира да го стори тоа. Тој јавно кажа дека ќе се воздржи од носење одлуки за тоа кои забранети корисници ќе бидат вратени на платформата, додека за тоа не се консултира со надворешни експерти.

Внатрешно, велат вработените, Маск покренал прашања во врска со голем број политики и се осврнал на неколку специфични правила кои сака тимот да ги разгледа. Првата е општата политика за дезинформации на Twitter, која ги казнува и означува објавите што содржат невистини за теми како што се изборни резултати и Ковид-19. Маск сака политиката да биде поконкретна, според луѓе запознаени со ова прашање.

Маск, исто така, побарал од тимот да ја разгледа политиката на односот на Twitter кон омразата, тврдат извори, поконкретно на делот во кој се вели дека корисниците може да бидат казнети за „погрешна родова категоризација или називи за трансродовите лица“.

Во двата случаја, не е јасно дали Маск сака политиките да бидат модифицирани или целосно да се отстранат од ограничувањата.