.webp){kind=icon}
Испораките на персонални компјутери на „Епл“ (Apple) паднале за 40,5 отсто во првиот квартал, што претставува тежок почеток на годината за производителите на компјутери, кои сè уште се борат со прекумерно изобилство непродадени резерви.
Испораките од сите производители на персонални компјутери заедно паднаа за 29 отсто, на 56,9 милиони единици, паѓајќи под нивото од почетокот на 2019 година, бидејќи избледе растот на побарувачката поттикнат од работењето од далечина во времето на пандемијата, се вели во најновиот извештај на ИДЦ (IDC). Меѓу лидерите на пазарот, „Леново“ (Lenovo Group) и „Дел“ (Dell Technologies) забележаа пад од повеќе од 30 отсто, додека ХП (HP) падна за 24,2 отсто. Ниту една голема марка не е поштедена од забавувањето, а „Асустек“ (Asustek Computer) ја заокружи првата петорка со пад од 30,3 проценти.
Забавеното трошење во текот на изминатата година доведе и до двоцифрен пад на испораките на паметни телефони и зголемена презаситеност меѓу водечките светски доставувачи на мемориски чипови. „Самсунг“ (Samsung Electronics), кој произведува меморија за преносни уреди, како и за десктоп-компјутери, минатата недела соопшти дека го намалува производството на меморија откако го пријави својот најнизок профит од финансиската криза во 2009 година.
Пад во испораката на персонални компјутери
Bloomberg
„Иако резервите се исцрпуваат во текот на изминатите неколку месеци, сè уште се далеку над здравиот опсег од четири до шест недели“, рече Јитеш Убрани, менаџер за истражување во ИДЦ. „Дури и со големи попусти, производителите на компјутери може да очекуваат зголемените резерви да опстојат до средината на годината и потенцијално во третиот квартал“.
Добра работа во оваа лоша ситуација е што оладената побарувачка им дава на производителите време и простор „да направат промени бидејќи многу фабрики почнуваат да ги истражуваат производствените опции надвор од Кина“, се вели во извештајот на ИДЦ. „Епл“ постепено ја диверзифицира местоположбата на својата производствена база, бидејќи новите тензии меѓу Вашингтон и Пекинг се закануваат да го нарушат внимателно организираниот синџир на снабдување на компанијата.
Гледајќи кон 2024 година, истражувачите на ИДЦ предвидуваат потенцијално закрепнување за производителите на компјутери, поттикнато од комбинацијата на стар хардвер што корисниците ќе треба да го заменат и подобрување на глобалната економија.
