.webp){kind=icon}
Вработени во „Мета“ (Meta Platforms Inc.) и „Бајт денс“ (ByteDance Inc.) биле свесни за штетните ефекти на нивните платформи врз малите деца и тинејџерите, но ги игнорирале информациите или во некои случаи се обиделе да ги поткопаат, според тврдења во судска пријава.
Откритијата се обелоденети во тужба за зависност од социјалните мрежи што беше поднесена претходно, но нејзините клучни делови беа запечатени за очите на јавноста. Нередактирана верзија поднесена во текот на викендот во федералниот суд во Оукленд, Калифорнија, дава детали за тоа колку инженерите и другите, вклучувајќи го и извршниот директор на „Мета“, Марк Закерберг, знаеле за штетите на социјалните мрежи и нивните непостапувања во однос на тоа прашање.
„Никој не се буди мислејќи дека сака да го максимизира бројот на отворања на Инстаграм тој ден“, напишал еден вработен во „Мета“ во 2021 година, според поднесокот. „Но токму тоа се обидуваат да го направат нашите тимови за производи“.
Случајот во Оукленд се состои од збирка поплаки поднесени низ САД во име на адолесценти и млади луѓе што тврдат дека Фејсбук, Инстаграм, Тикток, Снепчет и Јутјуб на „Гугл“ предизвикале да страдаат од анксиозност, депресија, нарушувања во исхраната и несоница. Како вина на платформите се препишуваат и повеќе од десетина самоубиства, врз основа на тврдења дека тие свесно дизајнирале алгоритми што ги повлекуваат децата по опасни патеки, кои предизвикуваат зависност. Неколку јавни училишни установи исто така поднесоа тужби, тврдејќи дека не можат да ја исполнат својата образовна мисија додека учениците се справуваат со кризи во менталното здравје.
Во своја одбрана, гигантите на социјални мрежи укажуваат на закон од 1996 година, кој на интернет-платформите им дава широк имунитет во однос на тврдењата за штетна содржина објавени од корисниците. Двете страни внимателно следат случај во Врховниот суд, кој најверојатно ќе ја одреди судбината на судскиот спор во Оукленд.
Според новиот поднесок, инсајдерски документи од матичната компанија на Тикток, „Бајт денс“, покажуваат дека компанијата знае оти младите луѓе се поподложни кон тоа да бидат намамени да испробуваат опасни акробации што ги гледаат на платформата - познати како вирални предизвици - бидејќи нивната способност да го измерат ризикот не е целосно формирана.
Поголема е веројатноста младите да ја „преценат својата способност да се справат со ризикот“, а нивната „способност да ја разберат конечноста на смртта исто така не е целосно развиена“, се вели во поднесокот.
Друг незапечатен дел од поднесокот тврди дека „Мета“ наместо да се насочи кон решавање на проблемите околу децата што користат Инстаграм и Фејсбук, го дефинансира својот тим за ментално здравје.
Во поднесокот се вели дека Закерберг бил лично предупреден: „Ние не сме насочени по патот на успехот кога станува збор за нашите основни програми за благосостојба (проблематична употреба, малтретирање и вознемирување, врски и SSI) и сме изложени на зголемен регулаторен ризик и надворешна критика. Тие ги засегаат сите, особено младите и креаторите; доколку не се најде соодветно решение, проблемот ќе продолжи и во метаверзумот“.
Портпарол на „Мета“ рече дека тврдењето оти е повлечено финансирањето за поддршка на благосостојбата на корисниците е лажно.
„Всушност, бидејќи ова е од огромна важност за нашата компанија, ние го зголемивме финансирањето, што е евидентно преку 30 алатки што ги нудиме за поддршка на тинејџерите и семејствата“, рече портпаролот. „Денес има стотици вработени што работат низ компанијата за да создадат функции за таа цел“.
